മലയാളത്തിൻ്റെ യുവ നായികമാരായ അനശ്വര രാജനും പ്രിയ വാര്യരും ബോളിവുഡിലേക്ക്. മലയാളത്തിലെ സൂപ്പർ ഹിറ്റ് ചിത്രം ബാംഗ്ലൂർ ഡെയ്സിൻ്റെ ഹിന്ദി പതിപ്പിലാണ് വിസ്മയിപ്പിക്കുന്ന താരനിരയ്ക്കൊപ്പം ഇരുവരും അരങ്ങേറ്റം കുറിക്കുന്നത്. വിദ്യ ബാലനും അസിനും ശേഷം മലയാളത്തിൻ്റെ ഈ രണ്ടു നായികമാരും ബോളിവുഡിലേക്കുള്ള പ്രവേശനം ആഘോഷമാക്കുകയാണ്.
ദുൽഖർ സൽമാൻ, നിവിൻ പോളി, ഫഹദ് ഫാസിൽ, നസ്രിയ, പാർവതി, ഇഷ തൽവാർ എന്നിവരെ പ്രധാന കഥാപാത്രങ്ങളാക്കി അഞ്ജലി മേനോൻ സംവിധാനം ചെയ്ത ബാംഗ്ലൂർ ഡെയ്സ് 2014 ൽ സൂപ്പർ ഹിറ്റായ ചിത്രമാണ്. പിന്നീട് ഈ ചിത്രം 2016 ൽ ബാംഗ്ലൂർ നാട്ക്കൾ എന്ന പേരിൽ തമഴിൽ റീമേക്ക് ചെയ്തിരുന്നു. ഇപ്പോൾ യാരിയാൻ 2 എന്ന പേരിൽ ഹിന്ദി പതിപ്പാണ് ഒരുക്കുന്നത്. രാധിക റാവു, വിനയ് സപ്രു എന്നവരാണ് ചിത്രം സംവിധാനം ചെയ്യുന്നത്. ചിത്രം 2023 മെയ് 12ന് തീയറ്റുകളിൽ എത്തും. 2014 ൽ സൂപ്പർ ഹിറ്റായ ബോളിവുഡ് ചിത്രം യാരിയാൻ സീരീസായിട്ടാണ് ചിത്രം ഒരുക്കുന്നത്.
യാരിയൻ സംവിധാനം ചെയ്ത ദിവ്യ കോസ്ല കുമാർ പുതിയ ചിത്രത്തിൽ കാമറക്കു മുന്നിലെത്തുന്നു. മീസാൻ ജാഫ്രി, യാഷ് ദാസ് ഗുപ്ത, പേൾ വി പുരി, വരീന ഹുസൈൻ എന്നിവും യാരിയാൻ 2 ലെത്തുന്നുണ്ട്. ബാംഗ്ലൂർ ഡെയ്സിൽ ദുൽഖർ സൽമാൻ അവതരിപ്പിച്ച കഥാപാത്രത്തെ മീസാൻ ജാഫ്രിയും നിവിൻ പോളിയുടെ കഥാപാത്രത്തെ യാഷ് ദാസ് ഗുപ്തയും നസ്രിയയുടെ കഥാപാത്രത്തെ ദിവ്യയും അവതരിപ്പിക്കും. പാർവതി അവതരിപ്പിച്ച കഥാപാത്രത്തെ അനശ്വര രാജനും ഇഷ തൽവാർ അവതരിപ്പിച്ച കഥാപാത്രത്തെ പ്രിയ വാര്യരും വെള്ളിത്തിരയിലെത്തിക്കും.
അനശ്വരയുടെ ആദ്യ ഹിന്ദി ചിത്രമാണ് യാരിയാൻ 2. പ്രിയ വാര്യർ മുമ്പ് ശ്രീദേവി ബംഗ്ലാവ് എന്ന ചിത്രത്തിൽ അഭിനയിച്ചിട്ടുണ്ട്. ഇതിനൊപ്പം ത്രീ മങ്കീസ്, ലൗവ് ഹാക്കേഴ്സ് എന്നീ ഹിന്ദി ചിത്രങ്ങളിലും പ്രിയ വാര്യർ എത്തും. തെലുങ്കിലും കന്നടത്തിലും ഇതിനോടകം അഭിനയിച്ച പ്രിയുടെ മൂന്നു മലയാള ചിത്രങ്ങളാണ് റിലീസിനു തയാറാവുകയാണ്. രഞ്ജിത്ത് ശങ്കർ സംവിധാനം ചെയ്യുന്ന കാമ്പസ് മൂവി ഫോർ ഇയേഴ്സ്, കൊള്ള, ഒരു നാൽപതുകാരൻ്റെ ഇരുപത്തൊന്നുകാരി എന്നിവയാണ് മലയാളത്തിലെ ചിത്രങ്ങൾ.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here