കേരളത്തിലെ കോണ്‍ഗ്രസ് നേതൃത്വം പരാജയമെന്ന് സൂചിപ്പിച്ച് കെ മുരളീധരന്‍(K Muraleedharan). ശശി തരൂരി(shashi tharoor)നെ പോലുള്ളവര്‍ കേരള നേതൃത്വത്തിലേക്ക് വരട്ടെയെന്നും മുരളീധരന്‍ പറഞ്ഞു.
അതേസമയം പ്രധാനമന്ത്രിയെ പുകഴ്ത്തി കോൺഗ്രസ് നേതാവ് ശശി തരൂർ എം പി(Shashi Tharoor MP). നരേന്ദ്ര മോദി വിജയിച്ച ബ്രാൻഡ് എന്നാണ് ശശി തരൂർ വിശേഷിപ്പിച്ചത്. സംഘപരിവാർ അനുഭാവിയും കേന്ദ്രമന്ത്രി വി.മുരളീധരൻ്റെ അടുത്ത സുഹൃത്തും ഹിന്ദി, ഇംഗ്ലീഷ് മാധ്യമങ്ങളിൽ രാഷ്ട്രീയ നിരീക്ഷകനായി പങ്കെടുത്ത് ബി.ജെ.പി(bjp)യെ അനുകൂലിക്കുന്ന ദില്ലി മലയാളിയും കൂടിയായ പി കെ ഡി നമ്പ്യാരുടെ പുസ്തക പ്രകാശന ചടങ്ങിലാണ് ശശി തരൂർ എം പി പ്രധാനമന്ത്രിയെ പുകഴ്ത്തിയത്.
യു ടൂ കാൻ ബി എ ബ്രാൻഡ് എന്ന പുസ്തകത്തിൻ്റെ പ്രകാശന ചടങ്ങിലായിരുന്നു പ്രശംസ. ‘നരേന്ദ്ര മോദി വിജയിച്ച ബ്രാൻഡ് ആണ്. മോദി അവസരങ്ങൾ മുതലെടുത്ത് നെഗറ്റീവിനെയും വിമർശനങ്ങളെയും അവസരമാക്കി മാറ്റി. നെഗറ്റീവ് ഇമേജ് മറികടന്ന് ജനങ്ങളെ സ്വാധിനിക്കാൻ കഴിഞ്ഞു’, തരൂർ പറഞ്ഞു.
സംഘ പരിവാർ അനുകൂല പുസ്തക പ്രസാദക സ്ഥാപനമായ ഇൻഡസ് സ്ക്രാൾസാണ് പരിപാടി സംഘടിപ്പിച്ചത്. രാഷ്ട്രീയത്തിലെ ബ്രാൻഡിംഗ് സമയത്തിനനുസരിച്ചിരിക്കുമെന്നും മോദിയുടെ നേതൃപാടവം മികച്ചതാണെന്നും തരൂരിനെ വേദിയിലിരുത്തി പി കെ ഡി നമ്പ്യാരും അഭിപ്രായപ്പെട്ടു. നിങ്ങൾ ആരാണ് എന്ന് മനസിലാക്കണമെന്ന് രാഹുലിനെ ഉദ്ദേശിച്ച് നമ്പ്യാർ പറഞ്ഞു. കോൺഗ്രസിലെ കുടുംബ വാഴ്ച്ചയെ എതിർത്ത തരൂർ മൻമോഹൻ സിങ് മികച്ച പ്രധാനമന്ത്രിയായിരുന്നുവെന്നും പറഞ്ഞു.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
