സിറോ മലബാര് സഭയുടെ ഭൂമിയിടപാട് കേസില് വിചാരണ കോടതിയില് നേരിട്ട് ഹാജരാകുന്നതില്നിന്ന് ഒഴിവാക്കണമെന്ന കര്ദിനാള് മാര് ജോര്ജ് ആലഞ്ചേരിയുടെ ആവശ്യം സുപ്രീം കോടതി തള്ളി. ഡിസംബര് 14ന് കാക്കനാട് മജിസ്ട്രേറ്റ് കോടതിയില് ഹാജരാകുന്നതില് നിന്ന് ഇളവ് നല്കണമെന്നായിരുന്നു സുപ്രീംകോടതിയില് കര്ദിനാള് ആലഞ്ചേരിയുടെ ആവശ്യം.
നേരിട്ട് കോടതിയില് ഹാജരാകണമെന്ന ഹൈക്കോടതി വിധി മറച്ചുവച്ചാണ് കര്ദിനാള് സുപ്രീംകോടതിയെ സമീപിച്ചതെന്ന് ഹര്ജിക്കാരനായ ഷൈന് വര്ഗീസ് വാദിച്ചു. കര്ദിനാളിന് ഇളവ് നല്കുന്നത് തെറ്റായ സന്ദേശം നല്കുമെന്ന് ഹൈക്കോടതി തന്നെ വ്യക്തമാക്കിയിട്ടുണ്ടെന്നും ഹര്ജിക്കാരന് വേണ്ടി അഭിഭാഷകനായ രാകിന്ത് ബസന്ത് ചൂണ്ടിക്കാട്ടി.
ജസ്റ്റിസുമാരായ ഹൃഷികേശ് റോയ്, ദിപാങ്കര് ദത്ത എന്നിവരടങ്ങിയ ബെഞ്ചാണ് ഹര്ജി പരിഗണിച്ചത്. അതേ സമയം ഭൂമിയിടപാടുകളുമായി ബന്ധപ്പെട്ട കേസ്സുകള് റദ്ദാക്കണമെന്ന് ആവശ്യപ്പെട്ട് കര്ദിനാള് മാര് ആലഞ്ചേരി നല്കിയ ഹര്ജിയും, പള്ളികളുടെ ഭൂമിയും ആസ്തിയും വില്ക്കാന് ബിഷപ്പുമാര്ക്ക് അധികാരമില്ലെന്ന ഹൈക്കോടതി ഉത്തരവിലെ തുടര് നടപടികള്ക്ക് എതിരെ വിവിധ രൂപതകള് നല്കിയ ഹര്ജിയും പരിഗണിക്കുന്നത് ജനുവരി പത്തിലേയ്ക്ക് സുപ്രീംകോടതി മാറ്റിവെച്ചു.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here