അന്വേഷണ ഏജൻസികളെ രാഷ്ട്രീയ ഉപകരണമാക്കുന്നതിന് പകരം മയക്കുമരുന്ന് കടത്തിനെതിരെ നടപടിയാണ് കേന്ദ്രം സ്വീകരിക്കേണ്ടത്: എഎ റഹിം

എല്ലാ കേന്ദ്ര അന്വേഷണ ഏജൻസികളെയും രാഷ്ട്രീയ ഉപകരണമായി ഉപയോഗിക്കുന്നതിനുപകരം രാജ്യത്തെ മയക്കുമരുന്ന് കടത്ത് ഭീഷണി നേരിടാൻ സർക്കാർ ഗൗരവമായ നടപടികൾ സ്വീകരിക്കണമെന്ന് എ എ റഹീം എംപി .അദ്ദേഹത്തിൻ്റെ ചോദ്യത്തിന് ആഭ്യന്തര സഹമന്ത്രി ശ്രീ നിത്യാനന്ദ് റായ് നൽകിയ മറുപടിയിലെ കണക്കുകൾ ചൂണ്ടിക്കാട്ടിയാണ് അദ്ദേഹത്തിൻ്റെ ആവശ്യം.രാജ്യത്തുടനീളമുള്ള നാർക്കോട്ടിക് ഡ്രഗ്സ് ആൻഡ് സൈക്കോട്രോപിക് സബ്സ്റ്റൻസസ് (എൻഡിപിഎസ്) നിയമപ്രകാരമുള്ള കേസുകളുടെ എണ്ണവും ശിക്ഷാ നിരക്കും കേന്ദ്രം പുറത്ത് പുറത്തുവിട്ടു.കൂടാതെ നാർക്കോട്ടിക് കൺട്രോൾ ബ്യൂറോ (എൻസിബി) രാജ്യത്തുടനീളം രജിസ്റ്റർ ചെയ്ത കേസുകളുടെയും വിവരങ്ങളും നൽകിയിട്ടുണ്ട്.

എൻ‌ഡി‌പി‌എസ് നിയമപ്രകാരം രജിസ്റ്റർ ചെയ്ത കേസുകളുടെ കണക്കുകൾ കാണിക്കുന്നത് ഏറ്റവും ഉയർന്ന ശിക്ഷാ നിരക്കൊടെ കേരളം എല്ലാ സംസ്ഥാനങ്ങളേക്കാളും മുന്നിലാണെന്നാണ്. 2021ൽ കേരളത്തിൽ 5695 കേസുകളിൽ ശിക്ഷിക്കപ്പെട്ടത് 98.9 ശതമാനമായിരുന്നു. ദേശീയ ശരാശരി 78.1 ശതമാനം മാത്രമാണ്. അതേസമയം, ബിജെപിയുടെ മാതൃകാ സംസ്ഥാനമായ ഗുജറാത്തിൽ വെറും 461 കേസുകളിൽ ശിക്ഷിക്കപ്പെട്ടത് 33.3 ശതമാനം മാത്രമാണ്. ഇതുവരെ ബിജെപി ഭരിച്ചിരുന്ന ഹിമാചൽ പ്രദേശിൽ 31 ശതമാനമാണ് ശിക്ഷാ നിരക്ക്. ബിജെപി ഭരിക്കുന്ന മറ്റൊരു സംസ്ഥാനമായ അരുണാചൽ പ്രദേശിൽ ശിക്ഷാ നിരക്ക് 16.7 ശതമാനം മാത്രമാണ് എന്നും കേന്ദ്രം നൽകിയ കണക്കുകൾ ഉദ്ധരിച്ച എഎ റഹിം പറഞ്ഞു.

മയക്കുമരുന്ന് വിപത്തിനെ കേരള സർക്കാർ വളരെ ഗൗരവത്തോടെയാണ് നേരിടുന്നതെന്ന് ഈ കണക്കുകൾ വ്യക്തമാക്കുന്നു. നിരവധി കേസുകളിൽ പോലും ശിക്ഷാ നിരക്ക് വളരെ ഉയർന്നതും 100 ശതമാനത്തിനടുത്തുമാണ്. പോലീസ് സമഗ്രമായ ഇൻ്റലിജൻസ് ശേഖരണവും അന്വേഷണവും നടത്തുന്നുണ്ടെന്നും പ്രോസിക്യൂഷൻ അതീവ ഗൗരവത്തോടെയാണ് നടക്കുന്നതെന്നും ഇത് കാണിക്കുന്നുവെന്നും അദ്ദേഹം ചൂണ്ടിക്കാട്ടിക്കാട്ടി.

ഇത് ഗുജറാത്ത് പോലുള്ള ബിജെപി സംസ്ഥാനങ്ങളിൽ നിന്ന് തികച്ചും വ്യത്യസ്തമാണ്. കുറഞ്ഞ ശിക്ഷാ നിരക്ക് കാണിക്കുന്നത് അവിടെയുള്ള സർക്കാരുകൾ മയക്കുമരുന്ന് വിപത്തിനെ നേരിടുന്നതിൽ ഗൗരവമുള്ളവരല്ല എന്നാണ്. അന്വേഷണത്തിലും പ്രോസിക്യൂഷനിലുമുള്ള അലംഭാവം കുറഞ്ഞ ശിക്ഷാ നിരക്കിലേക്ക് നയിക്കുന്നു. ഈ സംസ്ഥാനങ്ങളിലെ ഭരണകക്ഷിയും മയക്കുമരുന്ന് മാഫിയകളും തമ്മിലുള്ള ഒത്തുകളിയൊണ്ടെന്ന ആരെങ്കിലും ആരോപിച്ച് അവരെ കുറ്റം പറയാനാവില്ല എന്നും എഎ റഹിം വ്യക്തമാക്കി

രാജ്യത്തുടനീള എൻസിബി രജിസ്റ്റർ ചെയ്ത 125 കേസുകളിൽ 2018ൽ 81.68 ശതമാനമായിരുന്നു അഖിലേന്ത്യാ ശിക്ഷാ നിരക്ക്. ഇത് 2021ൽ 77 കേസുകളിൽ 62 ശതമാനമായും 2022ൽ 80 കേസുകളിൽ 56.25 ശതമാനമായും കുറഞ്ഞുവെന്നാണ് കണക്കുകൾ കാണിക്കുന്നത് എന്നും എഎ റഹിം പറഞ്ഞു.

കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും  ലഭ്യമാണ്.  വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.