അബ്​ദുൾ റഹീമി​ന്റെ മോചനം നീളും ;കേസ് വീണ്ടും മാറ്റി വച്ചു

സൗദി ബാലൻ കൊല്ലപ്പെട്ട കേസിൽ 19 വർഷമായി റിയാദിലെ ജയിലിൽ കഴിയുന്ന കോഴിക്കോട് ഫറോക്ക് കോടമ്പുഴ സ്വദേശി മച്ചിലകത്ത്​ അബ്​ദുൾ റഹീമി​ന്റെ മോചനം വൈകും . മോചനത്തിന്റെ കാര്യത്തിൽ ഇന്നും തീർപ്പുണ്ടായില്ല. റിയാദിലെ ക്രിമിനൽ​ കോടതി കേസ് പതിനൊന്നാം തവണയും മാറ്റി വച്ചു. തിങ്കളാഴ്​ച രാവിലെ​ 8 .30 ന് സിറ്റിങ് ആരംഭിച്ചെങ്കിലും മറ്റൊരു ദിവസത്തേക്ക് മാറ്റുകയായിരുന്നു. ജയിലിൽ നിന്ന്​ അബ്​ദുൾ റഹീമും പ്രതിഭാഗം അഭിഭാഷകരും ഓൺലൈൻ കോടതിയിൽ പ​ങ്കെടുത്തു.

2006 നവംബർ 28ന് 26-ാം വയസിൽ റിയാദിലെത്തിയ അബ്‌ദുൾ റഹീം, ഡിസംബർ 24ന് ജോലിക്കിടെ സ്പോൺസറായ സൗദി പൗരൻ ഫായിസ് അബ്‌ദുല്ല അബ്‌ദുറഹിമാൻ അൽ ശഹ്‌രിയുടെ 15 വയസ്സുകാരനായ മകൻ മരണപ്പെട്ട കേസിലാണ് ജയിലിലാകുന്നത്. റിയാദിലെ ഇസ്​കാൻ ജയിലിൽ റഹീം 19 വർഷമായി തടവിലാണ്. എന്നാൽ ദിയാധനം സ്വീകരിച്ച്​ വാദിഭാഗം മാപ്പ്​ നൽകിയതോടെ വധശിക്ഷ കോടതി അഞ്ച്​ മാസം മുമ്പ്​ ഒഴിവാക്കിയിരുന്നു. പബ്ലിക്​ റൈറ്റ്​ പ്രകാരമുള്ള കേസിൽ തീർപ്പാവാത്തതാണ്​ ജയിൽ മോചനം അനന്തമായി നീളാൻ ഇടയാക്കുന്നത്​​.

ALSO READ : സംസ്ഥാനത്ത് മഴയ്ക്ക് സാധ്യത; ഏഴ് ജില്ലകളിൽ ഓറഞ്ച് അലർട്ട്

ലോകവ്യാപകമായി മലയാളികൾ ചേർന്ന്​ സമാഹരിച്ച ഒന്നര കോടി സൗദി റിയാൽ (34 കോടിയിലേറെ ഇന്ത്യൻ രൂപ) ആണ് ​ മരിച്ച സൗദി ബാലന്റെ കുടുംബത്തിന് ദിയാധനമായി നൽകിയത്​. അതിനെ തുടർന്നാണ്​ അവർ മാപ്പ്​ നൽകിയതും കോടതി വധശിക്ഷ റദ്ദ് ചെയ്​തതും.