ബെംഗളൂരു-എറണാകുളം ഇന്‍റർസിറ്റിയിൽ ഡിസംബർ മൂന്ന് മുതൽ ടിക്കറ്റ് നിരക്ക് കുറയും; മാറ്റം സൂപ്പർഫാസ്റ്റ് എക്സ്പ്രസ് ആകുന്നതോടെ

കൊച്ചി: കെ എസ് ആർ ബെംഗളൂരുവിൽ നിന്ന് എറണാകുളത്തേക്ക് സർവീസ് നടത്തുന്ന ഇന്റർസിറ്റി ട്രെയിനിൽ ഡിസംബർ മൂന്ന് മുതൽ ടിക്കറ്റ് നിരക്ക് കുറയും. സൂപ്പർഫാസ്റ്റ് ട്രെയിൻ (12677/12678) ഡിസംബർ 3 മുതൽ എക്സ‌്പ്രസാകുന്നതോടെയാണ് ടിക്കറ്റ് നിരക്കില്‍ മാറ്റം വരുന്നതെന്ന് റെയിൽവേ അറിയിച്ചു.

നിലവിൽ സെക്കൻഡ് സിറ്റിങ്ങിന് റിസർവേഷൻ ചാർജ് ഉൾപ്പെടെ എറണാകുളം-ബംഗളുരു റൂട്ടിൽ 220 രൂപയും എസി ചെയർകാറിന് റിസർവേഷൻ ചാർജ് ഉൾപ്പെടെ 790 രൂപയുമാണ് ടിക്കറ്റ് നിരക്ക്. എന്നാല്‍ ഈ ട്രെയിൻ എക്സ്പ്രസ് ആയി മാറുന്നതോടെ സെക്കൻഡ് സിറ്റിങ്ങിൽ 205 രൂപയും എ സി ചെയർകാറിൽ 740 രൂപയുമായി നിരക്ക് കുറയും.

എക്സ്പ്രസ് ആകുമെങ്കിലും സമയത്തിൽ കാര്യമായ മാറ്റം ഉണ്ടാകില്ലെന്നാണ് വിവരം. അങ്ങനെയെങ്കിൽ ടിക്കറ്റ് നിരക്ക് കുറയുന്നത് യാത്രക്കാർക്ക് ഏറെ പ്രയോജനകരമായി മാറും.

Also Read- വന്ദേഭാരത് സ്ലീപ്പർ എത്താൻ വൈകും? ഒക്ടോബറിൽ പുറത്തിറക്കുമെന്ന് വാഗ്ദാനം പാലിക്കാനാകാതെ റെയിൽവേ

തെക്ക് പടിഞ്ഞാറൻ റെയിൽവേയുടെ സമയക്രമത്തിലെ മാറ്റവും ട്രെയിനിന്റെ ശരാശരി വേഗം മണിക്കൂറിൽ 55 കിലോമീറ്ററിൽ താഴെ ആയതിനാലാണ് ബെംഗളൂരു-എറണാകുളം ഇന്റർസിറ്റിയെ സൂപ്പർ ഫാസ്റ്റ് വിഭാഗത്തിൽനിന്ന് എക്സ്പ്രസ് വിഭാഗത്തിലേക്ക് മാറ്റുന്നതെന്ന് റെയിൽവേ നേരത്തെ അറിയിച്ചിരുന്നു.

എക്സ്പ്രസ് സർവീസായി മാറുന്നതോടെ ബെംഗളൂരു– എറണാകുളം എക്സ്പ്രസിന്റെ 12677 എന്ന നമ്പറിനു പകരം 16377 ആകും പുതിയ നമ്പർ. എറണാകുളം – ബെംഗളൂരു എക്സ്പ്രസിന്റെ 12678 എന്ന നമ്പർ 16378 ആകും.

നിലവിൽ ബെംഗളുരുവിൽനിന്ന് രാവിലെ 6.10ന് എടുക്കുന്ന ട്രെയിൻ വൈകിട്ട് 4.55ന് എറണാകുളത്ത് എത്തും. എറണാകുളത്തുനിന്ന് ട്രെയിൻ രാവിലെ 9.10ന് എടുത്ത് രാത്രി ഒമ്പത് മണിയോടെ ബംഗളുരുവിൽ എത്തും.