തലയിൽ വയ്ക്കുന്നതിന് മുൻപ് ഈ കാര്യങ്ങൾ അറിഞ്ഞിരിക്കണം; ഹെൽമെറ്റ് വാങ്ങുമ്പോൾ ശ്രദ്ധിക്കേണ്ടത് ഇതൊക്കെ

ഇരുചക്രവാഹനമില്ലാത്തവർ കുറവാണ്. അതുകൊണ്ടു തന്നെ ഹെൽമെറ്റ് ഇല്ലാത്ത വീടുകളും കാണില്ല. പക്ഷെ ഈ പറയുന്ന ഹെൽമെറ്റ് എന്തൊക്കെ ശ്രദ്ധിച്ചാണ് വാങ്ങേണ്ടത് എന്ന് നിങ്ങൾക്ക് അറിയാമോ ? കടയിൽ കാണുന്ന ഏത് ഹെൽമെറ്റും അങ്ങനെ വിശ്വസിച്ച് വാങ്ങാൻ കഴിയില്ല. അതുപോലെ തന്നെ ഒരു ഹെൽമെറ്റ് എത്ര നാൾ ഉപയോഗിക്കാൻ കഴിയും എന്നും ആരും ചിന്തിച്ചിട്ടുണ്ടാവില്ല. പ്രമുഖ ഹെൽമെറ്റ് നിർമ്മാണ കമ്പനിയായ സ്റ്റീൽബേർഡിന്റെ എംഡി രാജീവ് കപൂർ ഇതുമായി ബന്ധപ്പെട്ട് ചില സുപ്രധാന വിവരങ്ങൾ വിശദീകരിക്കുകയാണ്.

ഹെൽമെറ്റ് മാറ്റിസ്ഥാപിക്കേണ്ട സന്ദർഭങ്ങൾ

ഹെൽമെറ്റ് ധരിച്ച് എപ്പോഴെങ്കിലും ഒരു അപകടം സംഭവിച്ചാൽ, അത് ഉടൻ മാറ്റി സ്ഥാപിക്കണം. കാരണം, അപകടം കാരണം ഹെൽമെറ്റിന്റെ ആന്തരിക ഭാഗങ്ങൾക്ക് കേടുപാടുകൾ സംഭവിക്കാൻ സാധ്യതയുണ്ട്. പലരും തകരാറുകൾ സെല്ലോ ടേപ്പ് ഉപയോഗിച്ച് ഒട്ടിക്കുകയോ പശ ഉപയോഗിച്ച് നന്നാക്കുകയോ ചെയ്യുകയാണ് പതിവെങ്കിലും, ഇത് ഒഴിവാക്കണം.

ALSO READ: വൃത്തി കൂടുതലാ: അമൃത് ഭാരത് എക്സ്പ്രെസിൽ ഉപയോഗിച്ച കണ്ടെയ്നറുകൾ കഴുകി വീണ്ടും ഭക്ഷണം വിതരണം ചെയ്യാൻ ഉപയോഗിച്ചെന്ന് പരാതി

ഹെൽമെറ്റിന്റെ വൈസറുകൾക്ക് വിള്ളൽ, തേയ്‌മാനം, പോറലുകൾ എന്നിവ സംഭവിക്കുകയാണെങ്കിൽ അല്ലെങ്കിൽ സുതാര്യത കുറയുകയാണെങ്കിൽ അത് മാറ്റിസ്ഥാപിക്കേണ്ടതാണ്. ഇത്തരം വൈസറുകൾ പകലും രാത്രിയിലും വെളിച്ചം വ്യാപിക്കാൻ കാരണമാവുകയും, കാഴ്ച കുറച്ച് അപകട സാധ്യത വർദ്ധിപ്പിക്കുകയും ചെയ്യും.

ഹെൽമെറ്റ് വാങ്ങുമ്പോൾ ശ്രദ്ധിക്കേണ്ട 4 പ്രധാന കാര്യങ്ങൾ

ഹെൽമെറ്റ് വാങ്ങുമ്പോൾ ഗുണനിലവാരവും പ്രവർത്തനക്ഷമതയും തീർച്ചയായും പരിശോധിക്കണം. പ്രധാനമായും 4 കാര്യങ്ങൾ ശ്രദ്ധിക്കണം:

1. ഹെൽമെറ്റിന്റെ പുറം രൂപകൽപ്പനയാണ് ഏറ്റവും ആദ്യം ശ്രദ്ധിക്കേണ്ടത്.
2. ഹെൽമെറ്റിന്റെ വിൻഡ്ഷീൽഡ് അഥവാ വൈസറിന്റെ നിലവാരം ഉറപ്പുവരുത്തണം. ബ്രാൻഡഡ് ഹെൽമെറ്റ് വൈസറുകൾ വിപണിയിൽ എളുപ്പത്തിൽ ലഭ്യമാണ്.
3. സ്ട്രാപ്പ് അല്ലെങ്കിൽ ബക്കിൾ ശക്തമായിരിക്കണം. നിലവാരം കുറഞ്ഞ സ്ട്രാപ്പുകൾ പൊട്ടിപ്പോകാൻ സാധ്യതയുണ്ട്.
4. ഹെൽമെറ്റ് വാങ്ങുമ്പോൾ, തെർമോകോൾ അമർത്തിനോക്കുക. നിങ്ങളുടെ വിരൽ അതിലേക്ക് തുളച്ചുകയറുന്നില്ലെന്ന് ഉറപ്പുവരുത്തണം.

ഐഎസ്ഐ അല്ലാത്ത ഹെൽമെറ്റുകൾ പൂർണ്ണമായും ഒഴിവാക്കണം. അത്തരം ഹെൽമെറ്റുകൾ വിൽക്കുന്നതായി ശ്രദ്ധയിൽപ്പെട്ടാൽ തീർച്ചയായും പരാതി നൽകണം. 500 രൂപയിൽ താഴെ വിലയുള്ള ഹെൽമെറ്റുകൾ സുരക്ഷിതമല്ല. അതിനാൽ ഹെൽമെറ്റ് വാങ്ങുമ്പോൾ ബ്രാൻഡഡ് ഉൽപ്പന്നങ്ങൾ തിരഞ്ഞെടുക്കണം.

ഹെൽമെറ്റിന്റെ വൈസറും ഐഎസ്ഐ നിലവാരം ഉള്ളതായിരിക്കണം. വൈസർ പൊട്ടിപ്പോകരുത് എന്നും അതിന് ‘ആക്ടിവിറ്റി കോട്ടിംഗ്’ ഉണ്ടായിരിക്കണം എന്നും ഐഎസ്ഐ മാനദണ്ഡം നിഷ്കർഷിക്കുന്നു.

ഹെൽമെറ്റ് വാങ്ങുമ്പോൾ വലുപ്പം പരിഗണിക്കുന്നത് ഉറപ്പുവരുത്തണം. നിങ്ങളുടെ തലയുടെ വലുപ്പം 58 സെൻറീമീറ്റർ ആണെങ്കിൽ, 60 സെൻറീമീറ്റർ ഹെൽമെറ്റ് വാങ്ങുന്നത് മികച്ച ഫിറ്റും സുഖസൗകര്യവും നൽകും. കാർബൺ ഫൈബർ ഹെൽമെറ്റുകളാണ് ഏറ്റവും ഭാരം കുറഞ്ഞതും ശക്തവുമായവ. എന്നാൽ ഇവയ്ക്ക് ഏകദേശം 15,000 രൂപ വരെ വിലവരാൻ സാധ്യതയുണ്ട്.