വെപ്പ് മീശ ഇളകിപ്പോയത് വേദിയിൽ വെച്ച്; അവിടെ വെച്ച് തന്നെ പശകൊണ്ട് ഒട്ടിച്ച് ബാലയ്യ; ​’ഗം ബാലയ്യ’ വീഡിയോ വൈറൽ

പല സിനിമാ നായകന്മാരും വിഗ്ഗ് ധരിക്കാറുണ്ടെന്ന് നമുക്കറിയാം. പലരും അവരുടെ കഥാപാത്രങ്ങൾക്കനുസരിച്ച് ആരാധകരെ ആകർഷിക്കാൻ ആണ് വിഗ്ഗ് ധരിക്കുന്നത്. എന്നിരുന്നാലും, രജനീകാന്തിനെപ്പോലുള്ള ചില നായകന്മാർ അത്തരം വിഗ്ഗുകൾ സിനിമകളിൽ മാത്രം പരിമിതപ്പെടുത്തുന്നു. യഥാർത്ഥ ജീവിതത്തിൽ, അവർ പ്രായമായവരെപ്പോലെ തന്നെയാണ് പെരുമാറുന്നത്. എന്നാൽ മറ്റു ചിലർ സിനിമകളിൽ മാത്രമല്ല, പുറത്തും വിഗ്ഗ് ധരിക്കുന്നത് കാണാൻ സാധിക്കും. പ്രായമാകുമ്പോഴും, ആരാധകർക്ക് മുന്നിൽ ഒരു യുവാവിനെ പോലെ തോന്നിക്കാൻ അവർ വ്യാജ മീശയും വിഗ്ഗും ധരിക്കുന്നു. അവയില്ലാതെ അവർ പുറത്തേക്ക് കാലുകുത്തുന്നില്ല. അത്തരത്തിൽ ഒരാളാണ് നന്ദമുരി ബാലകൃഷ്ണ എന്ന ബാലയ്യ. ഇപ്പോഴിതാ പൊതുവേദിയിൽ വെച്ച് നടന്റെ വെപ്പ് മീശ ഇളകി വന്ന സംഭവമാണ് സോഷ്യൽ മീഡിയയിൽ ട്രെൻഡിങ് ആകുന്നത്.

നടന്റെ പിറന്നാളിനോടനുബന്ധിച്ച് നടന്ന ഒരു ചടങ്ങിനിടെയാണ് വെപ്പ് മീശ ഇളകി വന്നത്. വേദിക്കുചുറ്റും തിങ്ങിനിറഞ്ഞ ആരാധകരിൽ ആവേശം നിറയ്ക്കുന്ന രീതിയിൽ സംസാരിക്കുകയായിരുന്നു നടൻ. ഇതിനിടെ വെപ്പുമീശ ഒരരികിൽ ഇളകിപ്പോവാൻ തുടങ്ങി. ഇക്കാര്യം ശ്രദ്ധയിൽപ്പെട്ട നടൻ യാതൊരു കൂസലുമില്ലാതെ വേദിയിൽ വെച്ച് തന്നെ മീശ പശവെച്ച് ഒട്ടിച്ചു. വീണ്ടും യാതൊന്നും സംഭവിക്കാത്ത പോലെയാണ് ബാലയ്യ പ്രസംഗം തുടർന്നത്. വീഡിയോ വൈറലായതിനു പിന്നാലെ ‘ഗം ബാലയ്യ’ എന്നാണ് സോഷ്യൽ മീഡിയ വിളിക്കുന്നത്.

ALSO READ: മണാലിയില്‍ സിപ് ലൈനിന്റെ കൊളുത്ത് പൊട്ടി പന്ത്രണ്ടുകാരി 30 അടി താഴ്ച്ചയിലേക്ക്; ഞെട്ടിക്കുന്ന വീഡിയോ പുറത്ത്

‘നമ്മളെല്ലാം തുറന്ന പുസ്തകങ്ങളാണെന്ന് എപ്പോഴും പറയുന്ന ബാലയ്യ.. എന്തിനാണ് ഇങ്ങനെ വ്യാജ മീശ ധരിച്ച് ചുറ്റിനടക്കുന്നത്?’, ‘സിനിമകളിൽ ഇത് അനിവാര്യമാണ്.. പക്ഷേ യഥാർത്ഥ ജീവിതത്തിൽ നമുക്ക് സ്വാഭാവികമായി ജീവിക്കാൻ കഴിയും, അല്ലേ?’ എന്നിങ്ങനെയാണ് നെറ്റിസൺമാരുടെ കമന്റുകൾ.