നടനും സംവിധായകനുമായ ബേസിൽ ജോസഫ് ആണ് ഒരു ഇടവേളയ്ക്ക് ശേഷം വീണ്ടും സോഷ്യൽ മീഡിയയിൽ വൈറലായിക്കൊണ്ടിരിക്കുന്നത്. കൈരളി ടി വിയുടെ അശ്വമേധത്തിൽ പങ്കെടുത്ത പഴയ വീഡിയോയാണ് ഇപ്പോൾ വൈറൽ. ട്രോള്‍ പേജുകളിലെല്ലാം ‘കുട്ടി ബേസില്‍’ താരമായി. നിരവധിപ്പേരാണ് കമന്റുമായി എത്തിയത്. എന്നാൽ എല്ലാവരും ആകാംക്ഷയോടെ കാത്തിരുന്നത് ടൊവിനോ തോമസ് എന്ത് പറയും എന്നാണ്. ഇപ്പോഴിതാ ടൊവിനോ തോമസും കമന്റ് പങ്കുവച്ചിരിക്കുകയാണ്.
കൈയില്‍ ഒരു ഗിറ്റാറും പിടിച്ച് നില്‍ക്കുന്ന തന്റെ ചിത്രമാണ് ബേസിൽ ജോസഫ് പോസ്റ്റ് ചെയ്തത്. ‘അശ്വമേധം മാത്രമല്ല, ലേശം സംഗീതവും വശമുണ്ടായിരുന്നു ഗയ്‌സ്’ എന്നാണ് അദ്ദേഹം ഈ ചിത്രത്തിനൊപ്പം കുറിച്ചത്. ഇതിന് താഴെ ഒട്ടേറെപ്പേരാണ് രസകമായ കമന്റുകള്‍ പങ്കുവെച്ചിരിക്കുന്നത്.
പോസ്റ്റിന് താഴെ കമന്റിടാന്‍ ടൊവിനോയെ ഒട്ടേറെപ്പേര്‍ ടാഗും ചെയ്തിട്ടുണ്ട്. അധികം വൈകാതെ പ്രതികരണവുമായി ടൊവിനോ തന്നെയെത്തി. ‘സ്വയം കീഴടങ്ങിയാൽ വെറുതെ വിടുമെന്ന് കരുതിയോ കുഞ്ഞേ?’ എന്നാണ് താരം കമന്റ് ചെയ്തത്.
അപ്പൊ ഒരു പാട്ടുകൂടി വരാൻ ഉണ്ടെന്ന് മനസ്സിൽ ആയി… കൊച്ചു ടീവിൽ ആണോ എന്നാണ് നടനും തിരക്കഥാകൃത്തുമായ സിജു സണ്ണി ചോദിച്ചത്. അറിഞ്ഞില്ല… ആരും ഒന്നും പറഞ്ഞില്ല എന്നായിരുന്നു സുരേഷ് കൃഷ്ണയുടെ കമന്റ്. വേടന് മുൻപേ വയനാടൻ എന്ന് സുരഭി ലക്ഷ്മി പറഞ്ഞു. ഞെട്ടിച്ചെന്നായിരുന്നു സംവിധായകൻ ഡിജോ ജോസ് ആന്റണിയുടെ പ്രതികരണം.
അഭിനേതാക്കളായ ബിനു പപ്പു, നൈല ഉഷ, രജിഷ വിജയൻ, സംവിധായകൻ ജിതിൻ ലാൽ എന്നിവരും ബേസിൽ ജോസഫിന് പ്രോത്സാഹനവുമായെത്തി.
അതേസമയം, സോഷ്യല്‍മീഡിയയില്‍ വൈറലായ ബേസില്‍ ജോസഫിന്റെ പഴയ അശ്വമേധം വീഡിയോയില്‍ കൈരളി ചാനലിന് ‘നന്ദി’ പറഞ്ഞ് അദ്ദേഹത്തിന്റെ സഹോദരി രംഗത്തെത്തി. കുറേകാലമായി ഈ വീഡിയോ തപ്പുന്നുവെന്നും വീഡിയോ കുത്തിപ്പൊക്കിത്തന്ന കൈരളിക്ക് അഗാധമായ നന്ദി രേഖപ്പെടുത്തുന്നുവെന്നും സഹോദരി ഷിൻസി ജോബി സോഷ്യല്‍മീഡിയയില്‍ കുറിച്ചു.
വയനാട് നടന്ന അശ്വമേധം മെഗാ ഷോയിലാണ് ബേസിൽ പങ്കെടുത്തത്. അന്ന് ഒന്‍പതാം ക്ലാസില്‍ പഠിക്കുന്ന ബേസിലിൻ്റെ പ്രായം 14. ബേസിൽ മനസ്സിൽ കണ്ട ആളുടെ പേര് പറയാൻ ജി എസ് പ്രദീപിന് 17 ചോദ്യങ്ങൾ വേണ്ടിവന്നു. അത്രയൊന്നും എളുപ്പത്തിൽ ബേസിൽ പിടികൊടുക്കാതെ മുന്നോട്ട് പോയത് കാണികളെയും അമ്പരപ്പിച്ചു. ഇന്ത്യകണ്ട മഹാനായ നര്‍ത്തകന്‍ ഉദയശങ്കര്‍ജിയെയായിരുന്നു അന്ന് ബേസിൽ മനസ്സിൽ കണ്ടത്.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
