അവധിക്കാലത്ത് ജീവിതപാഠങ്ങൾ പഠിക്കാൻ കുരുന്നുകൾ; കൊടുങ്ങല്ലൂരിൽ വഴിയോരക്കച്ചവടം തുടങ്ങി കുട്ടിപ്പട്ടാളം

മൊബൈൽ ഫോണുകൾക്കും വീഡിയോ ഗെയിമുകൾക്കും അവധി നൽകി, വേനലവധിക്കാലം അൽപ്പം വ്യത്യസ്തമായി ആഘോഷിക്കുകയാണ് കൊടുങ്ങല്ലൂരിൽ നിന്നുള്ള ഒരു പറ്റം വിദ്യാർഥികൾ. കളികൾക്കൊപ്പം ചെറിയൊരു വരുമാനവും, ഒപ്പം പുതിയ ജീവിത പാഠങ്ങളും പഠിക്കാൻ തെരുവോരങ്ങളിൽ കൊച്ചു കടകൾ തുടങ്ങിയിരിക്കുകയാണ് കുട്ടിപ്പട്ടാളം

കത്തുന്ന വേനൽച്ചൂടിനെ വകവെക്കാതെ വഴിയരികിലെ കച്ചവടം പൊടിപൊടിക്കുകയാണ്. അവധിക്കാലം വെറുതെ വീട്ടിലിരുന്ന് ബോറടിക്കാതെ, കൂട്ടുകാരുമൊത്ത് രസകരമായി ചെലവഴിക്കുക എന്നതാണ് ഇവരുടെ പ്രധാന ലക്ഷ്യം. ഒപ്പം സ്വന്തമായി അധ്വാനിച്ച് ചെറിയൊരു പോക്കറ്റ് മണി കണ്ടെത്താനും ഇവർക്ക് കഴിയുന്നു. വിവിധ തരം മിഠായികൾ, ദാഹമകറ്റാൻ ശീതളപാനീയങ്ങൾ തുടങ്ങിയവയാണ് പ്രധാന വിഭവങ്ങൾ. കച്ചവടത്തിന്റെ ബാലപാഠങ്ങൾ പഠിക്കുന്ന ഈ കുട്ടികൾക്ക് വിലപേശാനും സാധനങ്ങൾ വിൽക്കാനുമൊക്കെ പ്രത്യേക മിടുക്ക് തന്നെയുണ്ട്.

Also read: വെയില് കണ്ട് പേടിക്കേണ്ട… മഴ വരുന്നുണ്ട്; ഇന്ന് ഏഴ് ജില്ലകളിൽ യെല്ലോ അലേർട്ട്

വലിയ കടകളിൽ നിന്നും സാധനങ്ങൾ വാങ്ങുന്നതിനേക്കാൾ കുട്ടികളിൽ നിന്ന് സാധനങ്ങൾ വാങ്ങാൻ യാത്രക്കാരും നാട്ടുകാരും ഏറെ താല്പര്യം കാണിക്കുന്നുണ്ട്. കുട്ടികളുടെ ഈ കൊച്ചു സംരംഭത്തിന് മികച്ച പ്രോത്സാഹനമാണ് ലഭിക്കുന്നത്. പണത്തിന്റെ മൂല്യം മനസ്സിലാക്കാനും, അപരിചിതരോട് സംസാരിച്ച് ആശയവിനിമയ ശേഷി വർദ്ധിപ്പിക്കാനും ഇത്തരം അനുഭവങ്ങൾ കുട്ടികളെ ഏറെ സഹായിക്കുമെന്ന് രക്ഷിതാക്കളും പറയുന്നു. സുരക്ഷ ഉറപ്പാക്കി രക്ഷിതാക്കളുടെ പൂർണ്ണ പിന്തുണയോടെയാണ് പലയിടത്തും ഇത്തരം കച്ചവടങ്ങൾ നടക്കുന്നത്… .