ഓവനൊന്നും വേണ്ടന്നേ! ദേ കുക്കറിലുണ്ടാക്കാം നല്ല കലകലക്കൻ കേക്ക്

കേക്ക് ഇഷ്ടമല്ലാത്താവരായി ആരാണുള്ളതല്ലേ? പ്രത്യേകിച്ച് കുട്ടികൾ… പക്ഷേ കുട്ടികൾക്ക് കേക്ക് വീട്ടിൽ ഉണ്ടാക്കി കൊടുക്കുന്നവർ വളരെ വിരളമായിരിക്കും. കാരണം മറ്റൊന്നുമല്ല, കേക്ക് ഉണ്ടാക്കാൻ മൈക്രോവേവ് ഓവൻ വേണം എന്നത് തന്നെ കാരണം. ഇതേ കാരണം കൊണ്ടാണോ നിങ്ങളും വീട്ടിൽ കേക്ക് ഉണ്ടാക്കി നോക്കാത്തത്. എങ്കിലിനി ഒട്ടും വെച്ച് താമസിപ്പിക്കേണ്ട അടുക്കളയിൽ പോയി കുക്കറെടുത്തോ..കുക്കറിൽ കേക്ക് ഉണ്ടാക്കാമോ? എന്നാണോ ചോദ്യം? എങ്കിൽ കേട്ടോളൂ…കുക്കറിലും നല്ല കലകലക്കൻ കേക്ക് ഉണ്ടാക്കിയെടുക്കാം, അതെങ്ങനെയെന്ന് നോക്കാ….

ആവശ്യമായ ചേരുവകൾ:

മൈദ- ഒരു കപ്പ്
കോൺഫ്ളവർ- രണ്ട് ടേബിൾസ്പൂൺ
ബേക്കിങ് പൗഡർ- ഒരു ടീസ്പൂൺ
മുട്ട- 3 എണ്ണം
പഞ്ചസാര- മുക്കാൽ കപ്പ്
ഉരുക്കിയ ബട്ടർ / റിഫൈൻഡ് ഓയിൽ – അര കപ്പ്
പാൽ– 3 ടേബിൾ സ്പൂൺ
വാനില എസൻസ്– ഒരു ടീസ്പൂൺ
ഉപ്പ്- ഒരു നുള്ള്

ALSO READ: ചപ്പാത്തിക്കും അപ്പത്തിനും ഈ കിടിലൻ സോയ ചങ്ക്സ് കറി തന്നെ ബെസ്റ്റ്!

തയാറാക്കുന്ന വിധം:

ആദ്യമായി മൈദ, കോൺഫ്ലവർ, ബേക്കിങ് പൗഡർ, ഉപ്പ് എന്നിവ ഒന്നിച്ചാക്കി ഒരു അരിപ്പയിൽ കൂടി രണ്ടോ മൂന്നോ തവണ ഇടഞ്ഞ് എടുത്ത് മാറ്റിവെക്കണം. ഇനി ഒരു മിക്സിയുടെ ജാറിലേക്ക് മുട്ട, പഞ്ചസാര, ഉരുക്കിയ ബട്ടർ, പാൽ, വാനില എസൻസ് എന്നിവ ചേർത്ത് അടിച്ചെടുക്കണം. ഇതിലേക്ക് മുൻപ് അരിച്ചെടുത്ത് മാറ്റിവെച്ചിരിക്കുന്ന പൊടി കൂടി ചേ‍ർത്ത് അരിപ്പ് ഉപയോ​ഗിച്ച് ഒന്നുകൂടി അരിച്ചെടുക്കണം. അടുത്തതായി ഒരു പ്രഷർ കുക്കറിൽ അൽപ്പം ബട്ടർ പുരട്ടി മൈദ പൊടി വിതറി ഒരു ബട്ടർ പേപ്പറോ, അലൂമിനിയം ഫോയിലോ വൃത്താകൃതിയിൽ മുറിച്ച് കുക്കറിനുള്ളിൽ വെക്കുക. ഇനി തയാറാക്കിയ മാവ് കുക്കറിലേക്ക് ഒഴിക്കുക. ഇനി കുക്ക‍ർ അടക്കാം. ഒരു കാര്യം പ്രത്യേകം ശ്രദ്ധിക്കേണ്ടത് വിസിൽ മാറ്റിയതിനുശേഷം വേണം കുക്കർ അടയ്ക്കാൻ എന്നതാണ്. മറ്റൊരു കാര്യം
ഒരു ദോശക്കല്ലോ, ഫ്രൈ പാനോ അടുപ്പിൽ വച്ച് ചൂടാക്കി അതിനു മുകളിലേക്ക് പ്രഷർകുക്കർ വയ്ക്കണം എന്നതാണ്. ഇത്തരത്തിൽ രണ്ട് മിനിറ്റ് തീ കൂട്ടി വച്ചതിനുശേഷം തീ കുറയ്ക്കണം. ചെറിയ ചൂടിൽ 35 മുതൽ 45 മിനിറ്റ് വരെ വരെ വേവിച്ചെടുക്കണം. നന്നായി ചൂടാറിയതിനു ശേഷം മാത്രമേ കേക്ക് കുക്കറിൽ നിന്നും ഇളക്കി എടുക്കാവൂ എന്നതും ശ്രദ്ധ വേണം. ഇതോടെ നല്ല സോഫ്റ്റ് കുക്ക‍ർ കേക്ക് റെഡി.