ടി20 റെക്കോർഡുകൾ തകർത്തെറിഞ്ഞ് ക്വിന്റൺ ഡി കോക്ക്; വിൻഡീസിനെതിരായ പരമ്പര ദക്ഷിണാഫ്രിക്കയ്ക്ക്

വെസ്റ്റ് ഇൻഡീസിനെതിരായ രണ്ടാം ടി20 അന്താരാഷ്ട്ര മത്സരത്തിൽ റെക്കോർഡുകളുടെ മഴ പെയ്യിച്ച് ദക്ഷിണാഫ്രിക്കൻ സൂപ്പർതാരം ക്വിന്റൺ ഡി കോക്ക്. സെഞ്ചൂറിയനിലെ സൂപ്പർസ്പോർട് പാർക്കിൽ നടന്ന മത്സരത്തിൽ, ഡി കോക്കിന്റെയും റയാൻ റിക്കെൽട്ടന്റെയും തകർപ്പൻ ബാറ്റിംഗിന്റെ കരുത്തിൽ വെസ്റ്റ് ഇൻഡീസിനെ ഏഴ് വിക്കറ്റിന് തോൽപ്പിച്ച ദക്ഷിണാഫ്രിക്ക പരമ്പര 2-0ന് സ്വന്തമാക്കി.

ടോസ് നേടി ബാറ്റിംഗിനിറങ്ങിയ വെസ്റ്റ് ഇൻഡീസ്, ഷിമ്രോൺ ഹെറ്റ്‌മയർ (75)യും ഷെർഫെയ്ൻ റതർഫോർഡ് (57*)യും നടത്തിയ മികച്ച പ്രകടനത്തിന്റെ സഹായത്തോടെ 20 ഓവറിൽ 221/4 എന്ന ശക്തമായ സ്കോർ നേടി.എന്നാൽ ഈ ലക്ഷ്യം ദക്ഷിണാഫ്രിക്കയ്ക്ക് വെല്ലുവിളിയായില്ല. ക്വിന്റൺ ഡി കോക്ക് വെറും 49 പന്തുകളിൽ ആറു ഫോറുകളും 10 സിക്‌സുകളും ഉൾപ്പെടെ 115 റൺസ് നേടി വെടിക്കെട്ട് സെഞ്ചുറി കുറിച്ചു. 43 പന്തിൽ നേടിയ ഈ സെഞ്ചുറി ദക്ഷിണാഫ്രിക്കയുടെ ടി20 അന്താരാഷ്ട്ര ചരിത്രത്തിലെ മൂന്നാമത്തെ വേഗമേറിയ സെഞ്ചുറിയായിരുന്നു. മറുവശത്ത്, റയാൻ റിക്കെൽട്ടൻ 36 പന്തിൽ 77 റൺസ് നേടി പുറത്താകാതെ നിന്നു. ഇരുവരും ചേർന്ന് 72 പന്തിൽ 162 റൺസാണ് കൂട്ടിച്ചേർത്തത്.

Also Read: സഞ്ജു തന്റെ ശരിയായ റിതം കണ്ടെത്താനുള്ള ശ്രമത്തിൽ എന്ന് ബാല്യകാല പരിശീലകൻ

ഈ ഇന്നിംഗ്സോടെ ഡി കോക്ക് ടി20 ക്രിക്കറ്റിൽ 12,000 റൺസ് പിന്നിട്ടു. 430 മത്സരങ്ങളിൽ നിന്ന് 12,113 റൺസാണ് അദ്ദേഹത്തിന്റെ സമ്പാദ്യം. ടി20 ചരിത്രത്തിൽ ഈ നേട്ടം കൈവരിക്കുന്ന 11-ാമത്തെ ബാറ്ററാണ് അദ്ദേഹം. കൂടാതെ, വിക്കറ്റ് കീപ്പറായി ടി20യിൽ എട്ട് സെഞ്ചുറികൾ നേടിയ ആദ്യ താരമെന്ന റെക്കോർഡും ഡി കോക്ക് സ്വന്തമാക്കി. ടി20 അന്താരാഷ്ട്ര ക്രിക്കറ്റിൽ, 101 മത്സരങ്ങളിൽ നിന്ന് 2,886 റൺസാണ് ഡി കോക്ക് നേടിയിരിക്കുന്നത്. ദക്ഷിണാഫ്രിക്കയുടെ അന്താരാഷ്ട്ര ടി20 ചരിത്രത്തിലെ ഏറ്റവും കൂടുതൽ റൺസ് നേടിയ താരവുമാണ് ഡി കോക്ക്.