സഞ്ജുവിന്റെ ക്യാച്ച് വിട്ടത് വലിയ പിഴവ്! സെമി തോൽവിക്ക് പിന്നാലെ ബ്രൂക്കിന്റെ തുറന്നുപറച്ചിൽ

ഐസിസി പുരുഷ ടി20 ലോകകപ്പ് സെമിഫൈനലിൽ ഇന്ത്യയോട് തോറ്റതിന് പിന്നാലെ തന്റെ പിഴവ് ഏറ്റുപറഞ്ഞു ഇംഗ്ലണ്ട് നായകൻ ഹാരി ബ്രൂക്ക്. ഇന്ത്യൻ താരം സഞ്ജു സാംസണിന്റെ ക്യാച്ച് നഷ്ടപ്പെടുത്തിയതാണ് മത്സരത്തിന്റെ വഴിത്തിരിവായതെന്ന് ബ്രൂക്ക് പറഞ്ഞു. “സാംസന്റെ ക്യാച്ച് നഷ്ടപ്പെടുത്തിയത് വലിയ പിഴവായിരുന്നു. ഇത്തരം മത്സരങ്ങളിൽ ക്യാച്ചുകൾ ജയവും തോൽവിയും നിർണയിക്കും,” എന്നായിരുന്നു ബ്രൂക്കിന്റെ പ്രതികരണം.

വാങ്കഡെ സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ഇന്ത്യ 20 ഓവറിൽ 7 വിക്കറ്റ് നഷ്ടത്തിൽ 253 റൺസ് നേടി. ഈ ഭീമൻ സ്കോറിന് അടിത്തറയിട്ടത് സഞ്ജു സാംസണിന്റെ തകർപ്പൻ ഇന്നിംഗ്സായിരുന്നു. വെറും 42 പന്തിൽ 89 റൺസ് നേടിയ സാംസൺ ഇന്ത്യയെ ശക്തമായ നിലയിലേക്കെത്തിച്ചു.

എന്നാൽ മത്സരത്തിന്റെ മൂന്നാം ഓവറിൽ സാംസൺ 15 റൺസിൽ നിൽക്കുമ്പോൾ ജോഫ്ര ആർചറിന്റെ പന്തിൽ ബ്രൂക്ക് നിസ്സാരമായ ഒരു ക്യാച്ച് കൈവിട്ടു. പിന്നീട് അതേ അവസരം ഉപയോഗിച്ച സാംസൺ അതിവേഗം റൺസുകൾ നേടുകയും ഇംഗ്ലണ്ടിന്റെ ബൗളർമാരെ സമ്മർദ്ദത്തിലാക്കുകയും ചെയ്തു. ഈ പിഴവാണ് മത്സരഫലം നിർണയിച്ചതെന്ന് ബ്രൂക്ക് സമ്മതിച്ചു.

Also Read: യൂറോപ്യൻ ടി20 ലീഗിൽ ഇന്ത്യൻ പവർ! ടീം വാങ്ങാൻ ഒരുങ്ങി ദ്രാവിഡും അശ്വിനും

253 റൺസ് പിന്തുടർന്ന ഇംഗ്ലണ്ട് ശക്തമായി പോരാടിയെങ്കിലും ലക്ഷ്യത്തിലെത്താനായില്ല. അവസാനത്തിൽ ഏഴ് റൺസിന് ഇന്ത്യ വിജയം നേടി ഫൈനലിലേക്ക് മുന്നേറി. ഇംഗ്ലണ്ടിനായി ജേക്കബ് ബെഥൽ സെഞ്ചുറിയോടെ മികച്ച പ്രകടനം നടത്തിയെങ്കിലും അത് ടീമിനെ രക്ഷിക്കാൻ മതിയായില്ല.