പത്താം ക്ലാസുണ്ടെങ്കിൽ കൊച്ചിൻ ഷിപ്പ്‌യാർഡിൽ ഡ്രൈവറാകാം

കൊച്ചിൻ ഷിപ്പ്‌യാർഡ് ലിമിറ്റഡിൽ (CSL) ഡ്രൈവർ (സ്റ്റാഫ് കാർ) തസ്തികയിൽ നിയമനം നടത്തുന്നു. പത്താം ക്ലാസ് യോഗ്യതയുള്ളവർക്ക് ആണ് അവസരം. കരാർ അടിസ്ഥാനത്തിൽ ആണ് നിയമനം. താല്പര്യമുള്ള ഉദ്യോഗാർഥികൾക്ക് ജൂൺ 9 വരെ ഓൺലൈനായി അപേക്ഷിക്കാം. പത്താം ക്ലാസ് ആണ് വിദ്യാഭ്യാസ യോ​ഗ്യത.

ഉ​ദ്യോ​ഗാ‌ർത്ഥികൾക്ക് സാധുവായ ലൈറ്റ് മോട്ടോർ വെഹിക്കിൾ (LMV) ഡ്രൈവിംഗ് ലൈസൻസ് ഉണ്ടായിരിക്കണം. ഡ്രൈവർ എന്ന നിലയിൽ കുറഞ്ഞത് 10 വർഷത്തെ പ്രവൃത്തിപരിചയവും വേണം. ഇതിൽ കുറഞ്ഞത് 1 വർഷമെങ്കിലും കേന്ദ്ര/സംസ്ഥാന പൊതുമേഖലാ സ്ഥാപനങ്ങളിലെ (CPSEs/PSUs) അല്ലെങ്കിൽ കേന്ദ്ര/സംസ്ഥാന സർക്കാർ വകുപ്പുകളിലെ ഉയർന്ന ഉദ്യോഗസ്ഥരുടെ സ്റ്റാഫ് കാർ ഡ്രൈവറായി ജോലി ചെയ്ത പരിചയം ഉണ്ടായിരിക്കണം. പരമാവധി പ്രായം 55 വയസ്സ് ആണ്. പ്രതിമാസം 27,000 രൂപ ശമ്പളം ലഭിക്കും.

ALSO READ; പത്താം ക്ലാസ് കഴിഞ്ഞോ ? പ്ലസ് വൺ പ്രവേശനത്തിനായി അപേക്ഷിക്കുമ്പോൾ ഇക്കാര്യങ്ങൾ ശ്രദ്ധിക്കണേ

യോഗ്യരായ ഉദ്യോഗാർഥികളെ പ്രാക്ടിക്കൽ ടെസ്റ്റ് (100 മാർക്ക്) അടിസ്ഥാനമാക്കിയായിരിക്കും തെരഞ്ഞെടുക്കുന്നത്. ഉദ്യോഗാർഥികൾ കൊച്ചിൻ ഷിപ്പ്‌യാർഡിന്റെ ഔദ്യോഗിക വെബ്‌സൈറ്റ് സന്ദർശിച്ച് ഓൺലൈനായി വേണം അപേക്ഷ സമർപ്പിക്കാൻ. ഫോട്ടോ, ഒപ്പ്, യോഗ്യത തെളിയിക്കുന്ന സർട്ടിഫിക്കറ്റുകൾ എന്നിവ നിർദ്ദിഷ്ട ഫോർമാറ്റിൽ അപ്‌ലോഡ് ചെയ്യേണ്ടതാണ്. ഫീസ് അടയ്‌ക്കേണ്ട വിഭാഗത്തിലുള്ളവർ ഓൺലൈനായി തുക അടച്ച് അപേക്ഷ നൽകാം.