‘ചെയ്യണമെന്ന് ഒരുപാട് ആഗ്രഹിച്ച സിനിമ’; ‘ആക്ഷൻ ഹീറോ ബിജു 2’വിന്റെ ഷൂട്ടിങ് പാതിയിൽ നിർത്താനുള്ള കാരണം പറഞ്ഞ് എബ്രിഡ് ഷൈൻ

നടൻ നിവിൻ പോളിയുടെ മികച്ച പൊലീസ് കഥാപാത്രമാണ് ‘ആക്ഷൻ ഹീറോ ബിജു 2’വിലെ ബിജു പൗലോസ് എന്നത്. മലയാളികൾക്ക് മുന്നിൽ മറ്റൊരു മുഖം തന്നെ ആണ് നിവിൻ പോളി ആ ചിത്രത്തിലൂടെ കാണിച്ചുതന്നത്. എബ്രിഡ് ഷൈൻ ഒരുക്കിയ ഹിറ്റ് ചിത്രത്തിന്റെ രണ്ടാം ഭാഗവും പ്രഖ്യാപിച്ചിരുന്നു. എന്നാൽ ഒരു ഷെഡ്യൂളിന് ശേഷം സിനിമ ചിത്രീകരണം നിർത്തിവെക്കുകയായിരുന്നു. ഇപ്പോഴിതാ ചിത്രം വൈകുന്നതിനുള്ള കാരണം വെളിപ്പെടുത്തിയിരിക്കുകയാണ് സംവിധായകൻ.

‘ആക്ഷൻ ഹീറോ ബിജു 2 ചിത്രം ഞങ്ങൾ തുടങ്ങിയതാണ്. പക്ഷേ ചില സാങ്കേതിക പ്രശ്നങ്ങൾ ആ ചിത്രത്തിന് സംഭവിച്ചു. ആ ചിത്രം ഇങ്ങനെ നിൽക്കുവാണ്. ഞാൻ ചെയ്യണമെന്ന് ഒരുപാട് ആഗ്രഹിച്ച സിനിമയാണ് അത്. ഇനി അത് എപ്പോഴെങ്കിലും സംഭവിക്കും എന്ന് പ്രതീക്ഷിക്കുന്നു’ എന്നാണ് എബ്രിഡ് ഷൈൻ പറഞ്ഞത്.

ALSO READ: വാലന്റൈൻ വീക്കിൽ ഒടിടിയിലേക്കെത്തുക കിടിലൻ സിനിമകൾ: അറിയാം പുതിയ റിലീസുകൾ

നിവിൻ പോളിയും പി എസ് ഷംനാസും ചേർന്നായിരുന്നു ചിത്രത്തിന്റെ രണ്ടാം ഭാഗം നിർമിക്കാനിരുന്നത്. 2016 ഫെബ്രുവരി നാലിനായിരുന്നു ആക്ഷൻ ഹീറോ ബിജു റിലീസ് ചെയ്തത്. ഒരു പൊലീസ് സ്റ്റേഷനിൽ നടക്കുന്ന സാധാരണവും അസാധാരണവുമായ സംഭവങ്ങളെ വളരെ റിയലിസ്റ്റിക്കായി ഈ ചിത്രത്തിലൂടെ കാണാൻ സാധിച്ചിരുന്നു. അത് തന്നെ ആണ് ചിത്രം പ്രേക്ഷകർ ഏറ്റെടുക്കാൻ കാരണവും. അന്ന് മുതൽ തുടങ്ങിയതാണ് ചിത്രത്തിന്റെ രണ്ടാം ഭാഗത്തിനായുള്ള ആരാധകരുടെ കാത്തിരിപ്പ്.