‘സ്റ്റുഡൻ്റ് ഓഫ് ദി ഇയറിലെ’ സഹനടൻ കൊക്കെയ്നുമായി ചെന്നൈ വിമാനത്താവളത്തില്‍ പിടിയില്‍

സംവിധായകൻ കരണ്‍ ജോഹറിൻ്റെ ‘സ്റ്റുഡൻ്റ് ഓഫ് ദി ഇയര്‍’ സിനിമയില്‍ അഭിനയിച്ച നടൻ വിഷാല്‍ ബ്രഹ്മ 3.5 കിലോ കൊക്കെയ്നുമായി ചെന്നൈ വിമാനത്താവളത്തില്‍ പിടിയില്‍. ഈ കൊക്കെയ്നിന് 35 കോടി വിലമതിക്കുമെന്ന് പൊലീസ് പറയുന്നു.
തൻ്റെ ബാഗില്‍ തന്നെയാണ് കൊക്കെയ്ൻ ഒളിപ്പിച്ചിരുന്നത്.

കരൺ ജോഹറിന്റെ ‘സ്റ്റുഡൻ്റ്സ് ഓഫ് ദി ഇയര്‍’ സിനിമയിൽ സഹകഥാപാത്രമായിരുന്നു. സിംഗപ്പൂരില്‍ നിന്ന് വരവേയാണ് എയർ ഇന്റലിജൻസ് വിഭാഗം അദ്ദേഹത്തെ പരിശോധിച്ച് മയക്കുമരുന്ന് കണ്ടെത്തിയത്. പരിശോധനയിൽ ലഭിച്ച പൊടി പോലെയുള്ള പദാർത്ഥം കൊക്കെയ്ൻ ആണെന്ന് സ്ഥിരീകരിക്കപ്പെട്ടിട്ടുണ്ട്. ചെന്നൈ കസ്റ്റംസ് വിഭാഗവും റവന്യു ഇന്റലിജൻസ് വിഭാഗവുമായുള്ള സംയുക്ത പരിശോധനയ്ക്കിടെയാണ് വിശാല്‍ പിടിയിലായത്.

ALSO READ: മമ്മൂട്ടിയെ കണ്ട് ഓടിയെത്തി അനുരാഗ് കശ്യപ്: ‍വൈറലായി വീഡിയോ

സിംഗപ്പൂർ വിമാനത്താവളത്തിൽ വെച്ച് ഒരാളെ കണ്ടുമുട്ടിയെന്നും അദ്ദേഹം നൽകിയ ബാഗ് ചെന്നൈയിൽ വെച്ച് മറ്റൊരാൾക്ക് കൈമാറണമെന്ന് പറഞ്ഞുവെന്ന് നടൻ കസ്റ്റംസിന് മൊ‍ഴി നല്‍കി. എന്നാൽ ഉദ്യോഗസ്ഥർ ഈ മൊ‍ഴി വിശ്വാസത്തിലെടുത്തിട്ടില്ല. ഡൽഹിയിലോ മുംബൈയിലോ പ്രവർത്തിക്കുന്ന മയക്കുമരുന്ന് ശൃംഖലയുമായി വിശാലിന് ബന്ധമുണ്ടെന്നാണ് കസ്റ്റംസ് വിശ്വസിക്കുന്നത്.ദേശീയ മാധ്യമങ്ങള്‍ റിപ്പോർട്ട് ചെയ്‌തതനുസരിച്ച്, സാമ്പത്തിക ബുദ്ധിമുട്ടിലായ ബ്രഹ്മയെ ഡൽഹിയിലെ സുഹൃത്തുക്കൾ നൈജീരിയൻ മയക്കുമരുന്ന് സംഘത്തിലെ അംഗത്തെ പരിചയപ്പെടുത്തുകയും, കമ്പോഡിയയിലേക്കുള്ള ഹോളിഡേയും ലക്ഷക്കണക്കിന് രൂപയും വാഗ്ദാനം ചെയ്യുകയും ചെയ്തിരുന്നു. അതിൻ്റെ ഭാഗമായാണ് ഈ യാത്രയെന്ന് കരുതപ്പെടുന്നുണ്ട്.

അതേസമയം, കസ്റ്റംസ് വിഭാഗം നടന്റെ യാത്രാ ചരിത്രം പരിശോധിച്ച് മുമ്പ് ഇത്തരത്തിൽ മയക്കുമരുന്ന് കടത്തൽ നടത്തിയിട്ടുണ്ടോ എന്നതിലേക്കുള്ള അന്വേഷണം തുടങ്ങി. കേന്ദ്ര വരുമാന ബോർഡ് ഇന്റലിജൻസ് വിഭാഗം വലിയതോതിൽ നടക്കുന്ന മയക്കുമരുന്ന് ശൃംഖലയെ സംബന്ധിച്ച അന്വേഷണം ആരംഭിച്ചു. അതിനിടെ, ജൂലൈ 2025-ൽ ദോഹയിൽ നിന്ന് മുംബൈയിലേക്ക് എത്തിയ ഒരു ഇന്ത്യൻ സ്ത്രീയുടെ ബാഗിൽ നിന്നുമാണ് ₹62.6 കോടി വില വരുന്ന കൊക്കെയ്ൻ പിടിച്ചെടുത്തത്. ഓറിയോ ബോക്‌സുകളിലും ചോക്ലേറ്റ് പാക്കറ്റുകളിലും ഒളിപ്പിച്ച നിലയിലായിരുന്നു ഇവ, ആകെ 300 ക്യാപ്‌സൂളുകൾ. ഈ സംഭവങ്ങൾ അന്താരാഷ്ട്ര തലത്തിൽ നിന്നുള്ള മയക്കുമരുന്ന് കച്ചവട ശൃംഖലകളുടെ ഇന്ത്യയിലേക്കുള്ള കടന്നുകയറ്റം സംബന്ധിച്ച് ഉണർത്തുന്ന അപായസൂചനകളാണ്.