‘ഞാൻ എങ്ങനെ ഒരു സ്റ്റാർ ആയി മാറി എന്നത് എനിക്ക് അറിയില്ല’. ഇത് പറയുന്നത് മറ്റാരുമല്ല. ബോളിവുഡിലെ “മിസ്റ്റർ പെർഫെക്ഷനിസ്റ്റ്” എന്ന് അറിയപ്പെടുന്ന ആമിർ ഖാനാണ്. എന്ത് ചെയ്താലും ആമിർ അതിന് പൂർണ്ണതയോടെയാണ് ചെയ്യാറുള്ളത്. ഏത് കഥാപാത്രങ്ങള് ചെയ്താലും സൂക്ഷ്മമായ വിശദാംശങ്ങളിലേക്ക് ശ്രദ്ധ പുലർത്തി സമർപ്പണത്തോടെ തൻ്റെ കഥാപാത്രത്തെ ചെയ്ത് തീര്ക്കുന്നു.
ഏതാനും പതിറ്റാണ്ടുകളായി ആമിർ ബോളിവുഡിന്റെ മുൻനിര നടൻ തന്നെയാണ്. ഈ കാലയളവിൽ നിരവധി ബ്ലോക്ക്ബസ്റ്റർ ചിത്രങ്ങൾ ആമിറിന്റെ കരിയറിന്റെ ഭാഗമായിട്ടുണ്ട്. എന്നാൽ തന്റെ താരത്വം എങ്ങനെ ലഭിച്ചെന്ന് പോലും ആമിർ മനസ്സിലാക്കിയിട്ടില്ലെന്ന് അദ്ദേഹം നേരത്തെ തുറന്നു പറഞ്ഞിരുന്നു. 56-ാമത് അന്താരാഷ്ട്ര ചലച്ചിത്രമേള സെഷനിലാണ് ആമിർ തന്റെ മനസ്സ് തുറന്നത്.
“ഞാൻ എങ്ങനെ ഒരു സ്റ്റാർ ആയി മാറി എന്നത് എനിക്ക് അറിയില്ല. യുക്തിപൂർവ്വം ചിന്തിച്ചാല്, ഞാൻ ഒരുപക്ഷേ സ്റ്റാർ ആകേണ്ടതില്ലായിരുന്നു. പലപ്പോഴും നിയമങ്ങൾ തെറ്റിക്കുകയും സാധാരണ രീതികളെ മറികടക്കുകയും ചെയ്തു. അതിനാലാണ് എനിക്ക് ലഭിച്ച ബഹുമാനത്തിനും വിജയത്തിനും ഞാൻ അത്യന്തം നന്ദിയുള്ളവനാകുന്നത്. ഞാൻ എടുത്ത ഏതൊരു തീരുമാനവും വിജയത്തിന്റെ വീക്ഷണകോണിൽ നിന്നുള്ളതല്ല. ഞാൻ തിരഞ്ഞെടുത്ത എല്ലാ സിനിമകളും വിജയിക്കുമോ എന്ന ചിന്തയോടെ അവ എടുക്കാറില്ല.
‘സർഫറോഷ്’യും ‘ലഗാൻ’യും പോലുള്ള ചിത്രങ്ങൾ പുറത്തിറങ്ങിയപ്പോൾ ആളുകൾക്ക് ഇഷ്ടപ്പെടുമോ എന്ന് ധാരണ ഇല്ലായിരുന്നു. ഇപ്പോഴത്തെ സിതാരെ സമീൻ പർ ഉൾപ്പെടെ ഞാൻ തിരഞ്ഞെടുത്ത ഈ സിനിമകളൊന്നും യഥാർത്ഥത്തിൽ വിജയം ഉദേശിച്ചുള്ളവയായിരുന്നില്ല’. ആമിര് പറഞ്ഞു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
