ദേശീയ അവാർഡ് നേടിയ റിഷഭ് ഷെട്ടി നായകനായ കാന്താര ബോക്സോഫീസിലും വലിയ ഹിറ്റായിരുന്നു. ഇപ്പോൾ അതിന്റെ തുടർ ഭാഗമായ കാന്താര ചാപ്റ്റർ 1 തിയറ്ററുകളിലെത്തിയിരിക്കുന്നു. ആദ്യദിനം. പ്രമുഖ ട്രേഡ് ട്രാക്കർ സാക്നിൽക്കിന്റെ ആദ്യ കണക്കുകൾ പ്രകാരം, എല്ലാ ഭാഷകളിൽനിന്നുമായി കാന്താര ചാപ്റ്റർ വൺ, 60 കോടി രൂപ നേടി. ഹിന്ദിയിൽ ഈ ചിത്രം ഏകദേശം 19–21 കോടി രൂപ നേടിയെന്നും സക്നിൽക്ക് വ്യക്തമാക്കുന്നു.
ഈ വർഷം ഏറ്റവുമധികം കളക്ഷൻ നേടിയ ഫെസ്റ്റിവൽ റിലീസായും ഈ ചിത്രം കണക്കാക്കപ്പെടുന്നു. ഋഷഭ് ഷെട്ടി നായകനായ കാന്താര ചാപ്റ്റർ 1 ഹിന്ദി വിപണിയിൽ ഒരു കന്നഡ ചിത്രത്തിന് ലഭിക്കുന്ന രണ്ടാമത്തെ വലിയ ഓപ്പണിംഗ് കളക്ഷൻ എന്ന നേട്ടം സ്വന്തമാക്കി. 54 കോടി രൂപ കളക്ഷൻ നേടിയ യാഷിന്റെ കെജിഎഫ്: ചാപ്റ്റർ 2 ആണ് ഇക്കാര്യത്തിൽ ഒന്നാമത്.
പൂജാ റിലീസായി തിയറ്ററുകളിലെത്തിയ കാന്താര ചാപ്റ്റർ 1 കന്നഡ ചിത്രം ധർമ്മ പ്രൊഡക്ഷൻസിന്റെ സണ്ണി സംസ്കാരി കി തുളസി കുമാരിയുമായാണ് ബോക്സ് ഓഫീസിൽ ഏറ്റുമുട്ടുന്നത്. വരുൺ ധവാൻ, ജാൻവി കപൂർ, രോഹിത് സരഫ്, സന്യ മൽഹോത്ര എന്നിവർ പ്രധാന വേഷത്തിലെത്തിയ ഈ ചിത്രം 9.25 കോടി രൂപ നേടി. 125 കോടി രൂപ ബജറ്റിലാണ് റിഷഭ് ഷെട്ടി സംവിധാനം ചെയ്ത കാന്താര 2 നിർമ്മിച്ചിരിക്കുന്നത്.
റിഷഭ് ഷെട്ടി കേന്ദ്ര കഥാപാത്രത്തെ അവതരിപ്പിച്ച കാന്താര ചാപ്റ്റർ 1ൽ ജയറാം, രുക്മിണി വസന്ത്, ഗുൽഷൻ ദേവയ്യ എന്നിവരും അഭിനയിച്ചിട്ടുണ്ട്. ചിത്രം സംവിധാനം ചെയ്തിരിക്കുന്നതും റിഷഭ് ഷെട്ടിയാണ്. അനിരുദ്ധ് മഹേഷ്, ഷാനിൽ ഗുരു എന്നിവരോടൊപ്പം ചിത്രത്തിന്റ രചനയിലും റിഷഭിന് പങ്കാളിത്തമുണ്ട്.
2024-ൽ കാന്താര എന്ന ചിത്രത്തിന് റിഷഭ് ഷെട്ടി മികച്ച നടനുള്ള ദേശീയ അവാർഡ് നേടി. മികച്ച ജനപ്രിയ ചിത്രത്തിനുള്ള ദേശീയ അവാർഡും ഈ ചിത്രം നേടിയിരുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
