തിയേറ്ററുകളെ ഇളക്കിമറിച്ച ‘സയ്യാരാ’ വീണ്ടും വരുന്നു; റീ-റിലീസ് വാലൻ്റൈൻസ് ഡേ പ്രമാണിച്ച്

മോഹിത് സൂരിയുടെ സംവിധാനത്തിൽ കഴിഞ്ഞ വർഷം പുറത്തിറങ്ങിയ റൊമാന്റിക് ചിത്രമായിരുന്നു ‘സയ്യാരാ’. 2025ലെ ബോളിവുഡിലെ ഏറ്റവും വലിയ വിജയങ്ങളിലൊന്നായി മാറാനും ഈ ചിത്രത്തിനായി. ഇപ്പോഴിതാ വാലന്റൈൻസ് ഡേയ്ക്ക് മുന്നോടിയായി ‘സയ്യാരാ’ വീണ്ടും തിയേറ്ററുകളിലേക്ക് എത്താൻ പോവുകയാണെന്നാണ് പുറത്തു വരുന്ന റിപ്പോർട്ടുകൾ.

റീ-റിലീസ് സംബന്ധിച്ച് നിർമാതാക്കളായ യാഷ് രാജ് ഫിലിംസ് (YRF) ഇതുവരെ ഔദ്യോഗിക പ്രഖ്യാപനമൊന്നും നടത്തിയിട്ടില്ല. എങ്കിലും ഇന്ത്യയിലെ ഒന്നിലധികം നഗരങ്ങളിലെ BookMyShow-യിൽ നിലവിൽ ചിത്രത്തിന്റെ പ്രദർശന സമയങ്ങൾ ലിസ്റ്റ് ചെയ്തിട്ടുണ്ട്. തിയേറ്റർ ലിസ്റ്റിംഗുകൾ പ്രകാരം മുംബൈ, ദില്ലി, ബെംഗളൂരു, പൂനെ എന്നിവിടങ്ങളിൽ വാലന്റൈൻസ് വീക്കിൽ ‘സയ്യാരാ’ പ്രദർശനത്തിനെത്തും.

ALSO READ: ‘2014 ൽ എത്തി പ്രധാന മന്ത്രിയെ മാറ്റും’; ജീവിതത്തിൽ തിരികെ പോകാനുള്ള അവസരത്തിൽ തനിക്ക് ചെയ്യാനുള്ള കാര്യം പറഞ്ഞ് നടൻ കിഷോർ

കഴിഞ്ഞ വർഷം ജൂലൈയിലാണ് ഈ ചിത്രം തിയേറ്ററുകളിലെത്തിയത്. പുതുമുഖങ്ങളായ അഹാൻ പാണ്ഡെയും അനീത് പദ്ദയും ആയിരുന്നു ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചത്. ലോകമെമ്പാടുമായി 577 കോടി രൂപയുടെ കളക്ഷൻ ചിത്രം വാരിക്കൂട്ടി. ആ വർഷത്തെ ഏറ്റവും കൂടുതൽ കളക്ഷൻ നേടിയ രണ്ടാമത്തെ ഇന്ത്യൻ ചിത്രവും ഇന്ത്യൻ സിനിമാ ചരിത്രത്തിലെ ഏറ്റവും കൂടുതൽ കളക്ഷൻ നേടിയ പ്രണയ ചിത്രവുമായി മാറാനും സയ്യാരക്കായി.