വിജയിയുടെ ‘ജനനായകൻ’ കുരുക്കിൽ; സിനിമ തടഞ്ഞതിന് പിന്നിലെ യഥാർത്ഥ കാരണമെന്ത്?

തമിഴ് സൂപ്പർ താരം വിജയ് യുടെ ‘ജനനായകൻ’ സിനിമയുടെ റിലീസ് വീണ്ടും പ്രതിസന്ധിയിലായിരിക്കുകയാണ്. വിജയ് യുടെ രാഷ്ട്രീയ പ്രവേശനത്തിന് മുന്നോടിയായുള്ള അവസാന ചിത്രമെന്ന് കരുതപ്പെടുന്ന ഒന്നാണിത്. ചിത്രത്തിന് സെൻസർ ബോർഡ് (CBFC) സർട്ടിഫിക്കറ്റ് നൽകണമെന്ന മദ്രാസ് ഹൈക്കോടതി സിംഗിൾ ബെഞ്ചിന്റെ ഉത്തരവ് സ്റ്റേ ചെയ്ത ഡിവിഷൻ ബെഞ്ച് നടപടിക്കെതിരെ നിർമ്മാതാക്കളായ കെ.വി.എൻ പ്രൊഡക്ഷൻസ് നൽകിയ ഹർജി സുപ്രീം കോടതി ഇന്ന് തള്ളിയിരുന്നു.

ജസ്റ്റിസ് ദീപാങ്കർ ദത്ത, ജസ്റ്റിസ് അഗസ്റ്റിൻ ജോർജ് മസിഹ് എന്നിവരടങ്ങിയ ബെഞ്ചാണ് നിർമ്മാതാക്കളുടെ ഹർജി പരിഗണിച്ചത്. കേസ് ജനുവരി 20-ന് മദ്രാസ് ഹൈക്കോടതി ഡിവിഷൻ ബെഞ്ച് വിശദമായി പരിഗണിക്കാൻ ഇരിക്കെ, ഈ ഘട്ടത്തിൽ ഇടപെടാൻ സുപ്രീം കോടതി വിസമ്മതിച്ചു. സിംഗിൾ ബെഞ്ച് കേസ് പരിഗണിച്ച വേഗതയെ സുപ്രീം കോടതി വിമർശിക്കുകയും ചെയ്തു. കൂടാതെ, സെൻസർ ബോർഡ് അനുമതി ലഭിക്കുന്നതിന് മുൻപ് തന്നെ റിലീസ് തീയതി പ്രഖ്യാപിച്ചതിനെയും 5,000 തിയേറ്ററുകൾ ബുക്ക് ചെയ്തതിനെയും കോടതി ചോദ്യം ചെയ്തു.

ALSO READ: ടീസർ ചർച്ചയായതിന് പിന്നാലെ പ്രതിഫലവും: ‘ടോക്സികില്‍’ താരങ്ങളുടെ മൂല്യം കോടികള്‍

എന്താണ് തർക്കം?

ജനുവരി 9-ന് റിലീസ് ചെയ്യാനിരുന്ന ചിത്രത്തിന് മതവികാരം വ്രണപ്പെടുത്തുന്നുവെന്നും സൈന്യത്തെ മോശമായി ചിത്രീകരിക്കുന്നുവെന്നും ആരോപിച്ച് പരാതി ഉയർന്നതിനെ തുടർന്നാണ് സെൻസർ ബോർഡ് അംഗീകാരം തടഞ്ഞത്. തുടർന്ന് ചിത്രം റിവൈസിംഗ് കമ്മിറ്റിക്ക് വിടാൻ ചെയർമാൻ തീരുമാനിച്ചു. ഇതിനെതിരെ നിർമ്മാതാക്കൾ മദ്രാസ് ഹൈക്കോടതിയെ സമീപിക്കുകയും ഉടൻ സർട്ടിഫിക്കറ്റ് നൽകാൻ സിംഗിൾ ബെഞ്ച് ഉത്തരവിടുകയും ചെയ്തു. എന്നാൽ, സെൻസർ ബോർഡിന്റെ ഭാഗം കേൾക്കാതെയാണ് ഈ ഉത്തരവെന്ന് ചൂണ്ടിക്കാട്ടി ഡിവിഷൻ ബെഞ്ച് ഇത് സ്റ്റേ ചെയ്യുകയായിരുന്നു.

ഇനി എന്ത്?

ജനുവരി 20-ന് മദ്രാസ് ഹൈക്കോടതി ഡിവിഷൻ ബെഞ്ച് ഈ കേസ് വീണ്ടും പരിഗണിക്കും. ഹൈക്കോടതി അന്ന് തന്നെ കേസിൽ ഒരു അന്തിമ തീരുമാനം എടുക്കുമെന്ന് പ്രതീക്ഷിക്കുന്നതായി സുപ്രീം കോടതി നിരീക്ഷിച്ചു. ഹൈക്കോടതിയിൽ നിന്ന് അനുകൂല വിധി ഉണ്ടായാൽ മാത്രമേ ചിത്രം ഉടൻ തിയേറ്ററുകളിൽ എത്തുകയുള്ളൂ. അല്ലാത്തപക്ഷം നിർമ്മാതാക്കൾക്ക് വീണ്ടും സുപ്രീം കോടതിയെയോ അല്ലെങ്കിൽ സെൻസർ ബോർഡിന്റെ റിവൈസിംഗ് കമ്മിറ്റിയെയോ സമീപിക്കേണ്ടി വരും. വിജയ് തന്റെ രാഷ്ട്രീയ പാർട്ടിയായ ടി.വി.കെ (TVK) രൂപീകരിച്ച ശേഷം പുറത്തിറങ്ങുന്ന ചിത്രം എന്ന നിലയിൽ വലിയ പ്രതീക്ഷയോടെയാണ് ആരാധകർ ഇതിനെ കാത്തിരിക്കുന്നത്