വിജയ് ആരാധകർ ഏറെ ആവേശത്തോടെ കാത്തിരുന്ന ‘തെരി’ സിനിമയുടെ റീ-റിലീസ് തീയതി നീട്ടിവെച്ചു. തമിഴ് സിനിമയിലെ സൂപ്പർതാരം വിജയ്യുടെ പുതിയ ചിത്രമായ ‘ജനനായകൻ’ നേരിടുന്ന സെൻസറിങ് പ്രതിസന്ധികളും റിലീസ് മാറ്റവുമാണ് തെരിയുടെ മടങ്ങിവരവിനെയും ബാധിച്ചിരിക്കുന്നത്. നേരത്തെ ജനുവരി 15-ന് പൊങ്കൽ റിലീസായി തെരി വീണ്ടും തിയേറ്ററുകളിൽ എത്തുമെന്നായിരുന്നു വി ക്രിയേഷൻസ് പ്രഖ്യാപിച്ചിരുന്നത്.
എന്നാൽ പുതിയ സാഹചര്യത്തിൽ മറ്റ് സിനിമകളുടെ നിർമ്മാതാക്കൾ നടത്തിയ അഭ്യർത്ഥന മാനിച്ചാണ് ഈ പിന്മാറ്റമെന്ന് നിർമ്മാതാവ് കലൈപുലി എസ്. തനു വ്യക്തമാക്കി. ഉത്സവ സീസണിൽ നിരവധി ചിത്രങ്ങൾ ബോക്സ് ഓഫീസ് ലക്ഷ്യമിട്ട് എത്തുന്നതിനാൽ ആരോഗ്യകരമായ മത്സരം ഉറപ്പാക്കാനാണ് ഈ തീരുമാനമെന്ന് അദ്ദേഹം ചെന്നൈയിൽ മാധ്യമങ്ങളോട് പറഞ്ഞു.
അറ്റ്ലി സംവിധാനം ചെയ്ത ‘തെരി’ 2016-ൽ പുറത്തിറങ്ങിയ കാലത്ത് തമിഴ് സിനിമയിലെ ഏറ്റവും വലിയ കളക്ഷൻ റെക്കോർഡുകൾ സ്വന്തമാക്കിയ ചിത്രമാണ്. വിജയ് അവതരിപ്പിച്ച ജോസഫ് കുരുവിള എന്ന പോലീസ് ഉദ്യോഗസ്ഥനും അച്ഛൻ-മകൾ ബന്ധത്തിന്റെ ആഴവും പറയുന്ന സിനിമയിൽ സാമന്ത, എമി ജാക്സൺ എന്നിവരായിരുന്നു നായികമാർ.
മികച്ച ഗാനങ്ങളും മാസ് രംഗങ്ങളും കൊണ്ട് ഇന്നും ആരാധകരുടെ പ്രിയപ്പെട്ട ചിത്രമാണിത്. നിലവിൽ ഈ ചിത്രം വരുൺ ധവാനെ നായകനാക്കി ‘ബേബി ജോൺ’ എന്ന പേരിൽ ഹിന്ദിയിലേക്ക് റീമേക്ക് ചെയ്തിട്ടുണ്ട്. ജനനായകൻ സിനിമയുടെ സെൻസറിങ് പ്രശ്നങ്ങൾ പരിഹരിക്കപ്പെടുന്ന മുറയ്ക്ക് തെരിയുടെ പുതിയ റീ-റിലീസ് തീയതി പ്രഖ്യാപിക്കുമെന്നാണ് റിപ്പോർട്ടുകൾ.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
