ഇനി ത്രോ ഇന്നുകൾക്കുള്ള സമയം വെറും 5 സെക്കൻഡ്, വൈകിയാൽ പണി പാളും; ഫുട്ബോൾ നിയമങ്ങളിൽ വൻ മാറ്റങ്ങളുമായി ഫിഫ

2026 ലോകകപ്പിന് മുന്നോടിയായി ഫുട്ബോൾ നിയമങ്ങളിൽ സുപ്രധാനമായ മാറ്റങ്ങൾ ഫിഫ പ്രഖ്യാപിച്ചു. കളിയുടെ വേഗത വർദ്ധിപ്പിക്കാനും സമയം പാഴാക്കുന്നത് തടയാനുമാണ് പ്രധാനമായും ഈ പരിഷ്കാരങ്ങൾ ലക്ഷ്യമിടുന്നത്. ഫിഫ റഫറിമാരുടെ തലവൻ പിയർലൂയിജി കോളിനയാണ് പുതിയ മാറ്റങ്ങളെക്കുറിച്ച് വിശദീകരിച്ചത്.

മത്സരത്തിനിടയിൽ സമയം കളയുന്നത് തടയാൻ കർശനമായ സമയപരിധികൾ ഏർപ്പെടുത്തിയിട്ടുണ്ട്. കളി പുനരാരംഭിക്കുന്നത് വൈകിക്കുന്നത് ഒഴിവാക്കാൻ ത്രോ-ഇന്നുകൾക്ക് ഇനി മുതൽ അഞ്ച് സെക്കൻഡ് സമയം മാത്രമേ അനുവദിക്കൂ. ഒരു താരം നിശ്ചിത സമയത്തിനുള്ളിൽ ത്രോ ചെയ്യാതെ മനഃപൂർവ്വം കളി വൈകിപ്പിച്ചാൽ, ആ ത്രോ എതിർ ടീമിന് നൽകുന്നതായിരിക്കും. 2022 ലോകകപ്പിലെ പോലെ ദീർഘനേരമുള്ള സ്റ്റോപ്പേജ് ടൈം ഒഴിവാക്കി മത്സരത്തിന് കൂടുതൽ വേഗത നൽകുക എന്നതാണ് ഈ നിയമത്തിലൂടെ ഫിഫ ലക്ഷ്യമിടുന്നത്.

ALSO READ: ഐപിഎൽ സ്റ്റേഡിയത്തിൽ ഭക്തി​ഗാനവും മത ചിഹ്നവും; ക്രിക്കറ്റിനേയും കാവിവത്കരിക്കാൻ മോദി സർക്കാർ

ഇതേ നിയമം തന്നെ ഗോൾ കിക്കുകൾക്കും ബാധകമാണ്. ഗോൾ കിക്ക് എടുക്കാൻ അഞ്ച് സെക്കൻഡിൽ കൂടുതൽ എടുത്താൽ ശിക്ഷയായി എതിർ ടീമിന് കോർണർ കിക്ക് അനുവദിക്കും. കൂടാതെ, പകരക്കാരായി ഇറങ്ങുന്ന കളിക്കാർ ഏറ്റവും അടുത്ത പോയിന്റിലൂടെ 10 സെക്കൻഡിനുള്ളിൽ മൈതാനം വിടണം. ഇത് പാലിച്ചില്ലെങ്കിൽ, പകരക്കാരൻ മൈതാനത്ത് പ്രവേശിക്കാൻ ഒരു മിനിറ്റ് കാത്തിരിക്കേണ്ടി വരും, അതുവരെ ടീം 10 പേരുമായി കളിക്കേണ്ടി വരും.

പരുക്കേറ്റ് ഫിസിയോയുടെ ചികിത്സ തേടുന്ന കളിക്കാർ 60 സെക്കൻഡ് നേരം മൈതാനത്തിന് പുറത്ത് തുടരണം. എന്നാൽ ഗോൾകീപ്പർമാർക്കും ചില പ്രത്യേക സാഹചര്യങ്ങൾക്കും ഇതിൽ ഇളവുണ്ട്. മറ്റൊരു പ്രധാന മാറ്റം, എതിരാളിയുമായുള്ള തർക്കത്തിനിടെ വായ മൂടി സംസാരിക്കുന്നത് ചുവപ്പ് കാർഡിന് കാരണമാകാം എന്നതാണ്

വീഡിയോ അസിസ്റ്റന്റ് റഫറി (VAR) സംവിധാനത്തിലും മാറ്റങ്ങൾ വരുത്തിയിട്ടുണ്ട്. കോർണറുകൾ ശരിയായ രീതിയിലാണോ അനുവദിച്ചതെന്ന് പരിശോധിക്കാൻ ഇനി വാർ ഉപയോഗിക്കാം. കൂടാതെ, രണ്ടാം മഞ്ഞക്കാർഡ് ലഭിച്ച് പുറത്താകുന്ന താരങ്ങളുടെ ആ മഞ്ഞക്കാർഡ് പുനഃപരിശോധിക്കാനും വാറിലൂടെ സാധിക്കും.

ഈ പുതിയ നിയമങ്ങൾ കളിക്കളത്തിലെ സമയം പാഴാക്കൽ കുറയ്ക്കുമെന്നും 2022 ലോകകപ്പിനെ അപേക്ഷിച്ച് സ്റ്റോപ്പേജ് ടൈം കുറയ്ക്കാൻ സഹായിക്കുമെന്നും ഫിഫ പ്രതീക്ഷിക്കുന്നു. എങ്കിലും ഓരോ പകുതിയിലും മൂന്ന് മിനിറ്റ് വീതം ഹൈഡ്രേഷൻ ബ്രേക്കുകൾ നിർബന്ധമായും ഉണ്ടായിരിക്കും..