‘ഒന്ന് ശ്വസിക്കാന്‍ തന്ന വേണം മാസം ഏഴര ലക്ഷം രൂപ!’; ഗുരുഗ്രാമിനേക്കാള്‍ നല്ലത് മുംബൈ ആണെന്ന് സോഷ്യല്‍ മീഡിയ

ഗുരുഗ്രാമിലെ ആഡംബര ജീവിതം വലിയ ചെലവാണെന്ന ലിങ്ക്ഡ്ഇന്‍ പോസ്റ്റ് ഇന്റര്‍നെറ്റിനെ ഇളക്കിമറിക്കുന്നു. നഗരത്തിലെ അംബരചുംബിയായ ഫ്ലാറ്റിലെ താമസക്കാരനായ വൈഭവ് ജെ എന്നയാളാണ് ഈ പോസ്റ്റ് പങ്കിട്ടത്. മാസം ഏഴര ലക്ഷം രൂപ ഒന്ന് ശ്വസിക്കാൻ തന്നെ വേണമെന്നാണ് വൈഭവിൻ്റെ പോസ്റ്റ്.

‘ഗുഡ്ഗാവില്‍ എനിക്ക് ഒരു വീടുണ്ട്. അതിൻ്റെയർഥം ശ്വസിക്കാന്‍ എനിക്ക് പ്രതിമാസം 7.5 ലക്ഷം രൂപ ആവശ്യമാണെന്നാണ്’- ഇങ്ങനെയാണ് വൈഭവിൻ്റെ പോസ്റ്റ് ആരംഭിക്കുന്നത്. ഭവന നിര്‍മാണത്തിനപ്പുറം ജീവിത ചെലവ് എങ്ങനെ പടരുന്നുവെന്നതാണ് പോസ്റ്റിൽ അദ്ദേഹം വിശദീകരിക്കാൻ ശ്രമിക്കുന്നത്.

Read Also: കനത്ത ചൂടില്‍ നിന്നും ദില്ലിക്ക് ആശ്വാസം; മഴയ്ക്കും ശക്തമായ കാറ്റിനും സാധ്യത

മൂന്ന് കോടിയുടെ വീടിന് 2.08 ലക്ഷം പ്രതിമാസം ഇ എം ഐ വേണം. ഫൗണ്ടൻ അറ്റകുറ്റപ്പണിക്ക് പ്രതിമാസം 12,00 രൂപ, കാര്‍ ഇ എം ഐ 60,000 (കാരണം സ്വിഫ്റ്റിൽ സഞ്ചരിക്കാനാകില്ല), കുട്ടികള്‍ക്കുള്ള ഐ ബി സ്‌കൂളിന് പ്രതിമാസം 65,000, വിദേശ യാത്ര തെളിയിക്കുന്നതിന് പ്രതിമാസം 30,000, പാചകക്കാരന്‍, വീട്ടുജോലിക്കാരി, ഡ്രൈവര്‍ – ഗാര്‍ഹിക ജീവനക്കാര്‍ക്ക് പ്രതിമാസം 30,000, നിങ്ങള്‍ക്ക് ‘വേണ്ടാത്ത’ ക്ലബ് നൈറ്റുകള്‍ക്കും അത്താഴങ്ങള്‍ക്കും 20,000, ‘ഡി എൽ എഫ് ഫേസ് 5 റെഡി’ എന്ന രീതിയില്‍ വസ്ത്രം ധരിക്കുന്നതിന് 12,000, ലക്കും ലഗാനുമില്ലാത്ത ഷോപ്പിങിന് 10,000-ല്‍ കൂടുതല്‍, ജന്മദിന സമ്മാനങ്ങള്‍ക്കും വിവാഹ കവറുകള്‍ക്കും 15,000, നികുതിയായി ഒരു വ്യാജ പുഞ്ചിരിയും- ഇങ്ങനെയാണ് പോസ്റ്റ്.

ഈ ചെലവുകൾക്ക് പ്രതിമാസം അഞ്ച് ലക്ഷം വരുമാനം വേണം. ഈ അഞ്ച് ലക്ഷത്തിന് 30 ശതമാനം ആദായ നികുതി കൂടി വരുമ്പോൾ ചെലവ് പ്രതിമാസം ഏഴര ലക്ഷമാകുമെന്നും അദ്ദേഹം കുറിച്ചു. ഗുരുഗ്രാം ഉപേക്ഷിച്ച് മുംബൈയിലേക്ക് പോരൂ ജീവിത ചെലവ് വർധിക്കില്ല എന്നായിരുന്നു ഇൻ്റർനെറ്റിലെ മറുപടി.