ഡിജിറ്റൽ കാലഘട്ടത്തിൽ കുട്ടികളുടെ മാനസികാരോഗ്യവും വളർച്ചയും ഉറപ്പാക്കുക ലക്ഷ്യം; ‘സൈക്കോളജിക്കൽ സേഫ്റ്റി പ്രോട്ടോക്കോള്‍– 2026’ പുറത്തിറക്കാൻ ഹാപ്പിനസ് കെയർ ഫൗണ്ടേഷൻ

ഡിജിറ്റൽ കാലഘട്ടത്തിൽ കുട്ടികളുടെ മാനസികാരോഗ്യവും സുരക്ഷിതമായ വളർച്ചയും ഉറപ്പാക്കുന്നതിനായി സമഗ്ര മാർഗനിർദേശ പ്രോട്ടോക്കോളായ “സൈക്കോളജിക്കൽ സേഫ്റ്റി പ്രോട്ടോക്കോള്‍–2026” പുറത്തിറക്കാൻ ഹാപ്പിനസ് കെയർ ഫൗണ്ടേഷൻ. മൊബൈൽ ഫോൺ ഉപയോഗത്തിന്റെ വർധനവ്, സോഷ്യൽ മീഡിയയുടെ സ്വാധീനം, ഓൺലൈൻ ഗെയിമിംഗ്, എഐ ടൂളുകളുടെ വ്യാപനം എന്നിവ കുട്ടികളുടെ മാനസികാവസ്ഥയെയും പെരുമാറ്റ രീതികളെയും ഗൗരവമായി ബാധിക്കുന്ന സാഹചര്യത്തിലാണ് ഈ പദ്ധതി രൂപീകരിക്കുന്നത്.

കുട്ടികളുടെ ഡിജിറ്റൽ അടിമത്തം കുറയ്ക്കുക, മൊബൈൽ ഉപയോഗം നിയന്ത്രിക്കുക, മാനസികാരോഗ്യം സംരക്ഷിക്കുക, സാമൂഹികവും വികാരാത്മകവുമായ വളർച്ച ശക്തിപ്പെടുത്തുക എന്നീ ലക്ഷ്യങ്ങളോടെയാണ് പ്രോട്ടോക്കോൾ തയ്യാറാക്കുന്നത്. രക്ഷിതാക്കൾ, അധ്യാപകർ, സ്കൂൾ ഭരണാധികാരികൾ, വിദ്യാർത്ഥികൾ എന്നിവർക്കായി പ്രത്യേകം മാർഗനിർദേശങ്ങൾ ഉൾപ്പെടുത്തിയിരിക്കുന്ന ഈ പ്രോട്ടോക്കോൾ കുട്ടികൾക്ക് ആരോഗ്യകരമായ ഡിജിറ്റൽ ശീലങ്ങൾ വളർത്താനും ഉത്തരവാദിത്തമുള്ള ഡിജിറ്റൽ പൗരന്മാരായി വളരാനും സഹായിക്കുന്ന രീതിയിലാണ് രൂപകൽപ്പന ചെയ്തിരിക്കുന്നത്.

ALSO READ: ഉയരുന്ന യുവി ഇൻഡക്സ് നിസ്സാരക്കാരനല്ല, 10 മണി മുതൽ 3 മണി വരെ ഈ കാര്യങ്ങൾ ശ്രദ്ധിക്കാതെ പോവല്ലേ ..

ഹാപ്പിനസ് കെയർ നിലവിൽ തിരുവനന്തപുരം, കൊച്ചി, കോഴിക്കോട്, കോട്ടയം, കണ്ണൂർ എന്നിവിടങ്ങളിലായി പ്രവർത്തിക്കുന്ന അഞ്ച് ബ്രാഞ്ചുകളുള്ള കേരളത്തിലെ ഏറ്റവും വലിയ സൈക്കോളജി ബ്രാൻഡുകളിൽ ഒന്നാണ്. ക്ലിനിക്കൽ കൗൺസലിംഗ്, കുട്ടികളുടെ മാനസികാരോഗ്യം, കുടുംബ കൗൺസലിംഗ്, കോർപ്പറേറ്റ് വെൽനെസ് പ്രോഗ്രാമുകൾ തുടങ്ങിയ മേഖലകളിൽ ഹാപ്പിനസ് കെയർ സേവനം നൽകുന്നു.

ഇതോടൊപ്പം, കുട്ടികളുടെ മാനസികാരോഗ്യ പിന്തുണ കൂടുതൽ വ്യാപകമാക്കുന്നതിനായി ആർട്ടിഫിഷ്യൽ ഇന്റലിജൻസ് അടിസ്ഥാനമാക്കിയുള്ള ഒരു മാനസികാരോഗ്യ ആപ്പും ഹാപ്പിനസ് കെയർ വികസിപ്പിച്ചുവരികയാണെന്ന് അധികൃതർ അറിയിച്ചു. ഡിജിറ്റൽ ലോകത്തിൽ കുട്ടികൾ നേരിടുന്ന മാനസിക സമ്മർദ്ദങ്ങൾ തിരിച്ചറിയാനും പ്രാഥമിക സഹായവും മാർഗനിർദേശവും നൽകാനും ഈ ആപ്പ് സഹായകരമാകുമെന്ന് പ്രതീക്ഷിക്കുന്നു.

കുട്ടികളിലെ ഡിജിറ്റൽ ഉപയോഗ ശീലങ്ങൾ, വികാര നിയന്ത്രണം, കുടുംബബന്ധങ്ങളുടെ ശക്തീകരണം, മാനസിക പ്രതിരോധശേഷി (Psychological Resilience) എന്നിവ വളർത്തുന്നതിനായി സംസ്ഥാനതലത്തിൽ മാനസികാരോഗ്യ ബോധവത്കരണ പരിപാടികൾ, രക്ഷിതൃ പരിശീലനങ്ങൾ, സൈക്കോളജിക്കൽ സേഫ്റ്റി ക്ലിനിക്കുകൾ എന്നിവ സംഘടിപ്പിക്കുമെന്നും ഹാപ്പിനസ് കെയർ ഫൗണ്ടേഷൻ അറിയിച്ചു.

ഡിജിറ്റൽ കാലഘട്ടത്തിൽ കുട്ടികളുടെ മാനസിക സുരക്ഷയും ആരോഗ്യകരമായ വ്യക്തിത്വവളർച്ചയും ഉറപ്പാക്കുന്നതിനുള്ള ഒരു സമഗ്ര സാമൂഹിക ഇടപെടലായിരിക്കും “Psychological Safety Protocol – 2026” എന്ന് ഹാപ്പിനസ് കെയർ ഫൗണ്ടേഷൻ ചെയർമാൻ സിബി എസ്. പണിക്കർ വ്യക്തമാക്കി.