വേനലിൽ വെള്ളം കുടിക്കുമ്പോൾ സൂക്ഷിക്കണം; അമിതമായാൽ അമൃതും വിഷം!

വേനൽക്കാലത്ത് ശരീരത്തിലെ ജലാംശം നിലനിർത്തേണ്ടത് അത്യാവശ്യമാണെങ്കിലും, അമിതമായി വെള്ളം കുടിക്കുന്നത് ശരീരത്തിന്റെ സ്വാഭാവിക താളത്തെ തകിടം മറിക്കുമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. മുംബൈയിലെ കോകിലബെൻ ധീരുഭായ് അംബാനി ആശുപത്രിയിലെ ഇന്റേണൽ മെഡിസിൻ കൺസൾട്ടന്റ് ഡോ. എൻ.ആർ. ഷെട്ടി പറയുന്നതനുസരിച്ച്, അമിതമായി വെള്ളം കുടിക്കുന്നത് ഹൈപ്പോനാട്രീമിയ അഥവാ വാട്ടർ ഇൻടോക്സിക്കേഷൻ എന്ന അപകടകരമായ അവസ്ഥയിലേക്ക് നയിക്കാം.

രക്തത്തിലെ സോഡിയത്തിന്റെ അളവ് അമിതമായി കുറയുന്ന അവസ്ഥയാണിത്. സോഡിയം കുറയുമ്പോൾ ശരീരത്തിലെ കോശങ്ങൾ ഉള്ളിലേക്ക് വെള്ളം വലിച്ച് വീർക്കാൻ തുടങ്ങുന്നു. ഇത് തലച്ചോറിലെ കോശങ്ങളെ ബാധിക്കുമ്പോൾ കഠിനമായ തലവേദന, ആശയക്കുഴപ്പം, ഛർദ്ദി എന്നിവയുണ്ടാകുകയും ശരിയായ ചികിത്സ ലഭിച്ചില്ലെങ്കിൽ ജീവൻ തന്നെ അപകടത്തിലാവുകയും ചെയ്യാം.

ALSO READ : ആരോ​ഗ്യം സെറ്റാകാൻ ഈ മൂന്ന് കാര്യങ്ങൾ മതിയെന്നോ ? നിങ്ങൾ ഇതൊക്കെ ശ്രദ്ധിക്കാറുണ്ടോ ?

എത്ര വെള്ളം കുടിക്കണം? ‌

ഒരാൾ എത്ര വെള്ളം കുടിക്കണം എന്നത് അയാളുടെ ശരീരഭാരം, ചെയ്യുന്ന ജോലി, കാലാവസ്ഥ, ഭക്ഷണക്രമം എന്നിവയെ ആശ്രയിച്ചിരിക്കും. സാധാരണഗതിയിൽ ഒരു മുതിർന്ന വ്യക്തി പ്രതിദിനം 2 മുതൽ 3 ലിറ്റർ വരെ വെള്ളം കുടിക്കുന്നതാണ് ഉചിതം. ശാസ്ത്രീയമായി പറഞ്ഞാൽ, വൃക്കകൾക്ക് ഒരു മണിക്കൂറിൽ ഏകദേശം 800 മില്ലി മുതൽ 1 ലിറ്റർ വരെ വെള്ളം മാത്രമേ പുറന്തള്ളാൻ കഴിയൂ. ഇതിൽ കൂടുതൽ വെള്ളം ചുരുങ്ങിയ സമയത്തിനുള്ളിൽ കുടിക്കുന്നത് വൃക്കകൾക്ക് അമിതഭാരമുണ്ടാക്കും.

നിങ്ങളുടെ ശരീരം ആവശ്യത്തിന് വെള്ളം ലഭിക്കുന്നുണ്ടോ എന്ന് തിരിച്ചറിയാൻ രണ്ട് ലളിതമായ വഴികളുണ്ട്

• ദാഹം തിരിച്ചറിയുക
  
  അനാവശ്യമായി വെള്ളം കുടിച്ചു കൊണ്ടിരിക്കുന്നതിന് പകരം ശരീരം ദാഹം പ്രകടിപ്പിക്കുമ്പോൾ മാത്രം കുടിക്കുക.
  
• മൂത്രത്തിന്റെ നിറം പരിശോധിക്കുക
  
  മൂത്രത്തിന് ഇളം മഞ്ഞ നിറമാണെങ്കിൽ ജലാംശം കൃത്യമാണെന്ന് അർത്ഥം. എന്നാൽ മൂത്രം തെളിഞ്ഞ വെള്ളം പോലെയാണെങ്കിൽ നിങ്ങൾ ആവശ്യത്തിലധികം വെള്ളം കുടിക്കുന്നുണ്ടെന്ന് മനസ്സിലാക്കാം.

ALSO READ : പൊള്ളുന്ന ചൂടാണേ; വീട്ടിനകത്തിരുന്നാലും പണിയാ… എന്തൊക്കെ മുൻകരുതൽ എടുക്കണം

കഠിനമായ വെയിലത്ത് ജോലി ചെയ്യുന്നവരും കായികതാരങ്ങളും വെള്ളത്തോടൊപ്പം ഇലക്ട്രോലൈറ്റുകൾ (ഉപ്പും പഞ്ചസാരയും ചേർത്ത വെള്ളം അല്ലെങ്കിൽ കരിക്കിൻ വെള്ളം) ഉൾപ്പെടുത്തുന്നത് സോഡിയം ബാലൻസ് നിലനിർത്താൻ സഹായിക്കും. ഓർക്കുക, വെള്ളം കുടിക്കേണ്ടത് അളവിലല്ല, ആവശ്യത്തിനാണ്.