ഹെയർ എക്സ്റ്റൻഷനുകൾ ഉപയോഗിക്കുന്നവർ ജാഗ്രതൈ; അടങ്ങിയിരിക്കുന്നത് ക്യാൻസറിനും വന്ധ്യതയ്ക്കും കാരണമായേക്കാവുന്ന മാരകമായ രാസവസ്തുക്കൾ

മുടി വളർത്തുന്നത് പലർക്കും മെനക്കേടുള്ള പരിപാടി ആണ്. അതുകൊണ്ട് ഷോർട്ട് ഹെയറിനോട് ആളുകൾ താത്പര്യം കാണിക്കാറുണ്ട്. എന്നാൽ അല്ലാത്തവരും ഉണ്ട് കേട്ടോ. പക്ഷെ അവർക്ക് പൊതുവെ മുടി വളരത്തുമില്ല. അതുകൊണ്ടു തന്നെ പലരും മുടിയുടെ നീളവും ഉള്ളും വർധിപ്പിക്കാൻ ഹെയർ എക്സ്റ്റൻഷനുകൾ ഉപയോഗിക്കാറുണ്ട്. എന്നാൽ ഇങ്ങനെ ഉപയോഗിക്കുന്ന ഹെയർ എക്സ്റ്റൻഷനുകളിൽ മാരകമായ ആരോഗ്യപ്രശ്നങ്ങൾക്ക് കാരണമാകുന്ന വിഷാംശങ്ങൾ അടങ്ങിയിട്ടുണ്ടെന്ന് ആണ് പുതിയ കണ്ടെത്തൽ.

അമേരിക്കൻ കെമിക്കൽ സൊസൈറ്റി ജേണലായ ‘എൻവയോൺമെന്റ് ആൻഡ് ഹെൽത്തിൽ’ (Environment & Health) 2026 ഫെബ്രുവരിയിൽ പ്രസിദ്ധീകരിച്ച പഠനമനുസരിച്ച്, വിപണിയിലുള്ള വിവിധ ഹെയർ എക്സ്റ്റൻഷനുകളിൽ 900-ലധികം വ്യത്യസ്ത രാസവസ്തുക്കൾ അടങ്ങിയിട്ടുണ്ട്.

പരിശോധിച്ച സാമ്പിളുകളിൽ നിന്ന് 169 രാസവസ്തുക്കൾ കൃത്യമായി വേർതിരിച്ചറിഞ്ഞു. ഇതിൽ ഫ്താലേറ്റുകൾ (phthalates), കീടനാശിനികൾ, തീപിടുത്തം തടയാനുള്ള ഫ്ലേം റിട്ടാർഡന്റുകൾ (flame retardants) എന്നിവ ഉൾപ്പെടുന്നു. കണ്ടെത്തിയവയിൽ 12 രാസവസ്തുക്കൾ ക്യാൻസറിനും പ്രത്യുൽപാദന സംബന്ധമായ തകരാറുകൾക്കും കാരണമാകുന്നവയാണെന്ന് തിരിച്ചറിഞ്ഞിട്ടുണ്ട്. ഹോർമോൺ വ്യതിയാനങ്ങൾ, രോഗപ്രതിരോധ ശേഷിയെ ബാധിക്കൽ, ശരീരഭാരം ക്രമരഹിതമാകൽ എന്നിവയ്ക്കും ഈ രാസവസ്തുക്കൾ കാരണമായേക്കാം.

ALSO READ: കരളിനെ നശിപ്പിക്കുന്നത് ഈ 3 ഭക്ഷണങ്ങൾ; ഒഴിവാക്കാൻ മുന്നറിയിപ്പുമായി ആരോഗ്യവിദഗ്ധർ

ഹെയർ എക്സ്റ്റൻഷനുകൾ ഉപയോഗിക്കുന്ന പലർക്കും ചർമ്മത്തിൽ ചൊറിച്ചിൽ, വീക്കം അല്ലെങ്കിൽ അസ്വസ്ഥത അനുഭവപ്പെടാറുണ്ട്. കൂടാതെ, ഇവ കഴുകുമ്പോഴോ ഹീറ്റ് സ്റ്റൈലിംഗ് (heat styling) ചെയ്യുമ്പോഴോ പുറത്തുവരുന്ന ദോഷകരമായ വാതകങ്ങൾ കണ്ണ്, മൂക്ക്, തൊണ്ട എന്നിവയെ അലോസരപ്പെടുത്തുകയും ദീർഘകാലാടിസ്ഥാനത്തിൽ കരളിനെയും നാഡീവ്യൂഹത്തെയും ദോഷകരമായി ബാധിക്കാൻ സാധ്യതയുണ്ടെന്നും ഗവേഷകർ മുന്നറിയിപ്പ് നൽകുന്നു.

പൂർണ്ണമായും സുരക്ഷിതമായ ഹെയർ എക്സ്റ്റൻഷനുകൾ കണ്ടെത്തുക പ്രയാസമാണെങ്കിലും, താഴെ പറയുന്ന മുൻകരുതലുകൾ എടുക്കുന്നത് ഗുണകരമാകും:

‘നോൺ-ടോക്സിക്’ (Non-toxic) അല്ലെങ്കിൽ വിഷാംശങ്ങൾ ഇല്ലാത്തവ എന്ന് രേഖപ്പെടുത്തിയ ഉൽപ്പന്നങ്ങൾ തിരഞ്ഞെടുക്കാൻ ശ്രമിക്കുക. എക്സ്റ്റൻഷനുകൾ ഉപയോഗിക്കുന്നതിന് മുൻപായി സ്വന്തം മുടി നന്നായി കഴുകുന്നത് ചർമ്മത്തിലെ അസ്വസ്ഥതകൾ കുറയ്ക്കാൻ സഹായിക്കും. രാസവസ്തുക്കൾ കലർന്ന പുകകൾ പുറത്തുവരുന്നത് തടയാൻ അമിതമായ ചൂട് ഉപയോഗിച്ചുള്ള സ്റ്റൈലിംഗ് ഒഴിവാക്കുക. പരസ്യവാചകങ്ങളിൽ വിശ്വസിക്കാതെ ഉൽപ്പന്നങ്ങളിലെ ചേരുവകളുടെ പട്ടിക കൃത്യമായി പരിശോധിക്കുക.

പല ഹെയർ എക്സ്റ്റൻഷനുകളിലും അടങ്ങിയിരിക്കുന്ന രാസവസ്തുക്കളുടെ പൂർണ്ണരൂപം വെളിപ്പെടുത്താത്തതിനാൽ ഉപഭോക്താക്കൾ സ്വയം ജാഗ്രത പാലിക്കേണ്ടത് അത്യാവശ്യമാണെന്ന് ഈ പഠനം ഓർമ്മിപ്പിക്കുന്നു.