പണ്ടുകാലം മുതൽക്കേ വയറ്റിലുണ്ടാകുന്ന അസ്വസ്ഥതകൾക്കും ഗ്യാസിനും പ്രകൃതിദത്തമായ മരുന്നായി ഉപയോഗിച്ചിരുന്ന ഒന്നാണ് ജീരകം. ഇന്നത്തെ ദഹനസഹായികളായ മരുന്നുകളിലെല്ലാം അടങ്ങിയിരിക്കുന്ന പ്രധാന ഘടകം യഥാർത്ഥത്തിൽ ജീരകത്തിന്റെ ഗുണങ്ങൾ തന്നെയാണ്. കുടലിൽ കെട്ടിക്കിടക്കുന്ന ഗ്യാസിനെ പുറന്തള്ളാൻ സഹായിക്കുന്ന ‘കാർമിനേറ്റീവ്’ ഗുണങ്ങൾ ഇതിൽ ധാരാളമുണ്ട്.
ഭക്ഷണം ശരിയായി ദഹിക്കാതെ വരുമ്പോഴാണ് പലപ്പോഴും ഗ്യാസ് ഉണ്ടാകുന്നത്; ജീരകത്തിലുള്ള തൈമോൾ എന്ന ഘടകം ഉമിനീർ ഗ്രന്ഥികളെയും ദഹന ഗ്രന്ഥികളെയും ഉത്തേജിപ്പിച്ച് എൻസൈമുകളുടെ ഉൽപ്പാദനം വർദ്ധിപ്പിക്കുകയും ഭക്ഷണം വേഗത്തിൽ ദഹിപ്പിക്കാൻ സഹായിക്കുകയും ചെയ്യുന്നു. കൂടാതെ, കോശങ്ങളുടെ നാശം തടയുന്ന അപിജെനിൻ, ല്യൂട്ടിയോളിൻ തുടങ്ങിയ ആന്റിഓക്സിഡന്റുകളും ശരീരത്തിന് ആവശ്യമായ ഇരുമ്പ് സത്തും ജീരകത്തിൽ അടങ്ങിയിട്ടുണ്ട്. അതിനാൽ രക്തക്കുറവ് ഉള്ളവർ ഭക്ഷണത്തിൽ ജീരകം ഉൾപ്പെടുത്തുന്നത് ഏറെ ഗുണകരമാണ്.
എന്നാൽ ഇന്ന് വിപണിയിൽ ലഭിക്കുന്ന ജീരകം എത്രത്തോളം ശുദ്ധമാണെന്ന് ഉറപ്പുവരുത്തേണ്ടത് അത്യാവശ്യമാണ്. മസാലപ്പൊടികളിലും എണ്ണയിലുമെന്ന പോലെ ജീരകത്തിലും വൻതോതിൽ മായം കലരുന്നതായി റിപ്പോർട്ടുകളുണ്ട്. ശർക്കരപ്പാനി, കല്ല് പൊടിച്ചത്, മാരകമായ രാസവസ്തുക്കൾ എന്നിവ ഉപയോഗിച്ചാണ് പലപ്പോഴും കൃത്രിമ ജീരകം നിർമ്മിക്കുന്നത്. കാട്ടുപുല്ലിന്റെ വിത്തുകൾ ജീരകത്തോടൊപ്പം കലർത്തുന്ന രീതിയും വ്യാപകമാണ്.
ഇത്തരം വ്യാജ ജീരകം തിരിച്ചറിയാൻ ലളിതമായ ചില മാർഗ്ഗങ്ങളുണ്ട്. ഒരു ഗ്ലാസ് വെള്ളത്തിൽ അല്പം ജീരകം ഇടുമ്പോൾ വെള്ളത്തിന്റെ നിറം പെട്ടെന്ന് മാറുന്നുണ്ടെങ്കിൽ അതിൽ കൃത്രിമ നിറം ചേർത്തിട്ടുണ്ടെന്ന് ഉറപ്പിക്കാം. അതുപോലെ ജീരകം കൈവെള്ളയിൽ വെച്ച് നന്നായി ഉരസുമ്പോൾ കൈയിൽ കറുത്ത നിറമോ അഴുക്കോ പറ്റുന്നുണ്ടെങ്കിൽ അത് മായം ചേർത്തതാണ്. യഥാർത്ഥ ജീരകത്തിന് പ്രത്യേകമായ സുഗന്ധമുണ്ടാകും; എന്നാൽ വ്യാജനാണെങ്കിൽ മണം കുറവായിരിക്കുകയോ അല്ലെങ്കിൽ മണ്ണെണ്ണയുടെയോ രാസവസ്തുക്കളുടെയോ മണം അനുഭവപ്പെടുകയോ ചെയ്യും.
ALSO READ : കരളിനെ നശിപ്പിക്കുന്നത് ഈ 3 ഭക്ഷണങ്ങൾ; ഒഴിവാക്കാൻ മുന്നറിയിപ്പുമായി ആരോഗ്യവിദഗ്ധർ
വാങ്ങിയ ജീരകം ശാസ്ത്രീയമായി പരിശോധിക്കണമെന്നുണ്ടെങ്കിൽ സർക്കാർ അംഗീകൃത ലാബുകളെയും സമീപിക്കാവുന്നതാണ്. ചെറിയൊരു ഫീസ് അടച്ച് പൊതുജനങ്ങൾക്ക് തങ്ങൾ വാങ്ങിയ സാധനങ്ങൾ ഇവിടങ്ങളിൽ പരിശോധനയ്ക്ക് നൽകാം. എപ്പോഴും വിശ്വസനീയമായ ഉറവിടങ്ങളിൽ നിന്നും കൃത്യമായ ലേബലിംഗുള്ള സീൽ ചെയ്ത പാക്കറ്റുകൾ മാത്രം വാങ്ങാൻ ശ്രദ്ധിക്കുന്നത് ഇത്തരം ആരോഗ്യപ്രശ്നങ്ങൾ ഒഴിവാക്കാൻ സഹായിക്കും.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
