വേനൽക്കാലത്ത് മുഖക്കുരു ഒരു പ്രശ്നമാണോ ? അകറ്റാൻ ഈ കാര്യങ്ങൾ ശ്രദ്ധിക്കാം

ചൂട് കൂടി വരികയാണ്. ഈ സമയത്താണ് നമ്മളെ തടി പല ആരോഗ്യപ്രശ്നങ്ങളും ഉണ്ടാകുന്നത്. അതിനൊപ്പം തന്നെ നമ്മളെ തേടി പല ചർമപ്രശ്നങ്ങളും വരും. അതിലൊന്നാണ് മുഖക്കുരു. അമിതമായ ചൂടും ഈർപ്പവും കാരണം ചർമ്മത്തിൽ എണ്ണമയം കൂടാനും മുഖക്കുരു വരാനുമുള്ള സാധ്യത കൂടുതലാണ്. മുഖക്കുരു വരാൻ സാധ്യതയുള്ള ചർമ്മമുള്ളവർക്ക് വേനൽക്കാലത്ത് പ്രത്യേക കരുതൽ ആവശ്യമാണെന്ന് വിദഗ്ധർ ചൂണ്ടിക്കാണിക്കുന്നു.

അമിതമായ എണ്ണമയം നീക്കം ചെയ്യാൻ കഠിനമായ ഫേസ് വാഷുകൾ ഉപയോഗിക്കുന്നത് ചർമ്മത്തിന്റെ സ്വാഭാവിക ഈർപ്പം നഷ്ടപ്പെടുത്തുകയും ചർമ്മത്തെ കൂടുതൽ സെൻസിറ്റീവ് ആക്കുകയും ചെയ്യും. ഇതിനു പകരം സാലിസിലിക് ആസിഡ് (BHA), മാൻഡലിക് ആസിഡ് (AHA), ഗ്ലൂക്കോനോലക്റ്റോൺ (PHA) എന്നിവ അടങ്ങിയ മൃദുവായ ക്ലെൻസറുകൾ ഉപയോഗിക്കുന്നത് സുഷിരങ്ങൾ വൃത്തിയാക്കാനും മൃതകോശങ്ങൾ നീക്കം ചെയ്യാനും സഹായിക്കും. ദിവസവും രണ്ട് തവണ ചെറുചൂടുള്ള വെള്ളത്തിൽ മുഖം കഴുകുന്നത് ഉചിതമാണ്.

ALSO READ: കേരളം ചുട്ടുപൊള്ളുന്നു; പകൽ 11 മണി മുതൽ 3 മണി വരെ ജാഗ്രതാ മുന്നറിയിപ്പ്

മോയിസ്ചറൈസർ ഉപയോഗിക്കുന്നത് മുഖക്കുരു ഉണ്ടാക്കുമെന്നത് ഒരു തെറ്റായ ധാരണയാണ്. ചർമ്മം സ്വാഭാവികമായി വരളുമ്പോൾ അത് കൂടുതൽ എണ്ണ ഉൽപ്പാദിപ്പിക്കാൻ സെബേഷ്യസ് ഗ്രന്ഥികളെ പ്രേരിപ്പിക്കുകയും ഇത് മുഖക്കുരു വർദ്ധിപ്പിക്കുകയും ചെയ്യുന്നു. അതിനാൽ സെറാമൈഡുകൾ, ഗ്ലിസറിൻ, ഹൈലൂറോണിക് ആസിഡ് എന്നിവ അടങ്ങിയ കനം കുറഞ്ഞ (lightweight), സുഷിരങ്ങൾ അടയ്ക്കാത്ത തരത്തിലുള്ള മോയിസ്ചറൈസറുകൾ തിരഞ്ഞെടുക്കുക.

സൂര്യപ്രകാശത്തിലെ യുവി (UV) രശ്മികൾ മുഖക്കുരുവിന്റെ പാടുകൾ വർദ്ധിപ്പിക്കാൻ കാരണമാകും. അതിനാൽ കുറഞ്ഞത് SPF 30 ഉള്ളതും ജെൽ രൂപത്തിലുള്ളതുമായ സൺസ്‌ക്രീൻ നിർബന്ധമായും ഉപയോഗിക്കണം. ഇത് മുഖക്കുരു വരാൻ സാധ്യതയുള്ള ചർമ്മത്തിന് സംരക്ഷണം നൽകുന്നു.

ശ്രദ്ധിക്കേണ്ട മറ്റ് കാര്യങ്ങൾ

• എക്സ്ഫോളിയേഷൻ: കഠിനമായ സ്ക്രബ്ബുകൾ ഒഴിവാക്കി ആഴ്ചയിൽ ഒരിക്കൽ മാത്രം മൃദുവായ രീതിയിൽ ചർമ്മം എക്സ്ഫോളിയേറ്റ് ചെയ്യുക.
• ശുചിത്വം: തലയണ ഉറകൾ, മാസ്കുകൾ, സ്കാർഫുകൾ എന്നിവ കൃത്യമായി കഴുകി വൃത്തിയാക്കുക. ഇവയിലെ വിയർപ്പും ബാക്ടീരിയയും മുഖക്കുരുവിന് കാരണമായേക്കാം.
• ഭക്ഷണക്രമം: ധാരാളം വെള്ളം കുടിക്കുക, ഒമേഗ-3 ഫാറ്റി ആസിഡുകൾ അടങ്ങിയ ഭക്ഷണങ്ങളും പഴങ്ങളും പച്ചക്കറികളും ധാരാളമായി കഴിക്കുക.
• ജീവിതശൈലി: മാനസിക സമ്മർദ്ദം കുറയ്ക്കുകയും കൃത്യമായ ഉറക്കം ഉറപ്പാക്കുകയും ചെയ്യുന്നത് മുഖക്കുരു നിയന്ത്രിക്കാൻ സഹായിക്കും.

Disclaimer: ഈ വിവരങ്ങൾ വിദഗ്ധരുടെ നിർദ്ദേശങ്ങൾ പ്രകാരമുള്ള പൊതുവായ അറിവിനായി പങ്കുവെക്കുന്നതാണ്, കൂടുതൽ ചികിത്സാപരമായ കാര്യങ്ങൾക്കായി ഒരു ഡോക്ടറുടെ ഉപദേശം തേടുക