നാണയങ്ങളിൽ തിളങ്ങുന്ന രഹസ്യചിഹ്നങ്ങൾ, ഗവർണറുടെ ഒപ്പില്ലാത്ത ഒരേയൊരു നോട്ട്; ഇന്ത്യൻ കറൻസിയുടെ പിന്നിലെ രഹസ്യങ്ങൾ അറിയാം

കയ്യിൽ പണം കൊണ്ട് നടക്കുന്നവരുടെ എണ്ണം ഈ ഡിജിറ്റൽ കാലത്ത് കുറവാണെങ്കിലും ഇന്നും പലയിടങ്ങളിലും ഡിജിറ്റൽ പണമിടപാട് നടത്താറില്ല. നമ്മുടെ കൈയ്യിലിരിക്കുന്ന പണത്തിന്റെ കഥ തുടങ്ങുന്നത് എവിടെ നിന്നാണ് എന്ന് അറിയാമോ ? ഇന്ത്യയിലെ വിവിധ നഗരങ്ങളിലെ അതീവ സുരക്ഷയുള്ള പ്രിന്റിങ് പ്രസ്സുകളിൽ നിന്നും മിന്റുകളിൽ നിന്നുമാണ് ഈ പണത്തിന്റെ ജനനം. കറൻസി നോട്ടുകളുടെയും നാണയങ്ങളുടെയും നിർമ്മാണത്തെക്കുറിച്ച് നിങ്ങൾക്ക് അറിയാമോ ?

നോട്ടുകൾ അച്ചടിക്കുന്നത് എവിടെ?

ഇന്ത്യയിൽ കറൻസി നോട്ടുകൾ പ്രധാനമായും നാല് സ്ഥലങ്ങളിലാണ് അച്ചടിക്കുന്നത്. നാസിക് (മഹാരാഷ്ട്ര), ദേവാസ് (മധ്യപ്രദേശ്), മൈസൂരു (കർണാടക), സാൽബോണി (പശ്ചിമ ബംഗാൾ) എന്നിവിടങ്ങളാണ് അവ. ഇതിൽ നാസിക്കിലെയും ദേവാസിലെയും പ്രിന്റിങ് നിയന്ത്രിക്കുന്നത് കേന്ദ്ര സർക്കാരിന് കീഴിലുള്ള സെക്യൂരിറ്റി പ്രിന്റിങ് ആൻഡ് മിന്റിങ് കോർപ്പറേഷൻ ഓഫ് ഇന്ത്യ ലിമിറ്റഡ് ആണ്. എന്നാൽ മൈസൂരുവിലെയും സാൽബോണിയിലെയും പ്രസ്സുകൾ റിസർവ് ബാങ്ക് ഓഫ് ഇന്ത്യയുടെ (RBI) കീഴിലാണ് പ്രവർത്തിക്കുന്നത്.

നാണയങ്ങളുടെ രഹസ്യങ്ങൾ

നാണയങ്ങൾ നിർമ്മിക്കുന്നതിനെ ‘മിന്റിങ്’ എന്നാണ് പറയുന്നത്. ഇവ മുംബൈ, കൊൽക്കത്ത, ഹൈദരാബാദ്, നോയിഡ എന്നിവിടങ്ങളിലാണ് നിർമ്മിക്കുന്നത്. എല്ലാ നാണയ നിർമ്മാണവും കേന്ദ്ര സർക്കാരിന്റെ നേരിട്ടുള്ള നിയന്ത്രണത്തിലാണ്. രസകരമായ മറ്റൊരു കാര്യം, നിങ്ങളുടെ കൈയ്യിലുള്ള ഒരു നാണയം എവിടെയാണ് നിർമ്മിച്ചതെന്ന് അതിലെ വർഷത്തിന് താഴെയുള്ള ചിഹ്നം നോക്കി നിങ്ങൾക്ക് തിരിച്ചറിയാം
ഡയമണ്ട് ചിഹ്നം ആണെങ്കിൽ മുംബൈയിൽ ആയിരിക്കും അത് നിര്മിച്ചിരിക്കുക. ഇനി ചിഹ്നം നക്ഷത്രം ആണെങ്കിൽ ഹൈദരാബാദ് ആയിരിക്കും. അതുമല്ല ഡോട്ട് ആണെങ്കിൽ നോയിഡയിൽ ആയിരിക്കും. ഇനി ചിഹ്നങ്ങൾ ഒന്നുമില്ലെങ്കിൽ കൊൽക്കത്ത ആയിരിക്കും അതിന്റെ ജന്മസ്ഥലം.

ഒപ്പുകളിലെ വ്യത്യാസം

എല്ലാ കറൻസി നോട്ടുകളും പൊതുജനങ്ങളിലേക്ക് എത്തിക്കുന്നത് ആർബിഐ ആണ്, അതിനാൽ അവയിൽ ആർബിഐ ഗവർണറുടെ ഒപ്പാണ് ഉണ്ടാവുക. എന്നാൽ ഒരു രൂപയുടെ നോട്ടിന്റെ കാര്യം വ്യത്യസ്തമാണ്. ഒരു രൂപ നോട്ടും എല്ലാ നാണയങ്ങളും പുറത്തിറക്കുന്നത് ഗവൺമെന്റ് ഓഫ് ഇന്ത്യയാണ്. അതുകൊണ്ട് തന്നെ ഒരു രൂപ നോട്ടിൽ ഫിനാൻസ് സെക്രട്ടറിയുടെ ഒപ്പാണ് രേഖപ്പെടുത്തിയിരിക്കുന്നത്.

ALSO READ:തിരക്കേറിയ റോഡിലൂടെ യുവാവിന്റെ ‘കൈവിട്ട’ യാത്ര; അഭ്യാസപ്രകടനത്തിന്റെ വീഡിയോ വൈറൽ

എന്തുകൊണ്ടാണ് നോട്ടുകൾ നിർമ്മിച്ചിരിക്കുന്നത്?

കറൻസി നോട്ടുകൾ സാധാരണ കടലാസ് (വുഡ് പേപ്പർ) കൊണ്ടല്ല നിർമ്മിച്ചിരിക്കുന്നത്. ഇവയ്ക്ക് കൂടുതൽ ഈടുനിൽക്കാൻ വേണ്ടി കോട്ടണും കോട്ടൺ റാഗും ചേർന്ന മിശ്രിതമാണ് ഉപയോഗിക്കുന്നത്. പഴയതും ഉപയോഗശൂന്യവുമായ നോട്ടുകൾ ആർബിഐ തിരികെ ശേഖരിക്കുകയും അവ റീസൈക്കിൾ ചെയ്ത് മറ്റ് ഉൽപ്പന്നങ്ങളാക്കി മാറ്റുകയും ചെയ്യുന്നു.