നിങ്ങൾ കുടിക്കുന്നത് ശുദ്ധജലം തന്നെയോ? വാട്ടർ ഫിൽറ്ററുകൾ ചതിക്കുന്നുണ്ടോ എന്ന് എങ്ങനെയറിയാം?

മനുഷ്യശരീരത്തിന്റെ നിലനിൽപ്പിന് ആധാരമായ ജലം ഇന്ന് പലപ്പോഴും രോഗങ്ങൾക്കും കാരണമാകുന്നുണ്ട്. നഗരങ്ങളിലെ അപ്പാർട്ടുമെന്റുകളിലും വീടുകളിലും മുനിസിപ്പൽ സപ്ലൈ, കുഴൽക്കിണർ, ടാങ്കറുകൾ തുടങ്ങിയ വിവിധ സ്രോതസ്സുകളിൽ നിന്നുള്ള വെള്ളമാണ് എത്തുന്നത്.

ക്ലോറിൻ, സോഡിയം, മഗ്നീഷ്യം തുടങ്ങിയ ധാതുക്കളുടെ അമിതമായ സാന്നിധ്യം ഈ വെള്ളത്തെ അസ്വാദ്യകരമാക്കുക മാത്രമല്ല, ആരോഗ്യത്തിന് വെല്ലുവിളിയാകുകയും ചെയ്യുന്നു. ഈ സാഹചര്യത്തിലാണ് വാട്ടർ ഫിൽറ്ററുകൾ അനിവാര്യമായി മാറുന്നത്. എന്നാൽ നിങ്ങളുടെ വീട്ടിലെ ഫിൽറ്റർ കൃത്യമായാണോ പ്രവർത്തിക്കുന്നത്? അതോ നിങ്ങൾ ശുദ്ധമെന്ന് കരുതി കുടിക്കുന്നത് മലിനജലമാണോ? പരിശോധിക്കേണ്ട ചില കാര്യങ്ങൾ ഇതാ.

രുചിയും മണവും ശ്രദ്ധിക്കുക

ഫിൽറ്ററിൽ നിന്ന് വരുന്ന വെള്ളത്തിന് അസ്വാഭാവികമായ രുചിയോ മണമോ അനുഭവപ്പെടുന്നുണ്ടെങ്കിൽ അത് ഫിൽറ്റർ മാറ്റാനുള്ള സമയമായി എന്നതിന്റെ ആദ്യ സൂചനയാണ്. ക്ലോറിൻ ചുവയോ അല്ലെങ്കിൽ മണ്ണ് കലർന്ന നിറമോ കാണുന്നുണ്ടെങ്കിൽ ഫിൽറ്ററേഷൻ പ്രക്രിയ മന്ദഗതിയിലായെന്ന് ഉറപ്പിക്കാം. തെളിഞ്ഞ വെള്ളം ലഭിക്കുന്നില്ലെങ്കിൽ എത്രയും വേഗം സർവീസ് ചെയ്യേണ്ടതാണ്.

ധാതുക്കളുടെ അളവ് പരിശോധിക്കണം

വെള്ളത്തിലെ ലയിച്ചുചേർന്ന ധാതുക്കളുടെ അളവ് (Total Dissolved Solids – TDS) പരിശോധിക്കുന്നത് ആരോഗ്യത്തിന് അത്യന്താപേക്ഷിതമാണ്. കുടിക്കുന്ന വെള്ളത്തിൽ TDS നിലവാരം 50 മുതൽ 150 ppm വരെയായിരിക്കുന്നതാണ് ഉത്തമം. എന്നാൽ ഇത് 300 ppm വരെയാകാം. ഫിൽറ്റർ ചെയ്ത വെള്ളം ഒരു TDS മീറ്റർ ഉപയോഗിച്ച് പരിശോധിക്കുമ്പോൾ ഈ പരിധിക്ക് മുകളിലാണെങ്കിൽ ഫിൽറ്റർ മാറ്റുകയോ സർവീസ് ചെയ്യുകയോ വേണം. ധാതുക്കളുടെ അളവ് കൂടുന്നതും അമിതമായി കുറയുന്നതും ആരോഗ്യപ്രശ്നങ്ങൾക്ക് കാരണമാകും.

വെള്ളത്തിന്റെ ഒഴുക്കും ഇൻഡിക്കേറ്ററുകളും

ഫിൽറ്ററിൽ നിന്ന് വെള്ളം വരുന്നത് പണ്ടത്തെ അപേക്ഷിച്ച് കുറവാണെങ്കിൽ മെംബ്രണുകളിലോ പൈപ്പുകളിലോ മാലിന്യം അടിഞ്ഞുകൂടിയിട്ടുണ്ടാകാം. കൂടാതെ, ആധുനിക ഫിൽറ്ററുകളിലെ ഇൻഡിക്കേറ്റർ ലൈറ്റുകളും ഡിജിറ്റൽ ഡിസ്‌പ്ലേകളും നൽകുന്ന മുന്നറിയിപ്പുകൾ അവഗണിക്കുന്നത് അപകടകരമാണ്. ലൈറ്റുകൾ ചുവപ്പായിട്ടും ഉപയോഗം തുടരുന്നത് മലിനജലം കുടിക്കുന്നതിന് തുല്യമാണ്.

അറ്റകുറ്റപ്പണികൾ പ്രധാനം

ഫിൽറ്ററിൽ നിന്ന് വെള്ളം ലീക്ക് ആകുന്നുണ്ടെങ്കിൽ അത് യന്ത്രത്തിന്റെ തകരാറിനെയാണ് സൂചിപ്പിക്കുന്നത്. ഏകദേശം ഓരോ രണ്ട് മാസത്തിലൊരിക്കലും ഫിൽറ്റർ കൃത്യമായി സർവീസ് ചെയ്യുന്നത് യന്ത്രത്തിന്റെ ആയുസ്സ് വർദ്ധിപ്പിക്കാനും ശുദ്ധജലം ഉറപ്പാക്കാനും സഹായിക്കും. ചെറിയ അശ്രദ്ധകൾ പോലും മാരകമായ ജലജന്യ രോഗങ്ങൾക്ക് വഴിതെളിക്കുമെന്നതിനാൽ വാട്ടർ പ്യൂരിഫയറുകളുടെ കാര്യത്തിൽ പ്രത്യേക ജാഗ്രത വേണമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു.