ഫോൺ ഉപയോ​ഗിച്ച് ആധാർ അപ്ഡേറ്റ് ചെയ്യാം; ആറ് മാസത്തേക്ക് സേവനം സൗജന്യം

നിങ്ങളുടെ കൈയിൽ സ്മാർട്ട് ഫോണുണ്ടോ എങ്കിൽ ആധാർ അപ്ഡേറ്റ് ചെയ്യാനായി ഇനി ആധാർ സെന്റർ തപ്പി പോകേണ്ട ആവശ്യമില്ല. മാത്രവുമല്ല ആറു മാസത്തേക്ക് ആധാർ കാർഡിലെ വിവരങ്ങൾ പുതുക്കുന്നതിന് ഫീസ് നൽകേണ്ട ആവശ്യവുമില്ല. ഔദ്യോ​ഗിക ആ​ധാർ ആപ്പ് വഴിയാണ് പുതിയ സേവനങ്ങൾ ലഭ്യമാകുക.

2026 ജൂലൈ ഒന്ന് മുതൽ ആറു മാസത്തേക്ക്, അതായത് 2026 ഡിസംബർ വരെയാണ് സൗജന്യമായി ആധാർ വിവരങ്ങൾ അപ്ഡേറ്റ് ചെയ്യാൻ സാധിക്കുക. ആധാർ ആപ്പ് വഴി നമ്മൾക്ക് സ്വയം തന്നെ ഈ മെയിൽ ഐഡി പുതുക്കാനും ചേർക്കാനും സാധിക്കും. ഈ സേവനത്തിന് ഈടാക്കിയിരുന്ന എഴുപത്തിയഞ്ച് രൂപ ഫീസ് ഈ കാലയളവിൽ യൂണിക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) ഒഴിവാക്കുകയും ചെയ്തിട്ടുണ്ട്.

also read:പെട്രോളിനും ഗ്യാസിനും പിന്നാലെ വില വർധിപ്പിച്ച് ടെലികോം കമ്പനികൾ

ഐഓഎസ് ആൻഡ്രോയിഡ് പ്ലാറ്റ്ഫോമുകളിൽ ഔദ്യോ​ഗിക ആധാർ ആപ്പ് ലഭ്യവുമാണ്. ഈ മെയിൽ വിലാസം ആധാറിൽ അപ്ഡേറ്റ് ചെയ്യുന്നത് ​ഗൗരവമായി തന്നെ കാണണമെന്നാണ് അധികൃതർ അറിയിച്ചിട്ടുള്ളത്. ആധാറിൽ ഈ മെയിൽ ഐഡി അപ്ഡേറ്റാണെങ്കിൽ നമ്മുടെ ആധാർ വിവരങ്ങൾ ആരെങ്കിലും പരിശോധിക്കുകയോ ഉപയോ​ഗിക്കുകയോ ചെയ്യുകയാണെങ്കിൽ ഇമെയിൽ വഴി തത്സമയം തന്നെ അക്കാര്യം അറിയാൻ സാധിക്കും. ഇതു വഴി ആധാർ നമ്മുടെ അറിവില്ലാതെ ആരെങ്കിലും ദുരുപയോ​ഗം ചെയ്യുകയാണെങ്കിൽ അതും നമ്മൾക്ക് കൃത്യസമയത്ത് തന്നെ തിരിച്ചറിയാൻ സാധിക്കുകയും ചെയ്യും. ആധാർ ദുരുപയോ​ഗം ചെയ്യപ്പെടുന്നത് തടയാനും സുരക്ഷ വർധിപ്പിക്കാനും ഈ ഫീച്ചർ സഹായിക്കുകയും ചെയ്യും.

പൊതുജനങ്ങളിൽ നിന്ന് പുതിയ ഫീച്ചറിന് വലിയ പിന്തുണയാണ് ലഭിക്കുന്നതെന്നാണ് അധികൃതർ നൽകുന്ന വിവരങ്ങൾ. ഫീച്ചർ ലൈവായി രണ്ട് ദിവസത്തിനുള്ളിൽ രണ്ടരലക്ഷത്തിലധികം ആളുകൾ ഈ-മെയിൽ ഐഡി അപ്ഡേറ്റ് ചെയ്തതായും കേന്ദ്ര ഇലക്ട്രോണിക്സ്-ഐടി മന്ത്രാലയം അറിയിച്ചിട്ടുണ്ട്. ഈ മെയിൽ അപ്ഡേറ്റ് ചെയ്യുന്നതിനായി ആധാർ ആപ്പ് ഡൗൺലോഡ് ചെയ്യുകയോ. നിലിവിലെ ആപ്പ് അപ്ഡേറ്റ് ചെയ്യുകയോ ചെയ്യണം. തുടർന്ന് ആപ്പിലെ ഈ മെയിൽ അപ്ഡേറ്റ് എന്ന ഓപ്ഷൻ ഉപയോ​ഗിച്ച് ഈ മെയിൽ മാറ്റാൻ സാധിക്കുന്നതാണ്.

ഉപഭോക്താക്കൾക്ക് ആധാറിലെ മൊബൈൽ നമ്പറും വിലാസവും മാറ്റാൻ സാധിക്കുന്ന സേവനവും ഇതിനകം തന്നെ ആപ്പിൽ ലഭ്യമാണ്. നാലു കോടിയിലധികം ആളുകൾ മൊബൈൽ നമ്പറും പത്തുലക്ഷത്തിലധികം ആളുകൾ വിലാസവും ആപ്പ് ഉപയോ​ഗിച്ച് അപ്ഡേറ്റ് ചെയ്തിട്ടുണ്ടെന്നാണ് വിവരങ്ങൾ.