ഐസിഎസ്ഇ – ഐഎസ്‍സി പത്ത്, പന്ത്രണ്ട് പരീക്ഷാഫലം; വൻ വിജയ ശതമാനവുമായി തിളങ്ങി കേരളം

കൗൺസിൽ ഫോർ ഇന്ത്യൻ സ്കൂൾ സർട്ടിഫിക്കറ്റ് എക്സാമിനേഷൻസ് (സിഐഎസ്സിഇ) നടത്തിയ ഐസിഎസ്ഇ (പത്താം ക്ലാസ്), ഐഎസ്സി (പന്ത്രണ്ടാം ക്ലാസ്) പരീക്ഷകളുടെ ഫലം പ്രഖ്യാപിച്ചു. https://cisce.org/ എന്ന വെബ്സൈറ്റിലോ ഡിജിലോക്കർ പ്ലാറ്റ്‌ഫോം വഴിയോ റിസൾട്ട് അറിയാം. കേരളത്തിൽ നിന്നുള്ള വിദ്യാർത്ഥികൾ ഉയർന്ന വിജയ നിരക്ക് രേഖപ്പെടുത്തി. ഐസിഎസ്ഇ പരീക്ഷയിൽ 99.94 ശതമാനവും ഐഎസ്‌സി 100% പരീക്ഷയിൽ ശതമാനവുമാണ് കേരളത്തിൽ നിന്നുള്ള വിദ്യാർത്ഥികളുടെ വിജയ നിരക്ക്. കഴിഞ്ഞ വർഷം ഐസിഎസ്ഇയിൽ 100% ഉം ഐഎസ്‌സി പരീക്ഷയിൽ 99.96% ഉം ആയിരുന്നു. ഈ വർഷം സംസ്ഥാനത്തെ വിജയ ശതമാനം ദേശീയ ശരാശരിയേക്കാൾ കൂടുതലാണ്.

ALSO READ; ദേശീയ സുരക്ഷാ ഉപദേശക സമിതി പുനഃസംഘടിപ്പിച്ചു; മുൻ റോ മേധാവി അലോക് ജോഷിയെ ചെയർമാനായി നിയമിച്ചു

ഐസിഎസ്ഇ പരീക്ഷയിൽ സംസ്ഥാനത്ത് നിന്ന് 7,737 വിദ്യാർത്ഥികൾ പരീക്ഷ എഴുതിയതിൽ 3,761 ആൺകുട്ടികളും 3,971 പെൺകുട്ടികളും ഉൾപ്പെടെ 7,732 പേർ വിജയിച്ചു. പെൺകുട്ടികളുടെ വിജയ നിരക്ക് (99.95%) ആൺകുട്ടികളേക്കാൾ (99.92%) അല്പം കൂടുതലാണ്. ഐഎസ്‌സി പരീക്ഷയിൽ സംസ്ഥാനത്ത് നിന്ന് പരീക്ഷ എഴുതിയ 2850 വിദ്യാർത്ഥികളും പരീക്ഷ പാസായി. ഇതിൽ 1,390 ആൺകുട്ടികളും 1,460 പെൺകുട്ടികളും ഉൾപ്പെടുന്നു.

യുണീക് ഐഡിയും ഇൻഡക്സ് നമ്പറും ഉപയോ​ഗിച്ച് വിദ്യാർഥികൾക്ക് അവരുടെ ഡിജിറ്റൽ മാർക്ക്‌ഷീറ്റ് ഡൗൺലോഡ് ചെയ്യാൻ സാധിക്കും. ഫെബ്രുവരി 18 നായിരുന്നു പത്താം ക്ലാസ് പരീക്ഷ തുടങ്ങിയത് . ഫെബ്രുവരി 13 ന് പന്ത്രണ്ടാം ക്ലാസ് പരീക്ഷയും ആരംഭിച്ചു. 12 ാം ക്ലാസിൽ പരീക്ഷ എഴുതിയ 99,551 വിദ്യാര്‍ഥികളിൽ 98,578 പേർ തുടർപഠനത്തിന് അർഹരായി. 99.45 ശതമാനമാണ് പെണ്‍കുട്ടികളുടെ വിജയശതമാനം. 98.64 ശതമാനം ആണ്‍കുട്ടികളും ജയിച്ചു.