മുമ്പ് പ്രായമായവരിലായിരുന്നു സ്ഥിരമായി ശരീരവേദന കണ്ടുവന്നിരുന്നതെങ്കിൽ, ഇന്ന് കാര്യങ്ങൾ അങ്ങനെയല്ല. പ്രായഭേദമന്യേ എല്ലാവരിലും ശരീരവേദന ഒരു സ്ഥിരക്കാഴ്ചയാണ്. ഇരുപതുകളിലും മുപ്പതുകളിലും തന്നെ നിരന്തരമായ കഴുത്ത് വേദനയും നടുവേദനയും യുവ പ്രൊഫഷണലുകളെ വേട്ടയാടുന്നുണ്ട്. ഓഫീസിൽ ഇരുന്ന് ജോലി ചെയ്യുന്നവരിലും വർക്ക് ഫ്രം ഹോം ചെയ്യുന്നവരിലും പല ആരോഗ്യപ്രശ്നങ്ങളും കണ്ടുവരുന്നു.
ജോലി ചെയ്യാൻ ഇരിക്കുന്ന രീതിയാണ് ഇതിനുപിന്നിലെ പ്രധാന കാരണം. ലാപ്ടോപ്പിനും മൊബൈൽ ഫോണിനും മുമ്പിൽ മണിക്കൂറുകളോളം ഒറ്റ ഇരിപ്പിൽ ഇരുന്ന് ജോലി ചെയ്യുന്നവരാണ് ഇന്നത്തെ ഒട്ടുമിക്ക യുവാക്കളും. ഇത് തന്നെയാണ് ഈ ആരോഗ്യപ്രശ്നങ്ങൾക്കും കാരണം.
ദീർഘനേരം അനങ്ങാതെ ഇരുന്ന് ജോലി ചെയ്യുന്നത് നട്ടെല്ല്, പേശികൾ, സന്ധികൾ എന്നിവയിൽ തുടർച്ചയായ സമ്മർദ്ദമുണ്ടാകുന്നതിന് കാരണമാകുന്നു. കാലക്രമേണ, ഇത് വിട്ടുമാറാത്ത വേദന, പേശികളുടെ മുറുക്കം, വഴക്കമില്ലായ്മ എന്നിവയിലേക്ക് നയിക്കും.
ALSO READ: വാഷിങ് മെഷീനിൽ ഷൂ കഴുകാം ? അറിഞ്ഞിരിക്കാം ഈ മഴക്കാലത്ത് എങ്ങനെ ഷൂസ് വൃത്തിയാക്കാം എന്ന്
വീട്ടിൽ ഇരുന്ന് ജോലി ചെയ്യുന്നത് പ്രശ്നം കൂടുതൽ വഷളാക്കുന്നു. പലയാളുകളും സോഫ, കിടക്ക, മേശ തുടങ്ങിയ സ്ഥലങ്ങളിൽ ഇരുന്നാണ് ജോലി ചെയ്യാറ്. ശരിയായ രീതിയിൽ ഇരുന്ന് ജോലി ചെയ്യാത്തതും ആരോഗ്യപ്രശ്നങ്ങളുണ്ടാക്കും. തെറ്റായ സ്ക്രീൻ ലെവൽ, തെറ്റായ ഇരിപ്പിടം, ദീർഘനേരമുള്ള ലാപ്ടോപ്പുകളുടെ ഉപയോഗം എന്നിവ ക്രമേണ അസ്ഥി-പേശി വ്യവസ്ഥയിൽ വിട്ടുമാറാത്ത സമ്മർദ്ദത്തിന് കാരണമാകും.
ശരീരവേദന എപ്പോഴും ശാരീരികമായ കാരണങ്ങൾ കൊണ്ട് മാത്രമല്ല ഉണ്ടാകുന്നത് എന്ന് വിദഗ്ധർ മുന്നറിയിപ്പ് നൽകുന്നു. സമ്മർദ്ദം നിറഞ്ഞ നിങ്ങളുടെ ജോലി അന്തരീക്ഷവും ആരോഗ്യത്തിന് വെല്ലുവിളിയായി മാറും. തോളിലെ കാഠിന്യം, തലവേദന, താടിയെല്ലിന്റെ പിരിമുറുക്കം, ശരീര ക്ഷീണം എന്നിവയെല്ലാം യുവാക്കളിൽ ഇന്ന് സ്ഥിരമായി കണ്ടുവരുന്നു.
ആളുകൾ പലപ്പോഴും പ്രാരംഭ ലക്ഷണങ്ങളെ അവഗണിക്കുന്നു എന്നത് നിലവിലുള്ള മറ്റൊരു പ്രധാന ആശങ്കയാണ്. വേദന തങ്ങളുടെ ഉൽപ്പാദനക്ഷമതയെയോ ഏകാഗ്രതയെയോ ചലനങ്ങളെയോ ബാധിക്കുന്നത് വരെ പലരും വേദന സഹിച്ചുകൊണ്ട് ജോലി തുടരുന്നു. എന്നാൽ, ചെറിയ ലക്ഷണങ്ങളെ പോലും അവഗണിക്കാതെ തക്കതായ രീതിയിൽ ഇത്തരം പ്രശ്നങ്ങൾക്ക് പരിഹാരം കാണേണ്ടതുണ്ട്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
