ഇന്ത്യയുടെ ബാറ്റിങ് ഓർഡർ വെളിപ്പെടുത്തി റിഷഭ് പന്ത്; ശുഭ്മാൻ ഗിൽ നാലാം നമ്പരിൽ

ലണ്ടൻ: വെള്ളിയാഴ്ച ആരംഭിക്കുന്ന ഇംഗ്ലണ്ടിനെതിരായ ആദ്യ ടെസ്റ്റ് മത്സരത്തിൽ ഇന്ത്യൻ ക്യാപ്റ്റൻ ശുഭ്മാൻ ഗിൽ നാലാം സ്ഥാനത്ത് ബാറ്റ് ചെയ്യുമെന്ന് വിക്കറ്റ് കീപ്പർ ബാറ്റ്സ്മാൻ ഋഷഭ് പന്ത് ബുധനാഴ്ച സ്ഥിരീകരിച്ചു. ആരാണ് മൂന്നാം സ്ഥാനത്ത് കളിക്കുക എന്നതിനെക്കുറിച്ചുള്ള നിഗൂഢത തുടരുന്നതിനിടെ, അഞ്ചാമനായി താൻ തുടരുമെന്ന് പന്ത് വ്യക്തമാക്കി.

“മൂന്നാം സ്ഥാനത്ത് ആരാണ് കളിക്കുക എന്നതിനെക്കുറിച്ച് ഇപ്പോഴും ചർച്ച നടക്കുകയാണ്, പക്ഷേ നാലും അഞ്ചും സ്ഥാനങ്ങളിൽ ആര് ബാറ്റുചെയ്യുമെന്ന കാര്യത്തിൽ ഇതിനോടകം തീരുമാനമായിട്ടുണ്ട്. ശുഭ്മാൻ നാലാം സ്ഥാനത്ത് ബാറ്റ് ചെയ്യുമെന്ന് ഞാൻ കരുതുന്നു, ഞാൻ അഞ്ചാമതായി തുടരും, ബാക്കിയുള്ള കാര്യങ്ങൾ, ഞങ്ങൾ അതിനെക്കുറിച്ച് ചർച്ച ചെയ്യുന്നത് തുടരും,” പന്ത് പത്രസമ്മേളനത്തിൽ മാധ്യമപ്രവർത്തകരോട് പറഞ്ഞു.

ALSO READ; ബി.സി.സി.ഐക്ക് കനത്ത പ്രഹരം; കൊച്ചി ടസ്ക്കേഴ്സിന് 538 കോടി രൂപ നൽകണം, വിധി ബോംബെ ഹൈക്കോടതി ശരിവച്ചു

ടെസ്റ്റിൽ ഓപ്പണറായാണ് ഗിൽ കരിയർ ആരംഭിച്ചത്. പിന്നീട് മൂന്നാം സ്ഥാനത്തേക്കും, അതിനുശേഷം നാലാം സ്ഥാനത്തേക്കും മാറുകയായിരുന്നു. രോഹിത് ശർമ്മയും വിരാട് കോഹ്‌ലിയും വിരമിച്ചതിന് ശേഷമുള്ള ഇന്ത്യയുടെ ആദ്യ ടെസ്റ്റ് മത്സരമാണിത്. നാലാം സ്ഥാനത്ത് മുമ്പ് 7564 റൺസ് നേടിയ താരത്തിന്റെ ഉത്തരവാദിത്തം ഗില്ലിന് ഏറ്റെടുക്കേണ്ടി വരും. 2024 ജൂലൈയിൽ സിംബാബ്‌വെയ്‌ക്കെതിരായ അഞ്ച് മത്സരങ്ങളുടെ ടി20 പരമ്പരയിലായിരുന്നു 25 കാരന് ഇന്ത്യയെ നയിച്ചതിന്റെ ഏക മുൻ പരിചയം.