സബാഷ് പാണ്ഡെ! ഐപിഎല്ലിൽ ഗുജറാത്തിനെതിരെ രാജസ്ഥാനെ ജയിപ്പിച്ച ഘടകങ്ങൾ

ഈ ഐപിഎൽ സീസണിലെ ഒമ്പതാം മത്സരത്തിൽ രാജസ്ഥാൻ റോയൽസ് ആറ് റൺസിന് ഗുജറാത്തിനെ വീഴ്ത്തിയതോടെ പോയിന്‍റ് നിലയിൽ അവർ ഒന്നാമതെത്തി. അത്യന്തം ആവേശകരമായ മത്സരത്തിൽ അച്ചടക്കത്തോടെ പന്തെറിഞ്ഞ തുഷാർ ദേഷ്പാണ്ഡെയുടെ പ്രകടനമാണ് രാജസ്ഥാന് തുണയായത്. അവസാന ഓവറിൽ 11 റൺസായിരുന്നു ഗുജറാത്തിന് വേണ്ടിയിരുന്നത്. എന്നാൽ കണിശതയോടെ പന്തെറിഞ്ഞ ദേഷ്പാണ്ഡെ വെറും നാല് റൺസ് മാത്രമാണ് വഴങ്ങിയത്. ക്യാപ്റ്റൻ റാഷിദ് ഖാന്റെ വിക്കറ്റ് നേടുകയും ചെയ്തു. ബാറ്റർമാർ തകർത്തടിച്ച മത്സരത്തിൽ ദേഷ്പാണ്ഡെ മൂന്ന് ഓവറിൽ 24 റൺസ് വഴങ്ങി ഒരു വിക്കറ്റെടുത്തു.

211 എന്ന ലക്ഷ്യം പിന്തുടർന്ന ടൈറ്റൻസിന് ഇൻഫോം ബാറ്ററും ഓപ്പണറുമായ സായ് സുദർശൻ മികച്ച തുടക്കം നൽകി. 44 പന്തിൽ നിന്ന് അദ്ദേഹം 73 റൺസ് നേടി. ഒമ്പത് ബൗണ്ടറികളും മൂന്ന് സിക്സറുകളും ഉൾപ്പെടുന്നതായിരുന്നു ആ ഇന്നിംഗ്സ്. ജോസ് ബട്ട്ലർ 26 റൺസും കുമാർ കുശാഗ്ര 18 റൺസും നേടി. എന്നാൽ സായ് സുദർശൻ വീണതോടെ ഗുജറാത്ത് പ്രതിരോധത്തിലായി. അവസാന ഓവറുകളിൽ റാഷിദ് ഖാനും, കാഗിസോ റബാഡയും ചേർന്ന് രക്ഷാപ്രവർത്തനം നടത്തിയെങ്കിലും ദേശ്പാണ്ഡെയുടെ അച്ചടക്കത്തിന് മുന്നിൽ അടിയറവ് പറയേണ്ടിവന്നു. അവസാന ഓവറിൽ മികച്ച യോർക്കറുകൾ എറിഞ്ഞാണ് ദേശ്പാണ്ഡെ ഗുജറാത്തിന് തടഞ്ഞുനിർത്തിയത്.

41 റൺസ് വഴങ്ങിയെങ്കിലും മധ്യ ഓവറുകളിൽ മികച്ച രീതിയിൽ പന്തെറിയുകയും നാല് വിക്കറ്റെടുക്കുകയും ചെയ്ത രവി ബിഷ്ണോയിയും ഗുജറാത്തിന്റെ മുന്നേറ്റം തടഞ്ഞുനിർത്തുന്നതിൽ നിർണായക പ്രകടനമാണ് നടത്തിയത്. പേശിവലിവ് മൂലം ക്യാപ്റ്റൻ ശുഭ്മാൻ ഗിൽ കളിക്കാതിരുന്നതും ഗുജറാത്ത് ടൈറ്റൻസിന് തിരിച്ചടിയായി.

Also Read- കേട്ടില്ലേ? തന്നെ വിദേശ താരമെന്ന് വിളിച്ചപ്പോഴുള്ള വിരാട് കോഹ്‌ലിയുടെ മറുപടി

നേരത്തെ ആദ്യം ബാറ്റുചെയ്ത രാജസ്ഥാന് വേണ്ടി ഓപ്പണർമാരായ യശസ്വി ജയ്‌സ്വാളും വൈഭവ് സൂര്യവംശിയും പവർപ്ലേയിൽ നടത്തിയ വെടിക്കെട്ട് ബാറ്റിങ് 200ന് മുകളിൽ സ്കോർ നേടുന്നതിൽ മികച്ച അടിത്തറ പാകി. ആദ്യ ഏഴ് ഓവറുകളിൽ തന്നെ 70 റൺസിന്റെ അതിവേഗ പാർട്ണർഷിപ്പ് ഇരുവരും ചേർന്ന് കെട്ടിപ്പടുത്തു. സൂര്യവംശി വെറും 18 പന്തിൽ നിന്ന് 31 റൺസ് നേടി, ജയ്‌സ്വാൾ 36 പന്തിൽ നിന്ന് 55 റൺസ് നേടി. സൂര്യവംശിയെ പുറത്താക്കി റാഷിദ് ഖാൻ ഓപ്പണിംഗ് കൂട്ടുകെട്ട് തകർത്തപ്പോൾ, ക്രീസിലെത്തിയ ധ്രുവ് ജൂറൽ തകർപ്പൻ ഫോം തുടർന്നു. മധ്യ ഓവറുകളിൽ നിറഞ്ഞാടിയ അദ്ദേഹം വെറും 42 പന്തിൽ നിന്ന് 75 റൺസ് നേടി. നാല് ബൗണ്ടറികളും അഞ്ച് കൂറ്റൻ സിക്സറുകളും പറത്തിയാണ് ജൂറൽ 75 റൺസ് നേടിയത്.

20 ഓവറിൽ ആറിന് 210 എന്ന മികച്ച സ്കോർ നേടിയതോടെ രാജസ്ഥാൻ മത്സരത്തിൽ വ്യക്തമായ മേധാവിത്വം നേടിയിരുന്നു. ഗുജറാത്ത് ടൈറ്റൻസിന് വേണ്ടി, കാഗിസോ റബാഡയാണ് ബോളിങ്ങിൽ തിളങ്ങിയത്. നാല് ഓവറിൽ 42 റൺസ് വഴങ്ങി 2 വിക്കറ്റുകൾ നേടി.