മര്യാദകൾ ലംഘിച്ച് ഇസ്രയേൽ; ​ഗാസയിൽ വീണ്ടും ആക്രമണം, ​ഗർഭിണിയും കുട്ടികളുമുൾപ്പെടെ 12 മരണം

എല്ലാ മര്യാദകളും ലംഘിക്കുകയാണ് ഇസ്രയേൽ. ​ഗാസയിൽ ഇന്നലെ നടത്തിയ ആക്രമണത്തിൽ 12 പേരാണ് കൊല്ലപ്പെട്ടത്. ഒരു ​ഗർഭിണിയും രണ്ട് ആൺകുട്ടികളും കൊല്ലപ്പെട്ടവരിലുണ്ട്. സവായ്ദ പട്ടണത്തിലും ആക്രമണമുണ്ടായി. പൊലീസ് വാഹനത്തിന് നേരെ നടന്ന ആക്രമണത്തിൽ എട്ട് പൊലീസ് ഉദ്യോ​ഗസ്ഥരാണ് കൊല്ലപ്പെട്ടത്.

യുദ്ധം അവസാനിപ്പിക്കാൻ ലക്ഷ്യമിട്ടുള്ള വെടിനിർത്തൽ നിലനിൽക്കെയാണ് ഇസ്രയേലിൻ്റെ ഈ നടപടി. അന്താരാഷ്ട്ര നിയമങ്ങളെപ്പോലും കാറ്റിൽപ്പറത്തിയാണ് ​ഇസ്രയേലിൻ്റെ ഈ കടന്നാക്രമണം. 2023 ഒക്ടോബർ 7-ന് ആരംഭിച്ച യുദ്ധത്തിൽ ഇതുവരെ 72,200-ലധികം പലസ്തീനികൾ കൊല്ലപ്പെട്ടിട്ടുണ്ട്. ഇസ്രയേലിൻ്റെ കടന്നുകയറ്റത്തിൽ വലിയ പ്രതിഷേധങ്ങളാണ് ഉയർന്ന് വരുന്നത്.

Also read:‘മരിച്ച’ നെതന്യാഹു കോഫി കുടിക്കുന്ന വീഡിയോ ? വീണ്ടും എഐ ആണോ ? സോഷ്യൽ മീഡിയയിൽ തർക്കം തുടരുന്നു

വെടി നിർത്തലിന് ശേഷവും നാല് ഇസ്രയേലി സൈനികരുൾപ്പെടെ ഇറാനിൽ കൊല്ലപ്പെട്ടിട്ടുണ്ട്. രണ്ട് വർഷത്തിലേറെയാണ് ​ഗാസയിൽ യുദ്ധം നടന്നത്. കൊല്ലപ്പെട്ടവരിൽ കൂടുതലും സ്ത്രീകളും കുട്ടികളുമാണെന്നതാണ് യുദ്ധത്തിൻ്റെ ഭീകരത വർധിപ്പിക്കുന്നത്. അതേസമയം ഇസ്രയേലിൻ്റേയും അമേരിക്കയുടേയും നേതൃത്വത്തിൽ ഇറാനെതിരെ നടത്തുന്ന ആക്രമണത്തിൻ്റെ അലയടികൾ ലോകമെമ്പാടും വ്യാപിച്ച് കൊണ്ടിരിക്കുകയാണ്.