ഗ്യാസ് തീർന്നാലും അടുക്കളയ്ക്ക് പൂട്ട് വീഴില്ല ! എൽപിജി ക്ഷാമത്തെ മറികടക്കാൻ ഇതാ ചില വഴികൾ…

പശ്ചിമേഷ്യയിൽ യുദ്ധം കടുത്തതോടെ ആഗോള ഊർജ്ജ വിപണിയിൽ വലിയ അനിശ്ചിതത്വമാണ് നിലനിൽക്കുന്നത്. ഹോർമുസ് കടലിടുക്ക് വഴിയുള്ള കപ്പൽ ഗതാഗതം തടസ്സപ്പെട്ടതോടെ ഇന്ത്യയിലേക്കുള്ള എൽപിജി വരവ് കുറഞ്ഞു. ഇത് കേരളത്തിലെ ഹോട്ടൽ മേഖലയെയും വീടുകളെയും ഒരുപോലെ ബാധിച്ചിരിക്കുകയാണ്.

പല ഹോട്ടലുകളിലും ചായയും ഭക്ഷണവും കിട്ടാനില്ലാത്ത അവസ്ഥയാണുള്ളത്. സിലിണ്ടറുകൾക്കായി ആഴ്ചകളോളം കാത്തിരിക്കേണ്ടി വരുന്ന ഈ സാഹചര്യത്തിൽ ബദൽ മാർഗ്ഗങ്ങൾ തേടുകയല്ലാതെ മറ്റു വഴികളില്ല.

ALSO READ : ഗ്യാസ് സിലിണ്ടർ കൂടുതൽ ദിവസം ഉപയോഗിക്കാൻ ഈ വഴികൾ ശീലമാക്കൂ …

വൈദ്യുതി ഉപയോഗിച്ചുള്ള പാചകം

ഗ്യാസ് സിലിണ്ടറിന് ഏറ്റവും പ്രായോഗികമായ ബദൽ വൈദ്യുതിയിൽ പ്രവർത്തിക്കുന്ന ഉപകരണങ്ങളാണ്.

• ഇൻഡക്ഷൻ കുക്ക് ടോപ്പുകൾ: വെള്ളം തിളപ്പിക്കാനും വറുക്കാനും കറികൾ വയ്ക്കാനും ഇൻഡക്ഷൻ സ്റ്റൗവുകൾ മികച്ചതാണ്.
• റൈസ് കുക്കറും ഇലക്ട്രിക് പ്രഷർ കുക്കറും: ചോറ് വയ്ക്കാനും പയർ വർഗ്ഗങ്ങൾ വേവിക്കാനും ഇപ്പോൾ തന്നെ പല വീടുകളും ഇവയിലേക്ക് മാറിക്കഴിഞ്ഞു.
• ഇലക്ട്രിക് കെറ്റിൽ: ചായ വയ്ക്കാനും മുട്ട പുഴുങ്ങാനും ഇൻസ്റ്റന്റ് നൂഡിൽസ് പോലുള്ളവ തയ്യാറാക്കാനും കെറ്റിൽ ഉപയോഗിക്കുന്നത് ഗ്യാസ് ലാഭിക്കാൻ സഹായിക്കും.

പാരമ്പര്യത്തിലേക്ക് ഒരു മടക്കം
നഗരങ്ങളിലടക്കം ഇന്ന് പ്രായോഗികമായി ഉപയോഗിക്കാവുന്നതാണ് ആധുനിക രീതിയിലുള്ള വിറകടുപ്പുകൾ.

• പുകയില്ലാത്ത അടുപ്പുകൾ: ‘ആലുവ അടുപ്പുകൾ’ പോലുള്ളവ കുറഞ്ഞ വിറക് ഉപയോഗിച്ച് കൂടുതൽ ചൂട് നൽകുന്നവയാണ്.

ALSO READ : പാകം ചെയ്ത ചിക്കൻ ഫ്രിഡ്ജിൽ എത്ര ദിവസം വെക്കാം? ഇക്കാര്യങ്ങൾ ശ്രദ്ധിച്ചില്ലെങ്കിൽ പണി കിട്ടും

മൈക്രോവേവ് ഓവൻ

നേരത്തെ തയ്യാറാക്കിയ ഭക്ഷണം ചൂടാക്കാനും ലളിതമായ പാചകത്തിനും ഓവനുകളെ ആശ്രയിക്കാം. ഇത് ഗ്യാസ് ഉപയോഗം ഗണ്യമായി കുറയ്ക്കാൻ സഹായിക്കും.

ഊർജ്ജം ലാഭിക്കാൻ പാചകം ആവശ്യമില്ലാത്ത വിഭവങ്ങൾ ഭക്ഷണക്രമത്തിൽ ഉൾപ്പെടുത്താം. നോ-കുക്ക് മീൽസ്: സലാഡുകൾ, പഴങ്ങൾ, സാൻഡ്‌വിച്ചുകൾ, ഓവർനൈറ്റ് ഓട്‌സ് എന്നിവ ഈ സമയത്ത് ശീലമാക്കുന്നത് ആരോഗ്യകരവും ഇന്ധനക്ഷമവുമാണ്.

കമ്മ്യൂണിറ്റി കുക്കിംഗ്

അയൽവാസികളോ ബന്ധുക്കളോ ചേർന്ന് ഒരു അടുക്കള പങ്കിടുന്നതും ഒരേ സമയം കൂടുതൽ പേർക്ക് ഭക്ഷണം പാകം ചെയ്യുന്നതും ഇന്ധന ലാഭത്തിന് സഹായിക്കും.

എൽപിജി വിതരണം പഴയ രീതിയിലാകാൻ സമയമെടുക്കുമെന്നതിനാൽ, ലഭ്യമായ ഗ്യാസ് സിലിണ്ടറുകൾ കരുതലോടെ ഉപയോഗിക്കുക. ഒപ്പം മുകളിൽ പറഞ്ഞ വൈദ്യുത ഉപകരണങ്ങൾ കൂടി അടുക്കളയുടെ ഭാഗമാക്കുന്നത് ഇത്തരം അടിയന്തര സാഹചര്യങ്ങളെ നേരിടാൻ സഹായിക്കും.