ഓറിയൻ്റൽ സ്കൂളുകളിൽ ഇനി മലയാളം മുഴങ്ങും: ‘മലയാളശ്രീ’ പദ്ധതിക്ക് തുടക്കമായി

സംസ്ഥാനത്തെ ഓറിയന്റൽ സ്കൂളുകളിലെ വിദ്യാർഥികൾക്ക് മാതൃഭാഷാ പഠനത്തിന് അവസരമൊരുക്കുന്ന ‘മലയാളശ്രീ’ പദ്ധതി മന്ത്രി വി ശിവൻകുട്ടി ഉദ്ഘാടനം ചെയ്തു. ഒരു കുട്ടിക്ക് മാതൃഭാഷ നിഷേധിക്കുന്നത് സ്വന്തം മണ്ണിനെയും സംസ്കാരത്തെയും അറിയുന്നതിൽ നിന്ന് അവരെ വിലക്കുന്നതിന് തുല്യമാണെന്നും ആ നീതിനിഷേധം ‘മലയാളശ്രീ’യിലൂടെ സർക്കാർ അവസാനിപ്പിക്കുകയാണെന്നും മന്ത്രി ഉദ്ഘാടന പ്രസംഗത്തിൽ പറഞ്ഞു.

2011-ൽ ഉത്തരവിറങ്ങിയിട്ടും പൂർണ്ണമായി നടപ്പാകാതിരുന്ന പദ്ധതിയാണ് സർക്കാർ നിശ്ചയദാർഢ്യത്തോടെ യാഥാർത്ഥ്യമാക്കിയത്. കേരളത്തിലെ 9 ജില്ലകളിലായി പ്രവർത്തിക്കുന്ന 38 ഓറിയന്റൽ സ്കൂളുകളിലെ കുട്ടികൾക്ക് ഇനി മുതൽ സംസ്കൃതത്തിനും അറബിക്കിനും ഒപ്പം മലയാളവും പഠിക്കാം. എസ് സി ഇ ആർ ടിയുടെ നേതൃത്വത്തിൽ സാക്ഷരതാ മിഷന്റെ തുല്യതാ പാഠപുസ്തകങ്ങൾ ആധാരമാക്കിയാണ് ഇതിനായുള്ള സിലബസ് തയ്യാറാക്കിയിരിക്കുന്നത്. ഈ അധ്യയന വർഷം തന്നെ 7, 10 ക്ലാസുകളിൽ പൊതുപരീക്ഷ നടക്കും. ഏഴാം തരത്തിൽ 2105 കുട്ടികളും പത്താം തരത്തിൽ 2445 കുട്ടികളുമാണ് പരീക്ഷ എഴുതുന്നത്. ഏഴാം തരം പരീക്ഷ സാക്ഷരതാ മിഷനും പത്താംതരം പരീക്ഷ പരീക്ഷാഭവനും നടത്തും.

ALSO READ: നിയമസഭ പുസ്തകോത്സവത്തിൽ വിദ്യാർത്ഥികൾക്കായി ഒരുക്കിയ സ്റ്റുഡന്റസ് കോർണർ ഉദ്ഘാടനം ചെയ്തു

ചടങ്ങിൽ എസ് സി ഇ ആർ ടി ഡയറക്ടർ ഡോ. ജയപ്രകാശ് ആർ.കെ അധ്യക്ഷത വഹിച്ചു . കെ.ടി ജലീൽ എം എൽ എ മുഖ്യാതിഥിയായി പങ്കെടുത്തു. സാക്ഷരതാ മിഷൻ ഡയറക്ടർ ഒലീന എ ജി സ്വാഗതം പറഞ്ഞു. പൊതുവിദ്യാഭ്യാസ ഡയറക്ടർ എൻ.എസ്.കെ ഉമേഷ് ഐ.എ.എസ്, പരീക്ഷാഭവൻ സെക്രട്ടറി സന്തോഷ് കുമാർ എസ്, ഓറിയൻ്റൽ സ്‌കൂൾ മാനേജ്‌മെൻ്റ് അസോസിയേഷൻ പ്രസിഡന്റ് എം.കെ അബ്‌ദുറഹ്‌മാൻ, സെക്രട്ടറി ഡോ. ഹിമരാജ് എന്നിവർ പങ്കെടുത്തു.