ഇത് സത്യമോ സ്വപ്നമോ? കാരൻസ് ക്ലാവിസ് വിപണിയിലേക്ക് എത്തിച്ച് കിയ, വില കേട്ടവര്‍ ഞെട്ടി!

വാഹനപ്രേമികള്‍ ഏറെ കാത്തിരുന്ന ഒരു ഫാമിലി കാര്‍ മോഡലായ കാരൻസ് ക്ലാവിസ് അടുത്തിടെയാണ് കിയ ലോഞ്ച് ചെയ്തത്. അടുത്തിടെ കമ്പനി വിപണിയിലേക്ക് കാരൻസിന് മികച്ച പ്രതികരണമാണ് ലഭിച്ചത്. ഇതിന് പിന്നാലെയാണ് കാരൻസ് ക്ലാവിസ് മോഡലുകൂടി വിപണിയിലെത്തിച്ച് വില്‍പ്പന കെങ്കേമമാക്കാന്‍ കമ്പനി ഒരുങ്ങിയത്.

ലോഞ്ചിന് രണ്ടാ‍ഴ്ചയ്ക്ക് ശേഷം ഇപ്പോ‍ഴിതാ കാര്‍ വിപണിയിലേക്ക് എത്തിച്ചിരിക്കുകയാണ് കിയ. ആറ്, ഏഴ് സീറ്റർ വേരിയൻ്റുകളില്‍ ഏഴ് ട്രിം ലെവലുകളിൽ വിപണിയിലെത്തിയ ക്ലാവിസിന്റെ വില 11.50 ലക്ഷം മുതൽ 21.50 ലക്ഷം രൂപ വരെയാണ്. കാരൻസ് എംപിവിയുടെ ഒരു ഫെയ്‌സ്‌ലിഫ്റ്റ് ആയ ക്ലാവിസിനെ പ്രീമിയം മോഡലായി കാരൻസിനൊപ്പമാണ് കമ്പനി വില്‍ക്കുക. ഇത്രയും സവിശേഷതകളോട് കൂടിയ ഈ ഫാമിലി കാര്‍ ഇത്ര കുറഞ്ഞ വിലയ്ക്ക് വിപണിയിലേക്ക് എത്തിക്കാൻ ധൈര്യപ്പെട്ട കിയയെ സമ്മതിച്ചേ മതിയാകൂ…

ALSO READ: ഡീസൽ ഓട്ടോമാറ്റിക് കാർ വൻ വിലക്കുറവിൽ; ഞെട്ടിച്ച് ടാറ്റയുടെ പുതിയ പ്രഖ്യാപനം

ഇനി കാറിൻ്റെ സവിശേഷതകളിലേക്ക് വന്നാല്‍, കോസ്മെറ്റിക് ഫ്രണ്ടിൽ, ചില ശ്രദ്ധേയമായ കോസ്മെറ്റിക് മാറ്റങ്ങൾ ഉണ്ടെങ്കിലും, ക്ലാവിസിനെ കാരൻസിന്റെ ഒരു ഡെറിവേറ്റീവായി ഉടനടി തിരിച്ചറിയാൻ കഴിയും. ഇതിന് ഇവി5 പോലുള്ള വിദേശ വിപണിയിലെ കിയയുടെ ചില പൂർണ്ണ-ഇലക്ട്രിക് ഓഫറുകളോട് സാമ്യമുണ്ട്.മുൻവശത്ത് ഹെഡ്‌ലാമ്പ് ക്ലസ്റ്ററുകളുമായി ബന്ധിപ്പിച്ചിരിക്കുന്ന ‘ഐസ് ക്യൂബ്’ എൽഇഡി ഹെഡ്‌ലൈറ്റുകളും എൽ-ആകൃതിയിലുള്ള ഡേടൈം റണ്ണിംഗ് ലാമ്പുകളും ഉണ്ട്. പുതിയ ബമ്പറുകളാണ് ഈ മോഡലില്‍ കാണാൻ ക‍ഴിയുന്നത്. ഇന്റഗ്രേറ്റഡ് ഡിആർഎല്ലുകൾ,ഫോക്‌സ് സ്‌കിഡ് പ്ലേറ്റുകൾ,പുതിയ ഡ്യുവൽ-ടോൺ അലോയ് വീലുകൾ എന്നിവയെല്ലാം ഈ മോഡലിൻ്റെ എക്സ്റ്റീരിയര്‍ ലുക്കിനെ ഗംഭീരമാക്കുന്നുണ്ട്.

അതേസമയം ക്ലാവിസിന്റെ ക്യാബിൻ ലേഔട്ട് കാരെൻസിൽ നിന്ന് വളരെ വ്യത്യസ്തമാണ്. ക്ലാവിസിന്റെ ഡാഷ്‌ബോർഡ് കൂടുതൽ മിനിമലിസ്റ്റിക് രൂപഭാവം സ്വീകരിച്ചിട്ടുണ്ട്. കൂടാതെ സെൻട്രൽ ഇൻഫോടെയ്ൻമെന്റ് ടച്ച്‌സ്‌ക്രീനും ഡിജിറ്റൽ ഡ്രൈവർ ഡിസ്‌പ്ലേയും സംയോജിപ്പിക്കുന്ന 26.62 ഇഞ്ച് ഡ്യുവൽ ഡിസ്‌പ്ലേയും ഇതിലുണ്ട്. പനോരമിക് സൺറൂഫ്, വെന്റിലേറ്റഡ് ഫ്രണ്ട് സീറ്റുകൾ (ഡ്രൈവർ സീറ്റിനായി ഫോർ-വേ പവർ അഡ്ജസ്റ്റ്‌മെന്റോടെ), 64-കളർ ആംബിയന്റ് ലൈറ്റിംഗ്, അഞ്ച് യുഎസ്ബി-സി പോർട്ടുകൾ, ഡ്യുവൽ-വ്യൂ ഡാഷ് കാം, സീറ്റ്-മൗണ്ടഡ് എയർ പ്യൂരിഫയർ, 8-സ്പീക്കർ ബോസ് സൗണ്ട് സിസ്റ്റം,.അഡാപ്റ്റീവ് ക്രൂയിസ് കൺട്രോൾ, ലെയ്ൻ കീപ്പ് അസിസ്റ്റ്, റിയർ ക്രോസ് ട്രാഫിക് അലേർട്ട് എന്നിവയുൾപ്പെടെ 20-ലധികം ഫംഗ്ഷനുകൾ ഉൾക്കൊള്ളുന്ന ലെവൽ 2 അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റംസ് (ADAS) സ്യൂട്ട് എന്നിവയാണ് കാരെൻസ് ക്ലാവിസിലുള്ള മറ്റ് പ്രധാന ഫീച്ചറുകള്‍. അതായത് കാറിൻ്റെ ഉള്ളിലാണ് മാറ്റങ്ങൾ കൂടുതൽ പ്രകടമാകുന്നത് എന്നര്‍ഥം..

HTE, HTE(O), HTK, HTK+, HTK+(O), HTX, HTX+ എന്നിവയുൾപ്പെടെ ഏഴ് വേരിയന്റുകളിലായി എത്തുന്ന കാറിന് ഐവറി സിൽവർ ഗ്ലോസ്, പ്യൂട്ടർ ഒലിവ്, ഇംപീരിയൽ ബ്ലൂ, ഗ്ലേസിയർ വൈറ്റ് പേൾ, ഗ്രാവിറ്റി ഗ്രേ, സ്പാർക്ലിംഗ് സിൽവർ, ക്ലിയർ വൈറ്റ്, അറോറ ബ്ലാക്ക് പേൾ എന്നിങ്ങനെ 8 കളര്‍ ഓപ്ഷനുകളാണ് ലഭിക്കുന്നത്.1.5 ലിറ്റർ നാച്ചുറലി ആസ്പിറേറ്റഡ് പെട്രോൾ, 1.5 ടർബോ പെട്രോൾ, 1.5 ലിറ്റർ ഡീസൽ എഞ്ചിൻ ഓപ്ഷനുകൾ തന്നെയാവും പുതിയ കാരൻസ് ക്ലാവിസിലുമുണ്ടാവുക.