ഇവർക്ക് സ്വന്തം കുട്ടികളില്ലേ?; മിനാബ് സ്കൂൾ ദുരന്തത്തിന് ഉത്തരവാദികളായവരുടെ ചിത്രങ്ങൾ പുറത്ത് വിട്ട് ഇറാൻ

ഇറാനിൽ ഫെബ്രുവരി 28-ന് 175-ലധികം വിദ്യാർഥികളും അധ്യാപകരും കൊല്ലപ്പെട്ട മിനാബ് സ്കൂൾ ആക്രമണത്തിന് ഉത്തരവാദികളായ യുഎസ് നാവിക സേന ഉദ്യോ​ഗസ്ഥരുടെ പേരും ഫോട്ടോയും മറ്റ് വിവരങ്ങളും ഔദ്യോ​ഗികമായി പുറത്ത് വിട്ട് ഇറാൻ. ലീ ആർ ടേറ്റ്, ജെഫ്രി ഇ യോർക്ക് എന്നിവരാണ് ഈ സംഭവത്തിന് നേതൃത്വം നൽകിയ പ്രധാനികൾ. ഇതിൽ ലീ ആർ ടേറ്റ് യുഎസ്എസ് സ്പ്രൂവൻസ് കപ്പലിലെ കമാൻഡിങ് ഓഫീസറാണ്, ജെഫ്രീ എക്സിക്യൂട്ടീവ് ഓഫീസറുമാണ്.

ഈ ഓഫീസർമാരാണ് സ്കൂളിന് നേരെ മിസൈലുകൾ വർഷിക്കാൻ അനുമതി നൽകിയതെന്ന് ഇന്ത്യയിലെ ഇറാനിയൻ എംബസി അറിയിച്ചു. ഇവർക്ക് എങ്ങനെയണ് രാത്രി സമാധാനമായി ഉറങ്ങാൻ കഴിയുന്നത് എന്ന തലക്കെട്ടോടെയാണ് നൈജീരിയയിലെ ഇറാൻ എംബസി ഉദ്യോ​ഗസ്ഥരുടെ ചിത്രം പുറത്ത് വിട്ടത്. അതേസമയം, ഇവർക്ക് സ്വന്തം കുട്ടികളില്ലെ എന്ന ചോദ്യത്തോടെയാണ് ദക്ഷിണാഫ്രിക്കയിലെ ഇറാൻ എംബസി വിവരങ്ങൾ പോസ്റ്റിലൂടെ പുറത്തിറക്കിയത്. എന്നാൽ യുഎസ് അന്വേഷണ സംഘം ഈ കൂട്ടക്കുരുതിയെ ലക്ഷ്യ സ്ഥാനം പിഴച്ചുണ്ടായ ഒരു സംഭവമായാണ് ന്യായീകരിക്കുന്നത്.

Also read : അമേരിക്ക-ഇസ്രായേൽ ആക്രമണം: ഏറ്റവും പുതിയ 5 സംഭവവികാസങ്ങൾ

ഇന്ത്യ, നൈജീരിയ, ദക്ഷിണാഫ്രിക്ക എന്നിവിടങ്ങളിലെ ഇറാൻ എംബസികളാണ് ചിത്രങ്ങൾ പുറത്ത് വിട്ടത്. ഇതിലൂടെ യുദ്ധക്കുറ്റങ്ങൾ ചുമത്തി അമേരിക്കയെ അന്താരാഷ്ട്ര കോടതിക്ക് മുന്നിൽ ഇറാന് പ്രതിക്കൂട്ടിലാക്കാം.