ഫാറ്റി ലിവർ എന്ന നിശബ്ദനായ കൊലയാളി; കാർന്ന് തിന്നുന്നതിന് മുന്നേ ലക്ഷണങ്ങൾ തിരിച്ചറിയാം

നമ്മുടെ ശരീരത്തിലെ വിഷാംശങ്ങൾ പുറന്തള്ളുന്നതിലും മെറ്റബോളിസം മികച്ചതാക്കുന്നതിലും ഊർജ്ജം ഉത്പാദിപ്പിക്കുന്നതിലും പ്രധാന പങ്ക് വഹിക്കുന്ന അവയവമാണ് കരൾ എന്ന് പറയുന്നത്. നമ്മുടെ ശരീരത്തെ നന്നായി നോക്കുന്ന കരളിനെ നമ്മൾ നന്നായിട്ടാണോ നോക്കുന്നത് ? കൃത്യമല്ലാത്ത ജീവിതശൈലിയും ഭക്ഷണരീതിയും കാരണം കരളുമായി ബന്ധപ്പെട്ട രോഗങ്ങൾ, പ്രത്യേകിച്ച് ഫാറ്റി ലിവർ ബാധിക്കുന്നവരുടെ എണ്ണം ദിനംപ്രതി വർധിക്കുകയാണ്.

കരൾ കോശങ്ങളിൽ അമിതമായി കൊഴുപ്പ് അടിഞ്ഞുകൂടുന്ന അവസ്ഥയാണ് ഫാറ്റി ലിവർ എന്നുപറയുന്നത്. കരളിന്റെ ആകെ ഭാരത്തിന്റെ 5 ശതമാനത്തിലധികം കൊഴുപ്പ് ഉണ്ടാകുമ്പോഴാണ് ഇതിനെ ഫാറ്റി ലിവർ എന്ന് വിളിക്കുന്നത്. ഇത് പ്രധാനമായും രണ്ട് തരത്തിൽ ആണുള്ളത്.

1. മെറ്റബോളിക് അസോസിയേറ്റഡ് ഫാറ്റി ലിവർ ഡിസീസ് (MAFLD – മദ്യപാനം മൂലമല്ലാത്തത്)
2. മദ്യപാനം മൂലമുണ്ടാകുന്ന ഫാറ്റി ലിവർ

രോഗലക്ഷണങ്ങൾ

ഫാറ്റി ലിവർ ഒരു ‘നിശബ്ദ രോഗം’ ആയാണ് അറിയപ്പെടുന്നത്, കാരണം പലരിലും പ്രകടമായ ലക്ഷണങ്ങൾ ഉണ്ടാകാറില്ല. എങ്കിലും ചില സൂക്ഷ്മമായ ലക്ഷണങ്ങൾ ശ്രദ്ധിക്കേണ്ടതുണ്ട്:

അമിതമായ ക്ഷീണം: ശരീരത്തിന് ഊർജ്ജമില്ലാത്ത അവസ്ഥ.
അസ്വസ്ഥത: വയറിന്റെ മുകൾ ഭാഗത്ത് വലതുവശത്തായി ഭാരമോ വേദനയോ അനുഭവപ്പെടുക.
മറവി: ശ്രദ്ധ കേന്ദ്രീകരിക്കാനുള്ള ബുദ്ധിമുട്ടും ഓർമ്മക്കുറവും
ചർമ്മത്തിലെ മാറ്റങ്ങൾ: കഴുത്തിലോ കക്ഷത്തിലോ കറുത്ത പാടുകൾ കാണപ്പെടുക.
ദഹനപ്രശ്നങ്ങൾ: ഓക്കാനം, വിശപ്പില്ലായ്മ, വയർ വീർക്കുക എന്നിവ.

രോഗം ഗുരുതരമാകുമ്പോൾ മഞ്ഞപ്പിത്തം, കറുത്ത നിറത്തിലുള്ള മലം, രക്തം ഛർദ്ദിക്കുക, കാലിലോ വയറിലോ വീക്കം തുടങ്ങിയ ലക്ഷണങ്ങൾ പ്രകടമാകാം.

ALSO READ: അപ്പോൾ നിസാരമല്ലല്ലേ, ഒരാൾ കോട്ടുവായ ഇടുമ്പോൾ നമുക്കും കോട്ടുവായ വരുന്നത് എന്തുകൊണ്ട്?

കാരണങ്ങൾ

അമിതഭാരം (പ്രത്യേകിച്ച് വയറിന് ചുറ്റുമുള്ള കൊഴുപ്പ്), ടൈപ്പ് 2 പ്രമേഹം, ഉയർന്ന കൊളസ്ട്രോൾ, ഇൻസുലിൻ പ്രതിരോധം, അമിതമായ മദ്യപാനം എന്നിവയാണ് ഫാറ്റി ലിവറിന്റെ പ്രധാന കാരണങ്ങൾ. ശാരീരിക വ്യായാമമില്ലാത്ത ജീവിതശൈലിയും പഞ്ചസാരയടങ്ങിയ ഭക്ഷണങ്ങളുടെ അമിത ഉപയോഗവും ഇതിലേക്ക് നയിക്കുന്നു

രോഗനിർണ്ണയം

രക്തപരിശോധനകളിലൂടെയോ അൾട്രാസൗണ്ട്, സി.ടി സ്കാൻ, എം.ആർ.ഐ പോലുള്ള സ്കാനുകളിലൂടെയോ ഇത് കണ്ടെത്താം. കരളിന്റെ കാഠിന്യം അളക്കാൻ ഫൈബ്രോസ്കാൻ ഉപയോഗിക്കാറുണ്ട്. അപൂർവ്വം സന്ദർഭങ്ങളിൽ ലിവർ ബയോപ്സിയും വേണ്ടിവന്നേക്കാം

ചികിത്സയും പ്രതിരോധവും

ഫാറ്റി ലിവർ ചികിത്സിക്കാൻ നിലവിൽ പ്രത്യേകം അംഗീകൃത മരുന്നുകൾ ലഭ്യമല്ല. എന്നാൽ ജീവിതശൈലിയിൽ വരുത്തുന്ന മാറ്റങ്ങളിലൂടെ ഇത് പൂർണ്ണമായും മാറ്റിയെടുക്കാൻ സാധിക്കും.

ഭക്ഷണക്രമം: പഞ്ചസാരയും ശുദ്ധീകരിച്ച കാർബോഹൈഡ്രേറ്റുകളും ഒഴിവാക്കുക. പഴങ്ങൾ, പച്ചക്കറികൾ, ധാന്യങ്ങൾ എന്നിവ ഭക്ഷണത്തിൽ ഉൾപ്പെടുത്തുക.
വ്യായാമം: ആഴ്ചയിൽ കുറഞ്ഞത് 150 മിനിറ്റ് എങ്കിലും മിതമായ രീതിയിലുള്ള വ്യായാമം ശീലമാക്കുക.
ശരീരഭാരം: ശരീരഭാരം കുറയ്ക്കുന്നത് കരളിലെ കൊഴുപ്പ് കുറയ്ക്കാൻ സഹായിക്കും.
മദ്യപാനവും പുകവലിയും: മദ്യപാനം പൂർണ്ണമായും ഒഴിവാക്കുക, പുകവലി ഉപേക്ഷിക്കുക.

കൃത്യസമയത്ത് ചികിത്സിച്ചില്ലെങ്കിൽ ഇത് ലിവർ സിറോസിസ്, ലിവർ ക്യാൻസർ, ഹൃദയസംബന്ധമായ അസുഖങ്ങൾ എന്നിവയ്ക്ക് കാരണമായേക്കാം. അതിനാൽ ലക്ഷണങ്ങൾ ശ്രദ്ധയിൽപ്പെട്ടാൽ ഉടൻ ഒരു ഡോക്ടറുടെ നിർദ്ദേശം തേടുക.