മലയാളത്തിലെ എവർഗ്രീൻ കോംബോ ആയ മോഹൻലാലും സത്യൻ അന്തിക്കാടും വർഷങ്ങൾക്ക് ശേഷം ഒന്നിക്കുന്ന ചിത്രത്തിന് പേരിട്ടു. ‘ഹൃദയപൂർവം’ എന്നാണ് സിനിമയുടെ പേര്. നവാഗതനായ സോനു ടി പിയാണ് ഹൃദയപൂർവത്തിന് തിരക്കഥയും സംഭാഷണവും ഒരുക്കുക. കൊച്ചിയും പൂനെയുമായിരിക്കും സിനിമയുടെ പ്രധാന ലൊക്കേഷൻ എന്നാണ് സൂചന. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ഹൃദയപൂർവം നിർമിക്കുന്നത്.
ആരായിരിക്കും ഈ ചിത്രത്തിൽ നായികയായി വരിക എന്നാണ് ഇപ്പോൾ മോഹൻലാൽ ആരാധകർ ഉറ്റുനോക്കുന്നത്. എന്നാൽ ഇത് സംബന്ധിച്ച വിവരങ്ങൾ ഇതുവരേക്കും പുറത്തുവന്നിട്ടില്ല. ഹൃദയപൂർവം ചിത്രത്തിന്റെ ഛായാഗ്രഹണം അനു മൂത്തേടത്തും സംഗീത സംവിധാനം ജസ്റ്റിൻ പ്രഭാകരനുമാണ് നിവഹിക്കുന്നത്. എട്ട് വർഷത്തെ ഇടവേളയ്ക്ക് ശേഷമാണ് മോഹൻലാലിനൊപ്പം സത്യൻ അന്തിക്കാട് ഒരു സിനിമ ചെയ്യുന്നത്.
അതേസമയം, കഴിഞ്ഞ ദിവസം സത്യൻ അന്തിക്കാടിന്റെ മക്കളും സംവിധായകരുമായ അഖിൽ സത്യനും അനൂപ് സത്യനും മോഹൻലാലും സത്യൻ അന്തിക്കാടും ഒന്നിക്കുന്നതായുള്ള വിവരം പങ്കുവെച്ചിരുന്നു. ‘ഒരു സൂപ്പർ ഫൺ മോഹൻലാൽ-സത്യൻ അന്തിക്കാട് ചിത്രം ഓൺ ദി വേ’ എന്ന കുറിപ്പോടെ സിനിമയെക്കുറിച്ചുള്ള അപ്ഡേറ്റ് സോഷ്യൽ മീഡിയ സ്റ്റോറിയിലൂടെയാണ് ഇരുവരും അറിയിച്ചത്.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
