പല്ലുകൾ ഒടിച്ചു, വായ പശ കൊണ്ട് ഒട്ടിച്ചു; ജബൽപൂരിൽ പാമ്പാട്ടികൾ കൊണ്ടുവന്ന 57-ലധികം പാമ്പുകളെ രക്ഷപ്പെടുത്തി വനം വകുപ്പ്

പാമ്പാട്ടികൾ കൊണ്ടുവന്ന 57-ലധികം പാമ്പുകളെ വനം വകുപ്പ് രക്ഷപ്പെടുത്തി. ജബൽപൂരിലെ നാഗപഞ്ചമി ആഘോഷങ്ങൾക്ക് വേണ്ടിയാണ് പാമ്പിനെ കൊണ്ടുവന്നത്. രക്ഷപ്പെടുത്തിയ പാമ്പുകളിൽ 51 എണ്ണം മൂർഖൻ പാമ്പുകളും 6 എണ്ണം ധമൻ (എലി പാമ്പുകൾ) ഉം ആയിരുന്നു. മതപരമായ ആചാരങ്ങൾക്കും പൊതു പ്രകടനങ്ങൾക്കുമായി പാമ്പുകളെ പ്രദർശിപ്പിക്കുന്നതിനാണ് ഈ പാമ്പാട്ടികൾ നഗരത്തിലെത്തിയതെന്നാണ് വിവരം.

അവയോട് കാണിച്ച ക്രൂരതയാണ് രക്ഷാപ്രവർത്തനത്തിനിടെ, വനം ഉദ്യോഗസ്ഥരും ഡോക്ടർമാരും കണ്ടെത്തിയത്. പിടികൂടിയ പമ്പുകളിൽ ചില പാമ്പുകളുടെ വായ തുന്നിക്കെട്ടിയ നിലയിലായിരുന്നു, മറ്റു ചിലതിന്റെ പല്ലുകൾ ഒടിഞ്ഞ നിലയിലായിരുന്നു. പല സന്ദർഭങ്ങളിലും, പാമ്പുകൾ കടിക്കുന്നത് തടയാൻ ഫെവിക്വിക്ക് പോലുള്ള ശക്തമായ പശ ഉപയോഗിച്ച് മന്ത്രവാദികൾ പാമ്പുകളുടെ വായ അടച്ചിരുന്നു.

ALSO READ: വളർത്തുനായ നക്കി; യുകെയിൽ അണുബാധയേറ്റ് വയോധികയ്ക്ക് ദാരുണാന്ത്യം

21 പാമ്പാട്ടികളെ വകുപ്പ് അറസ്റ്റ് ചെയ്യുകയും അവർക്കെതിരെ വന്യജീവി സംരക്ഷണ നിയമപ്രകാരം നിയമനടപടി സ്വീകരിക്കുകയും ചെയ്തു. പാമ്പുകളെ പോലുള്ള വന്യമൃഗങ്ങളെ പിടിക്കുന്നതോ ഉപദ്രവിക്കുന്നതോ പ്രദർശിപ്പിക്കുന്നതോ ഈ നിയമം നിരോധിച്ചിരിക്കുന്നു. രക്ഷപ്പെടുത്തിയ എല്ലാ പാമ്പുകൾക്കും വെറ്ററിനറി വിദഗ്ധർ ചികിത്സ നൽകുമെന്നും സുഖം പ്രാപിച്ച ശേഷം അവയെ സുരക്ഷിതമായി കാട്ടിലേക്ക് വിടുമെന്നും വനം ഉദ്യോഗസ്ഥർ സ്ഥിരീകരിച്ചു.

ഉത്സവ വേളകളിൽ ഇത്തരം ക്രൂരമായ ആചാരങ്ങൾ പ്രോത്സാഹിപ്പിക്കരുതെന്നും വകുപ്പ് പൊതുജനങ്ങളോട് അഭ്യർത്ഥിച്ചു. പാരമ്പര്യങ്ങൾ ആഘോഷിക്കുന്നത് നിരപരാധികളായ മൃഗങ്ങൾക്ക് ദോഷം വരുത്തരുത്. വന്യജീവി സംരക്ഷണത്തെ പിന്തുണയ്ക്കാനും ഭാവിയിൽ അത്തരം പ്രവർത്തനങ്ങൾ അധികാരികളെ അറിയിക്കാനും ജനങ്ങൾക്ക് നിർദ്ദേശമുണ്ട്. രാജ്യത്ത് 300-ലധികം ഇനം പാമ്പുകളുണ്ട്. അവയിൽ 60-ഓളം ഇനങ്ങൾ വളരെ വിഷമുള്ളവയാണ്, 40-ലധികം ഇനങ്ങൾ വിഷം കുറഞ്ഞവയാണ്, 180-ഓളം ഇനങ്ങൾ വിഷമില്ലാത്തവയാണ്.