എൻഫോഴ്സ്മെന്റ് ഡയറക്ടറേറ്റ് റെയ്ഡിനിടെ ഓടിരക്ഷപ്പെടാൻ ശ്രമിച്ച തൃണമൂൽ എംഎൽഎ അറസ്റ്റിൽ. ബർവാൻ എംഎൽഎ ആയ തൃണമൂൽ കോൺഗ്രസ് (ടിഎംസി) എംഎൽഎ ജിബൻ കൃഷ്ണ സാഹ ആണ് പരിശോധനയ്ക്കിടെ ഓടിപ്പോകാൻ ശ്രമം നടത്തിയത്. പശ്ചിമ ബംഗാളിലെ മുർഷിദാബാദ് ജില്ലയിൽ അദ്ദേഹവുമായി ബന്ധപ്പെട്ട നിരവധി സ്ഥലങ്ങളിൽ എൻഫോഴ്സ്മെന്റ് ഡയറക്ടറേറ്റ് (ഇഡി) റെയ്ഡ് നടത്തിയതിനിടെ, തിങ്കളാഴ്ച വീട് വിട്ട് രക്ഷപ്പെടാൻ ശ്രമിക്കുന്നതിനിടെയാണ് ഇയാളെ പിടികൂടിയത്.
പശ്ചിമ ബംഗാളിലെ സ്കൂൾ റിക്രൂട്ട്മെന്റ് പ്രക്രിയയിൽ നടന്നതായി ആരോപിക്കപ്പെടുന്ന ക്രമക്കേടുകൾ സംബന്ധിച്ച ഏജൻസിയുടെ അന്വേഷണത്തിന്റെ ഭാഗമായാണ് റെയ്ഡുകൾ എന്ന് ഉദ്യോഗസ്ഥർ പറഞ്ഞു . ടിഎംസി നേതാവ് ജിബാൻ കൃഷ്ണ സാഹയുടെ ബർവാനിലെ വസതിയിലും രഘുനാഥ്ഗഞ്ചിലെ അദ്ദേഹത്തിന്റെ ഭാര്യാപിതാക്കളുടെ സ്വത്തുക്കളിലും ഇഡി നിലവിൽ പരിശോധന നടത്തുകയാണ്.
റെയ്ഡ് നടന്ന വിവരം അറിഞ്ഞയുടനെ എംഎൽഎ വീടിന്റെ ചുറ്റുമതിൽ ചാടി രക്ഷപ്പെടാൻ ശ്രമിച്ചുവെങ്കിലും ഇഡി ഉദ്യോഗസ്ഥരും കേന്ദ്ര സേനയും ചേർന്ന് ചെളിയിൽ മൂടിയ അടുത്തുള്ള ഒരു കൃഷിയിടത്തിൽ വെച്ച് പിടികൂടി. തുടർന്ന് ഇ ഡി എംഎൽഎയുടെ അറസ്റ്റ് രേഖപ്പെടുത്തി. രക്ഷപ്പെടാൻ ശ്രമിച്ചത് കൂടാതെ എംഎൽഎ തന്റെ മൊബൈൽ ഫോൺ ഡ്രെയിനേജിലേക്ക് വലിച്ചെറിയുകയും ചെയ്തു. അത് പിന്നീട് എൻഫോഴ്സ്മെന്റ് ഡയറക്ടറേറ്റ് സംഘം കണ്ടെടുത്തു.
കൂടാതെ, ബിർഭും ജില്ലയിലെ ടിഎംസി നേതാവിന്റെ പേഴ്സണൽ അസിസ്റ്റന്റിന്റെ വീട്ടിലും റെയ്ഡ് നടത്തി. പി.ടി.ഐ റിപ്പോർട്ട് അനുസരിച്ച്, ബിർഭുമിൽ നിന്നുള്ള ഒരാളുമായി ബന്ധപ്പെട്ട സാമ്പത്തിക ഇടപാടിനെക്കുറിച്ച് ഇ.ഡിക്ക് വിവരം ലഭിച്ചതിനെ തുടർന്നാണ് റെയ്ഡുകൾ ആരംഭിച്ചത്. ഓപ്പറേഷനിൽ അദ്ദേഹം പിന്നീട് സംഘത്തോടൊപ്പം ഉണ്ടായിരുന്നു.
അഴിമതിയുമായി ബന്ധപ്പെട്ട് സാഹയുടെ ഭാര്യയെ മുമ്പ് ഏജൻസി ചോദ്യം ചെയ്തിരുന്നു. ഇതേ വിഷയത്തിൽ എംഎൽഎയെ 2023 ഏപ്രിലിൽ സിബിഐ അറസ്റ്റ് ചെയ്യുകയും 2025 മെയ് മാസത്തിൽ ജാമ്യം ലഭിക്കുകയും ചെയ്തു. സ്കൂൾ റിക്രൂട്ട്മെന്റ് അഴിമതിയുടെ ക്രിമിനൽ വശങ്ങൾ സിബിഐ അന്വേഷിക്കുമ്പോൾ, കള്ളപ്പണം വെളുപ്പിക്കൽ വശം ഇഡി അന്വേഷിക്കുകയാണ്. ടിഎംസി നേതാവിനെ കൊൽക്കത്തയിലേക്ക് കൊണ്ടുപോകും, അവിടെ പ്രത്യേക ഇഡി കോടതിയിൽ ഹാജരാക്കാനാണ് സാധ്യത.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
