മഹാരാഷ്ട്രയിൽ പാൽഘറിന് പിന്നാലെ വിവിധ ആവശ്യങ്ങൾ ഉന്നയിച്ച് നാസിക്കിൽ നിന്നാരംഭിച്ച ലോങ്ങ് മാർച്ചിൽ കർഷകരും ആദിവാസികളുമായി നാല്പതിനായിരത്തിലധികം പേരാണ് അണിനിരന്നത്. ആദിവാസി സമൂഹത്തിന്റെ കാതലായ ആശങ്കകൾ പരിഹരിക്കുന്നതിനായി 2006 ൽ സർക്കാർ പാസ്സാക്കിയ നിയമം നടപ്പാക്കുക എന്നതാണ് കിസാൻ സഭ നേതാക്കൾ മുന്നോട്ട് വയ്ക്കുന്ന പ്രധാന ആവശ്യം.
അഖില ഭാരതീയ കിസാൻ സഭയുടെയും സിപിഐഎമ്മിന്റെയും ബാനറിലാണ് മാർച്ച് സംഘടിപ്പിച്ചിരിക്കുന്നത്. ജില്ലയിലുടനീളമുള്ള ആദിവാസി മേഖലകളിൽ നിന്നുള്ള ആയിരക്കണക്കിന് പേർ ഇതിൽ പങ്കാളികളായി. വിവിധ ആവശ്യങ്ങൾ ഉന്നയിച്ച് സ്ത്രീകൾ അടക്കം വൻജനാവലിയാണ് നാസിക്കിൽ നിന്ന് മുംബൈയിലേക്ക് കാൽനട മാർച്ച് ആരംഭിച്ചത്.
ALSO READ; 77ാമത് റിപ്പബ്ലിക് ദിനാഘോഷത്തിന്റെ വർണപ്രഭയിൽ രാജ്യം; കനത്ത സുരക്ഷയിൽ തലസ്ഥാനം
നാസിക്കിന്റെ പല ഭാഗങ്ങളിലും ഗതാഗതം വളരെ നേരം സ്തംഭിച്ചു. മാർച്ച് നാസിക് ജില്ലാ കളക്ടറേറ്റിൽ എത്തി അരമണിക്കൂറിലധികം അവിടെ കുത്തിയിരിപ്പ് സമരം നടത്തിയ ശേഷമാണ് കർഷകർ യാത്ര പുനരാരംഭിച്ചത്. ഞായറാഴ്ച വൈകുന്നേരത്തോടെ, നാസിക് നഗരപരിധിയിൽ നിന്ന് ഏതാനും കിലോമീറ്റർ അകലെയുള്ള രജൂർ ബാഹുലയിൽ എത്തിയ ശേഷം രാത്രി തങ്ങിയ പ്രതിഷേധക്കാർ ഇന്ന് രാവിലെ മുതൽ മാർച്ച് പുനരാരംഭിക്കും. അടുത്ത കുറച്ച് ദിവസങ്ങളിൽ മുംബൈയിലേക്ക് മാർച്ച് തുടരും.
ആദിവാസി സമൂഹത്തിന്റെ കാതലായ ആശങ്കകൾ പരിഹരിക്കുന്നതിനായി 2006 ൽ സർക്കാർ ഒരു നിയമം പാസാക്കിയിരുന്നുവെന്നും, കടലാസിൽ നിലവിലുള്ളത് നടപ്പിലാക്കാൻ അധികാരികളോട് ആവശ്യപ്പെടുക എന്നതാണ് മാർച്ച് ലക്ഷ്യമിടുന്നതെന്നും മുൻ എംഎൽഎ ജെപി ഗാവിത് പറഞ്ഞു. നിലവിലുള്ള വ്യവസ്ഥകൾ നടപ്പിലാക്കുക എന്നതാണ് ആവശ്യങ്ങൾ ഉന്നയിക്കുന്നത് എന്നതിനാൽ, പ്രക്ഷോഭം സർക്കാരിന് സാമ്പത്തിക ബാധ്യത വരുത്തുകയോ സർക്കാരിന്റെ പ്രതിച്ഛായയെ ബാധിക്കുകയോ ചെയ്യില്ലെന്നാണ് എം എൽ എ ഗാവിത് പറയുന്നത്.
2018, 2019, 2023 വർഷങ്ങളിൽ അധികാരത്തിലിരുന്നവർ സമാനമായ ഉറപ്പുകൾ നൽകിയിരുന്നുവെങ്കിലും അവയൊന്നും നടപ്പാക്കിയില്ല. ജില്ലാ കളക്ടർ ആയുഷ് പ്രസാദുമായും പ്രതിനിധി സംഘം പ്രശ്നങ്ങൾ ചർച്ച ചെയ്തിരുന്നതായി ഗാവിത് പറഞ്ഞു. എന്നാൽ ആവശ്യങ്ങൾ അംഗീകരിക്കപ്പെടാത്തതിനാൽ തെരുവിലിറങ്ങുകയല്ലാതെ മറ്റ് മാർഗമില്ലായിരുന്നു. ഒരു സാഹചര്യത്തിലും ജാഥക്കാർ പിന്നോട്ട് പോകില്ലെന്നും അദ്ദേഹം പറഞ്ഞു. “ഞങ്ങൾ മന്ത്രാലയത്തിലേക്ക് കാൽനടയായി പോകും. എന്നിട്ടും സംസ്ഥാന സർക്കാർ നടപടിയെടുക്കുന്നില്ലെങ്കിൽ, ഞങ്ങളുടെ ആവശ്യങ്ങൾ നിറവേറ്റുന്നതുവരെ മന്ത്രാലയം ഉപരോധിക്കും,” ഗാവിത് കൂട്ടിച്ചേർത്തു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
