നനഞ്ഞ മുടിയോടെ ഹെൽമറ്റ് ധരിക്കാറുണ്ടോ? എങ്കിൽ ഈ കാര്യം അറിയാതെ പോകരുത്

ഇരുചക്ര വാഹന യാത്രക്കാരുടെ ജീവന് സുരക്ഷയൊരുക്കുന്നതിൽ ഹെൽമറ്റിനുള്ള പങ്ക് ഏറെവലുതാണ് . എന്നാൽ പലപ്പോഴും ഹെൽമറ്റ് ധരിക്കുന്നത് മുടി കൊഴിച്ചിലിനും തലയോട്ടിയിലെ പ്രശ്നങ്ങൾക്കും കാരണമാകുമെന്ന് പറഞ്ഞ് ഇത് ഒഴിവാക്കുന്നവരുണ്ട്. പ്രത്യേകിച്ച് നനഞ്ഞ മുടിയോടെ ഹെൽമറ്റ് ധരിക്കുന്നത് മുടിയുടെ ആരോഗ്യത്തെ ഗുരുതരമായി ബാധിക്കുമെന്നാണ് വിദഗ്ധർ ചൂണ്ടിക്കാട്ടുന്നത്. കൃത്യമായ മുൻകരുതലുകൾ എടുത്താൽ മുടിയുടെ ഭംഗി നിലനിർത്തിക്കൊണ്ടുതന്നെ സുരക്ഷിതമായി യാത്ര ചെയ്യാൻ സാധിക്കും.

നനഞ്ഞ മുടിയോടെ ഹെൽമറ്റ് ധരിക്കുമ്പോൾ തലയ്ക്കുള്ളിൽ ഈർപ്പവും വിയർപ്പും തങ്ങിനിൽക്കാൻ ഇടയാക്കുന്നു. ഇത് മുടിയുടെ വേരുകളെ ദുർബലപ്പെടുത്തുകയും മുടി പൊട്ടിപ്പോകാൻ കാരണമാവുകയും ചെയ്യും. കൂടാതെ, ഈർപ്പമുള്ള അന്തരീക്ഷത്തിൽ ബാക്ടീരിയകളും ഫംഗസും അതിവേഗം വളരുന്നത് തലയോട്ടിയിൽ അണുബാധയ്ക്കും കടുത്ത താരനും വഴിവെക്കും. തലയുടെ വലിപ്പത്തിന് അനുയോജ്യമല്ലാത്ത, അമിതമായി ഇറുകിയിരിക്കുന്ന ഹെൽമറ്റുകൾ ഉപയോഗിക്കുന്നതും മുടിവേരുകൾക്ക് സമ്മർദ്ദമുണ്ടാക്കി കൊഴിച്ചിൽ വർദ്ധിപ്പിക്കും.

ALSO READ : മാനസികാരോ​ഗ്യത്തിനായി എഴുതി തുടങ്ങിക്കോളൂ; ‘ജേണലിങ്’ ഒരു ശീലമാക്കാം

യാത്രയ്ക്ക് മുൻപ് മുടി പൂർണ്ണമായും ഉണങ്ങിയിട്ടുണ്ടെന്ന് ഉറപ്പുവരുത്തുകയാണ് ഇതിന് ആദ്യമായി ചെയ്യേണ്ടത്. ഹെൽമറ്റ് ധരിക്കുന്നതിന് മുൻപ് തലയിൽ ഒരു കോട്ടൺ തുണിയോ സ്കാർഫോ ധരിക്കുന്നത് വിയർപ്പ് ആഗിരണം ചെയ്യാൻ സഹായിക്കും. മറ്റൊരാൾ ഉപയോഗിച്ച ഹെൽമറ്റ് ഉപയോഗിക്കുന്നത് ഒഴിവാക്കുന്നതാണ് എപ്പോഴും നല്ലത്. കൂടാതെ, ഹെൽമറ്റിന്റെ ഉൾഭാഗം കൃത്യമായ ഇടവേളകളിൽ വൃത്തിയാക്കി സൂക്ഷിക്കാനും ശ്രദ്ധിക്കണം. മുടിയുടെ ആരോഗ്യം കരുതി ഹെൽമറ്റ് ഒഴിവാക്കാതെ, ശരിയായ രീതിയിൽ അത് ധരിക്കാൻ ശീലിക്കുന്നത് ജീവനും മുടിയും ഒരുപോലെ സംരക്ഷിക്കാൻ സഹായിക്കും.