കോളടിക്കുമല്ലോ! രാജ്യത്ത് ഫോണിനും ടിവിക്കും ഫ്രിഡ്ജിനുമെല്ലാം വില കുറയും; കാരണം യു.എസ്-ചൈന വ്യാപാരയുദ്ധം

അമേരിക്കയും ചൈനയും തമ്മിലുള്ള വ്യാപാര യുദ്ധം രൂക്ഷമാകുന്നതിനിടെ ഇന്ത്യയിൽ ഫോണിനും ടിവിക്കും ഫ്രിഡ്ജിനുമെല്ലാം വില കുറയാൻ സാഹചര്യമൊരുങ്ങുന്നു. നിരവധി ചൈനീസ് ഇലക്ട്രോണിക് പാർട്സ് നിർമ്മാതാക്കൾ ഇന്ത്യൻ കമ്പനികൾക്ക് 5 ശതമാനം വരെ കിഴിവ് വാഗ്ദാനം ചെയ്തതോടെയാണിത്. ദി ഇക്കണോമിക് ടൈംസാണ് ഇക്കാര്യം റിപ്പോർട്ട് ചെയ്യുന്നത്. ഇത്തരത്തിൽ ലാഭം ലഭിക്കുന്നതോടെ ഉൽപന്നങ്ങൾക്ക് വില കുറയ്ക്കാൻ ആലോചിക്കുന്നതായി വിവിധ ഇലക്ട്രോണിക്സ് നിർമാതാക്കൾ വ്യക്തമാക്കുന്നു.

യുഎസ്-ചൈന വ്യാപാര സംഘർഷം രൂക്ഷമായതിനെ തുടർന്നാണ് ഏറ്റവും പുതിയ സംഭവവികാസങ്ങൾ. ഏപ്രിൽ രണ്ടിന് പ്രസിഡൻ്റ് ട്രംപ് ചൈനീസ് ഇറക്കുമതിക്ക് കുത്തനെയുള്ള പകരച്ചുങ്കം ചുമത്തി. അമേരിക്കൻ ഉൽപ്പന്നങ്ങൾക്ക് 34% ചുങ്കം ചുമത്തി ചൈന തിരിച്ചടിച്ചു, ഇത് 104% ആയും തുടർന്ന് ഏപ്രിൽ 9-ന് 125% ആയും ഉയർത്താൻ അമേരിക്കയെ പ്രേരിപ്പിച്ചു. ഇതിനു വിരുദ്ധമായി, പ്രതികാരം ചെയ്യാത്ത രാജ്യങ്ങൾക്കുള്ള താരിഫുകൾക്ക് 90 ദിവസത്തെ താൽക്കാലിക സ്റ്റേ ട്രംപ് പ്രഖ്യാപിച്ചു.

ഈ പ്രശ്നങ്ങൾക്കിടെയാണ് ഇന്ത്യൻ കമ്പനികൾക്ക് നേട്ടമുണ്ടാകാൻ സാഹചര്യമൊരുങ്ങുന്നത്. ഉയർന്ന താരിഫുകൾ കാരണം യുഎസിലേക്കുള്ള ചൈനീസ് കയറ്റുമതി സമ്മർദ്ദത്തിലായതിനാൽ, ചൈനയിലെ നിർമ്മാതാക്കൾ ഇലക്ട്രോണിക് പാർട്സുകൾ വിലകുറച്ച് ഇന്ത്യ ഉൾപ്പടെയുള്ള രാജ്യങ്ങൾക്ക് നൽകാൻ തയ്യാറാകുന്നത്.

Also Read- നത്തിങ്ങ് ഫോണിന്റെ അനുജന്‍ സിഎംഎഫ് ഫോണ്‍ 2 പ്രോ ഏപ്രില്‍ 28ന് ഇന്ത്യയിലെത്തുന്നു

“ഇത് ഇന്ത്യയിലെ ഇറക്കുമതിക്കാർക്ക് ഇലക്ട്രോണിക് പാർട്സ് വില കുറവിൽ ലഭിക്കാൻ ഇടയാക്കും,” ഗോദ്‌റെജ് എൻ്റർപ്രൈസസ് ഗ്രൂപ്പിലെ അപ്ലയൻസ് ബിസിനസ്സ് മേധാവി കമൽ നന്ദി പറഞ്ഞു. “ഇന്ത്യൻ കമ്പനികൾ മെയ്-ജൂൺ മുതൽ പുതിയ ഓർഡറുകൾ നൽകുന്നതിനാൽ, ഉപഭോക്താക്കൾക്ക് വിലക്കുറവ് നൽകാൻ സാധ്യതയുണ്ട്,” സൂപ്പർ പ്ലാസ്‌ട്രോണിക്‌സിൻ്റെ സിഇഒ അവ്‌നീത് സിംഗ് മർവ ദി ഇക്കണോമിക് ടൈംസിനോട് പറഞ്ഞു.