ചോറ് വയ്ക്കാൻ വരട്ടെ; പാകം ചെയ്യുന്നതിന് മുൻപ് അരമണിക്കൂർ നേരം അരി കുതിർത്തുവയ്ക്കൂ, സംഭവിക്കുന്നത് അത്ഭുതങ്ങൾ

തിരക്കേറിയ ജീവിതമാണ് ഇപ്പോഴത്തേത്. പലരും വീട്ടിലെ ജോലിയെല്ലാം തിരക്കിട്ട് ചെയ്തതിനുശേഷമായിരിക്കും ജോലിക്ക് പോകുന്നത്. ചോറ് വയ്ക്കുന്നത് അടുക്കളയിലെ പ്രധാന പരിപാടിയാണ്. സമയം അധികം പാഴാക്കാതെ ചോറ് വയ്ക്കാനാണ് പലരും ശ്രമിക്കുന്നത്. അതിനായി ഒന്നുകിൽ അരി കഴുകിയ ഉടൻ തന്നെ പ്രഷർ കുക്കറിലിട്ട് ചോറ് തയ്യാറാക്കാനാണ് ഒട്ടുമിക്കവരും ശ്രമിക്കുന്നത്. എന്നാലിത് എപ്പോഴും ആരോഗ്യത്തിന് ഗുണം ചെയ്യില്ലെന്നാണ് ആരോഗ്യ വിദഗ്ദർ പറയുന്നത്. അരി പാകം ചെയ്യുന്നതിന് അരമണിക്കൂർ നേരത്തിനുമുന്നേ വെള്ളത്തിലിട്ട് കുതിർത്താൽ സമയം ലാഭിക്കാനും പോഷകഗുണങ്ങൾ ഏറെ കിട്ടുമെന്നാണ് വിദഗ്ദർ പറയുന്നത്. ഈ രീതി പരമ്പരാഗതമായി ആളുകൾ പരീക്ഷിച്ചുവന്നതാണെന്നാണ് വിവരം.

അരി കുതിർക്കുന്നത് മികച്ച ദഹനത്തിനും മൊത്തത്തിലുള്ള ആരോഗ്യത്തിനും സഹായിക്കുമെന്ന് ആധുനിക ഗവേഷണങ്ങൾ സൂചിപ്പിക്കുന്നു. അരിയിൽ സ്വാഭാവികമായും ഫൈറ്റിക് ആസിഡ് അടങ്ങിയിട്ടുണ്ട്. ഇത് ഇരുമ്പ്, സിങ്ക്, കാൽസ്യം, മഗ്നീഷ്യം തുടങ്ങിയ ധാതുക്കളെ ആഗിരണം ചെയ്യാനുള്ള ശരീരത്തിന്റെ കഴിവിനെ തടസപ്പെടുത്തുന്ന ഒരു സംയുക്തമാണ്. പാചകം ചെയ്യുന്നതിനുമുമ്പ് അരി കുതിർക്കുന്നത് ഫൈറ്റിക് ആസിഡിന്റെ പ്രഭാവം കുറയ്ക്കാൻ സഹായിക്കും. ഇത് ശരീരത്തിന് ഈ അവശ്യ പോഷകങ്ങൾ കൂടുതൽ കാര്യക്ഷമമായി ഉപയോഗിക്കാൻ അനുവദിക്കുന്നു.

also read:ഓട്സ് എന്നും ഒരുപോലെ കഴിച്ച് മടുത്തോ; പാലിന് പകരം ഇവ ചേർത്ത് നോക്കൂ

അരി കുതിർക്കുമ്പോൾ, അതിലെ ചില സ്വാഭാവിക എൻസൈമുകൾ സജീവമാവുകയും അന്നജത്തെ തകർക്കാൻ തുടങ്ങുകയും ചെയ്യുന്നു. ഇത് ധാന്യങ്ങൾ ദഹിക്കാൻ എളുപ്പമാക്കുന്നു. തൽഫലമായി, ഇടയ്ക്കിടെ വയറു വീർക്കൽ, ദഹനക്കേട് അല്ലെങ്കിൽ ഗ്യാസ് എന്നിവ അനുഭവപ്പെടുന്നവർക്ക് കുതിർത്ത അരി പാചകം ചെയ്ത് കഴിക്കുമ്പോൾ കൂടുതൽ ആശ്വാസം ലഭിക്കുന്നതാണ്.

സാധാരണ വെളുത്ത അരിക്ക്, 20 മുതൽ 30 മിനിറ്റ് വരെ കുതിർത്താൽ മതിയാകും. ബ്രൗൺ റൈസും മറ്റ് കടുപ്പമുള്ള ഇനങ്ങളും ഒന്ന് മുതൽ രണ്ട് മണിക്കൂർ വരെ കുതിർക്കുന്നത് ഗുണം ചെയ്യും. എന്നിരുന്നാലും, അരി കൂടുതൽ നേരം കുതിർക്കുന്നത് അതിന്റെ ഘടനയെയും രുചിയെയും ബാധിക്കും. അതിനാൽ കൃത്യമായ സമയം നോക്കി മാത്രം ഈ വിദ്യ പരീക്ഷിക്കാവുന്നതാണ്.