രാമക്ഷേത്ര അനുകൂല പ്രസംഗത്തിൽ സാദിഖലി തങ്ങൾക്കെതിരെ ട്രോളുകളുമായി സോഷ്യൽ മീഡിയ രംഗത്ത്. ശ്രീരാമ ക്ഷേത്രം യാഥാര്‍ഥ്യമാണെന്നും, ബഹുഭൂരിപക്ഷം വരുന്ന ഒരു സമൂഹത്തിന്‍റെ ആവശ്യമാണെന്നും പറയുന്ന സാദിഖലി തങ്ങളുടെ ഒരു വീഡിയോ സമൂഹ മാധ്യമങ്ങളിൽ വലിയ രീതിയിൽ ചർച്ചയായിരുന്നു. ഇതിനെ തുടർന്നാണ് ട്രോളുകൾ പുറത്തുവരാൻ തുടങ്ങിയത്.
‘അടുത്ത പദ്മശ്രീ സാദിഖലി തങ്ങൾക്ക്’, ‘ലീഗിലെ സംഘ ഗാനം’, ‘ഇ ഡി യെ പേടിയുണ്ടോ?’, തുടങ്ങിയ കമന്റുകളാണ് സാദിഖലി തങ്ങൾക്കെതിരെ സമൂഹ മാധ്യമങ്ങളിൽ വന്നുകൊണ്ടിരിക്കുന്നത്. അത്തരം ഒരു പരാമർശം നടത്തിയിട്ടില്ല, മറുപടി പിന്നെ പറയാം എന്ന തരത്തിൽ തങ്ങളുടെ വിശദീകരണം കൂടി വന്നതോടെ നിലപാടിൽ മലക്കം മറിഞ്ഞു എന്ന തരത്തിലുള്ള കമന്റുകളും പലരും പങ്കുവെച്ചു.
അതേസമയം, വലിയ രീതിയിലാണ് ലീഗിനകത്ത് ഈ വിഷയം ആളിക്കത്തുന്നത്. എന്തിനാണ് അണികളെ മണ്ടന്മാരാക്കുന്നത് എന്ന ചോദ്യവുമായി ഐ എൻ എലും രംഗത്തെത്തിയിട്ടുണ്ട്. എന്നാൽ തങ്ങളുടെ വാക്കുകൾ വളച്ചൊടിച്ചു എന്ന തരത്തിലാണ് സംഭവത്തിൽ കുഞ്ഞാലിക്കുട്ടി പ്രതികരിച്ചത്. മാതൃകാപരമായ നിലപാടാണ് അയോധ്യ വിഷയത്തിൽ സാദിഖലി തങ്ങൾ എടുത്തതെന്നും കുഞ്ഞാലികുട്ടി അഭിപ്രായപ്പെട്ടിരുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
