ആഷസ് പരമ്പരയിലെ അവസാന ടെസ്റ്റിൽ നിന്ന് ഗസ് ആറ്റ്‌കിൻസൺ പുറത്ത്

ഇംഗ്ലണ്ട് പേസർ ഗസ് ആറ്റ്‌കിൻസൺ സിഡ്‌നിയിൽ ജനുവരി 4ന് ആരംഭിക്കുന്ന ആഷസ് പരമ്പരയിലെ അവസാന ടെസ്റ്റിൽ നിന്ന് പുറത്തായി. വിദഗ്ധ പരിശോധനയിൽ അദ്ദേഹത്തിന് ഇടത് ഹാംസ്ട്രിംഗിൽ പരിക്ക് സ്ഥിരീകരിച്ചതിനെ തുടർന്നാണ് തീരുമാനം.മെൽബൺ ക്രിക്കറ്റ് ഗ്രൗണ്ടിൽ നടന്ന നാലാം ടെസ്റ്റിനിടെയാണ് ആറ്റ്‌കിൻസന് പരിക്കേറ്റത്. രണ്ടാം ദിനം തുടർച്ചയായി ഓവറുകൾ എറിഞ്ഞതിന് ശേഷം അദ്ദേഹം മൈതാനം വിട്ടു. തുടർന്ന് മത്സരത്തിൽ വീണ്ടും ബൗളിംഗിനോ ഫീൽഡിംഗിനോ ഇറങ്ങാനായില്ല. അതേസമയം, ആ മത്സരം ഇംഗ്ലണ്ട് വിജയിച്ചിരുന്നു.

Also Read: മെൽബൺ ടെസ്റ്റിൽ ഇംഗ്ലണ്ടിന് നാലു വിക്കറ്റിന്റെ ജയം

പരിക്കിനെ തുടർന്ന് ആറ്റ്‌കിൻസനെ ഒഴിവാക്കേണ്ടി വന്നെങ്കിലും, സിഡ്‌നി ടെസ്റ്റിനായി പകരക്കാരനെ പ്രഖ്യാപിക്കേണ്ടതില്ലെന്ന നിലപാടാണ് ഇംഗ്ലണ്ട് ടീം മാനേജ്മെന്റ് സ്വീകരിച്ചിരിക്കുന്നത്. നിലവിലുള്ള സ്ക്വാഡിനൊപ്പം തന്നെ അവസാന ടെസ്റ്റിനെ നേരിടാനാണ് തീരുമാനം. ഇംഗ്ലണ്ടിന്റെ പേസ് ബൗളിംഗ് ആക്രമണത്തിന് ഇത് മൂന്നാമത്തെ വലിയ തിരിച്ചടിയാണ്. ബ്രിസ്‌ബെയിൻ ടെസ്റ്റിന് ശേഷം മുട്ട് പരിക്കിനെ തുടർന്ന് മാർക്ക് വുഡ് പരമ്പരയിൽ നിന്ന് പുറത്തായിരുന്നു. അതേസമയം, അഡിലെയ്ഡ് ടെസ്റ്റിന് പിന്നാലെ ഇടത് വശത്ത് പരിക്കേറ്റ ജോഫ്ര ആർച്ചറും ശേഷിച്ച മത്സരങ്ങളിൽ നിന്ന് വിട്ടുനിന്നു.നിരന്തര പരിക്കുകൾ ഇംഗ്ലണ്ടിന്റെ ബൗളിംഗ് നിരയെ ദുർബലമാക്കിയിരിക്കുകയാണ്.